Driesestig

Rob Marshall vertel vir Martelize Brink van die skaars Bedlington terriërs, waarvan hy die enigste geregistreerde teler in Suid-Afrika is.

In die landbounuus: Die Nasionale Oesskattingskomitee maak plantvoornemens vir somergewasse bekend; Data van SATI wys dat tafeldruifuitvoere kan daal; Suid-Afrika se landbousektor het in die tweede kwartaal ‘n handelsurplus getoon; Amerika bevestig die voorkoms van nuwewêreld-spykerwurm in wild.

Felix Spies praat oor slaap en limfvloei, en bewerings wat daaroor en demensie gemaak word.

Die bestuurshoof van Bugatti los altyd sy sleutels in sy kar. Hy ry ‘n R45 miljoen Bugatti Chiron. Toe dit gesteel is, het hy in ‘n Porsche 911 gespring en agter sy kar aangejaag. Op die ou end het hy, nadat die dief in Oostenryk vasgekeer is, vir hom ‘n saamrygeleentheid huistoe aangebied.

Haidee Muller-Isaacs gesels met Rosina Secondt van Pella oor die lekker ou dae op hierdie Namakwalandse dorpie. Haidee sê haar mond het gewater toe daar van varsgebakte brood gepraat word.

Kos- en kultuurhistorikus Hetta van Deventer-Terblanche vertel vir Martelize Brink van inheemse wilde aspersies.

In Amerika is daar Halloween-uitstappies, soos om ‘n voormalige psigiatriese hospitaal of 'n voormalige begrafnisondernemer te besoek. Jy kan selfs daar oorslaap.

Baie mense stel belang in die argeologiese en plekspesifieke verwysings in die Bybel. Jack Carstens was lank gelede die Suid-Afrikaanse handelsattaché in Israel. Die omgewing het ‘n blywende indruk op hom gelaat, en nou jare later het hy replikas van bekende verwysings in die Salem-tuin op die Rheebokskloofpad by Windmeul in die Paarl gedupliseer. Jy moet gaan kyk, want jy sal jou oë nie glo nie. Johan Rademan het met Jack gesels.

Johene van Wyk van Paarl kan nie handjies gevou sit en niksdoen nie. Selfs al het sy al einde verlede jaar afgetree, bly sy steeds gaan die gang en aktief in haar gemeenskap. Sy vertel vir Haidee Muller-Isaacs meer oor haar lewe, en hoekom sy nooit net kan stilsit nie.

Biokinetikus Conrad Litch praat oor balans, en die rol van oefeninge om dit te kan verbeter.