Johan Rademan het tydens sy onlangse besoek aan die afgeleë Suid-Atlantiese eiland, St. Helena, met Deon en Anita Robbertse gesels. Deon is verantwoordelik vir die instandhouding van die paaie op die eiland, maar a.g.v. Anita se werk is hulle ook deeltydse uitsaaiers, wat af en toe Afrikaanse musiek op lug speel.

Dr. Schalk du Toit vertel van Bay Cataract Services, wat voorkombare blindheid in die Gqeberha-metro help bekamp. Waglyste by staatshospitale is tot twee jaar lank vir ‘n katarakoperasie wat 15 minute neem om te doen. Die waglys vir ’n kornea-operasie is tot vyf jaar!

’n Trampolien-onderneming in Engeland het ná twee maande in bedryf hulle deure gesluit, nadat ‘n ongevalle- en noodgevalle-eenheid onraad vermoed het omdat besoekers daar soveel beserings opgedoen het. Onder andere het elf mense hulle rûe daar gebreek.

Dawie Botha vertel in SO IS DIE LAND GEBOU van die Kaapse hawens en hulle geskiedenis.

Dieetkundige Retha Harmse vertel hoekom dit nie ‘n goeie idee is om jou dag met koffie te begin nie.

‘n Brit het op en af teen Kilimandjaro gestap ten bate van liefdadigheid, maar nie sommer net so nie. Hy het in beide rigtings dit agteruit gestap!

Joanica Marais vertel van Martie Oosthuizen van Pofadder. Martie is ‘n skaaplam wat van Februarie af klas draf by Hoërskool Martin Oosthuizen op Kakamas.

‘n Amerikaanse man is in die sop nadat hy tydens grendeltyd sy vrou se werksgesprekke by die huis afgeluister het. Hy het met dié inligting aandele gekoop, waarmee hy ’n wins van $1,76 miljoen gemaak het.

In sy nagenoeg 50 jaar toewyding om onder meer volhoubare gemeenskapskore te vestig, én om die grootste orrel-studiebeurs tot stand te bring, is die Baaienaar Bouwer van Rooyen deur Nelson Mandela Universiteit met die alumni-prestasietoekenning bekroon. Aan die uitvoerende kant is Bouwer ‘n orrelis, pianis en koordirigent, maar hy is ook ’n wetenskaplike, en ‘n bewys hiervan is ‘n 47-jaar oue witmelkhoutboom in Gqeberha se Newtonpark. Mariska Spoormaker het na die boom gaan kyk.