Caamaño&Ameixeiras veñen ó noso estudo para presentar o seu último disco: "Quitar o Aire". Unha visita de verdadeiro luxo.

Afonso Becerra preséntanos unha exposición sobre os dez anos do grupo de teatro EU.EXPERIMENTO do Camoes de Vigo.

En outubro chega a librarías a versión estendida de "Ultraluz", de Ledicia Costas, Premio Afundación de poesía con Xerais. O 20 de outubro chega tamén aos escenarios na Cidade da Cultura, coa música de Amaro Ferreiro e Sergio M. Puga.

O máis destacado da carteleira cinematográfica vén da man de Begoña Vázquez, que nos presenta 'Os asasinos da lúa', 'O reino animal' e 'O legado'.

O documental 'O médico dos pobres' ten prevista a súa estrea para o 15 de outubro na cidade de Lugo e despois por toda a provincia da Coruña e Lugo no mes de novembro e decembro. Recolle a historia de Manuel Díaz, falecido en setembro do 1936 a man de falanxistas. Falamos co seu director, Federico Rioboo.

O noso experto en música clásica tráenos as 'Migracións' da Real Filharmonía de Galicia.

Comeza na Coruña o VI Festival Internacional de Cine Intersección, con proxección, mostras e outras actividades que poderán visitarse do 17 ao 22 de outubro. Para entender as súas claves charlamos co seu director, Gonzalo Veloso.

No apartado literario, Dolores Vilavedra tráenos unha obra galardonada co Premio Fiz Vergara Vilariño. Trátase de 'Diarios/1 [Azul Monforte]', escrita por Antón Lopo e editada por Espiral Maior.

Unha historia arredor da discriminación e o acoso escolar. Niso consiste a obra que Redrum Teatro estrea hoxe no Fiot de Carballo. Chámase 'O pequeno poni' e está dirixida por Álex Sampayo. Charlamos arredor das súas claves cos seus protagonistas, Laura Míguez e Guille Carbajo.

Sen baixar do escenario, Afonso Becerra 'A tempestade', unha das últimas pezas de William Shakespeare, dirixida por António Pires con música de Jean Sibelus. Participan Theatro Circo e Teatro do Bairro.

A editorial Xerais completa a edición da obra poética de Rosalia de Castro co volume La flor, A mi madre, poesía dispersa e traducións. Un proxecto con edicion critica de Anxo Angueira. Con el charlamos.

Sentados na butaca escoitamos a Begoña Vázquez, que nos presenta as principais estreas da semana: 'O Corno', de Jaione Camborda; 'Me he hecho viral', de Jorge Coira; e 'Al otro lado del río y entre los árboles', de Paula Ortiz.

Nesta primeira Residencia FICBUEU, que terá lugar do 9 ao 15 de outubro en Ons, son catro os proxectos seleccionados de entre os 122 que se recibiron dende todo o territorio español, un tercio deles dende Galicia. A titora será Isabel Peña (Zaragoza, 1983), guionista de películas coma As bestas ou El reino –coas que gañou sendos Goyas–, Stockholm, ou Que Dios nos perdone y de series coma Antidisturbios. Charlamos un ratiño con ela.

Aritmar celebra no Auditorio de Galicia unha gala para premiar a música e a poesía galega e portugesa. Arancha Nogueira, Isabel Fidalgo, Fillas de Cassandra, Retimbrar e a Associaçom José Afonso compoñen o cartel de galardonadas. Charlamos coas poetisas.

Sempre hai un oco para ler. Dolores Vilavedra preséntanos a antoloxía de relatos LGBTIQA+ 'Alguén nos lembrará', coordinada por Nee Barros para Xerais.

Un paseo por máis de 400 anos para a reflexión.Niso consiste a obra 'Deiche os ollos e miraches as tebras' que Irene Solà vén presentar ó Diario Cultural. Acompáñanos tamén a súa tradutora ó galego, María Alonso, da man de Kalandraka.

Abrése ademais o telón para que Afonso Becerra nos fale de 'Roméo et Juliette', adaptación da obra de William Shakespeare no marco da 71ª Temporada Lírica de Amigos da Ópera da Coruña.

O documental “O Camiño de Ramón Chao” preséntase estes días no Ourense Film Festival. Aborda a traxectoria do xornalista e escritor Ramón Chao e o seu intese pola figura histórica de Prisciliano. Charlamos del co seu director, Aser Álvarez.

Repasando a carteleira, Begoña Vázquez tráenos 'Chinas', de Arantxa Echevarría; 'O exorcista: crente', de David Gordon; e Dispararon ó pianista", de Fernando Trueba e Javier Mariscal.