Driesestig

Koshistorikus Hetta van Deventer-Terblanche praat oor roosmaryn.

‘n 74-jarige albatros genaamd Wisdom is die oudste voël in die natuur waarvan mense weet. Nadat haar vorige mannetjie sedert 2021 nie meer gesien is nie, het sy nou ‘n nuwe mannetjie gekry, en het weer ‘n eier gelê. ‘n Ander storie van ou liefde is Bernie Littman en Marjorie Fiterman wat op 100 en 102 jarige ouderdom die pasgetroude paartjie met die hoogste gemiddelde ouderdom geword het, toe hulle vanjaar afgehaak het.

Dit is alweer die tyd vir die 16 Dae veldtog van Aktivisme vir Geen Geweld Teen Vroue en Kinders. In KwaNojoli, voorheen bekend as Somerset-Oos, het 'n vrou, wat net as Siena bekend wil staan, aan Mariska Spoormaker gesê sy het na agt jaar van erge mishandeling besluit om te skei, eerder as om ‘n klomp dode in haar huwelik te beleef.

Dieetkundige Valpré Huisamen praat oor die gebruik van aanvullings tot jou dieet.

Tydens ’n sewes-rugbywedstryd tussen Meksiko en Bermuda is Diego Aguilar van Meksiko op die doellyn geduik, hy het die regoppaal getref, maar die drie gedruk. Toe val die dwarslat op sy kop...

Stephané Botha praat oor Innovation for the Blind, en hulle samewerking met RSG vir ’n radiodrama, waar siggestremde persone die produksie behartig het.

Banze Mutonkole is Kongolees, en wou van kleins af 'n danser word. Sy en haar gesin het na Van Rhynsdorp getrek uit hul tuisland, nadat haar pa daar 'n werk gekry het. Hier kon sy nie Engels of Afrikaans praat of verstaan nie, en binne 12 jaar het sy beide tale aangeleer. Sy is na dese 'n knap danser, en met die hulp van barmhartige Samaritane kon sy uiteindelik by 'n Kaapse kampus gaan studeer, waar sy nou haar eie potjie krap sonder haar ouers (hulle woon steeds op Van Rhynsdorp). Sy vertel haar storie in Afrikaans, en dat sy steeds, in weerwil van moeilike omstandighede, groot drome koester om eendag in New York te gaan dans.

Michelinster-sjef Tommy Banks se pasteie was vir die kersmark bestem, maar toe word sy paneelwa met 2 500 pasteie gesteel.

Maryke Musson vertel van die lewe in Ysland met die storms en vuurspuwende berg, wat sy daar beleef het. As jy daar in ‘n restourant Surf & Turf bestel, word daar vir jou walvis en perd voorgesit!

Maryke Musson vertel vir Martelize Brink van ysbere. Dié bere het swart velle, en die hare is deurskynend, maar reflekteer lig, wat dit wit laat voorkom.