Twee en twintig jaar lank het die 83-jarige Willie Le Roux van die Baai die een na die ander Clivia bestuif om nuwe kleure blomme op te tower. Noudat hy nader aan die winter as die somer van sy lewe staan, deel hy soveel as moontlik van sy kennis met ander Clivia-liefhebbers. Maar is die Clivia-koors nog so hoog onder Suid-Afrikaners, of is dit aan die afneem? Mariska Spoormaker het by Willie gaan kuier om te hoor, en haar in 'n see van Clivias vasgeloop.

Heino Gevers praat oor die verskynsel van bedrieglike webblaaie wat opskiet sodra die een of ander ramp êrens afspeel. Ons hoor van honderde bedrieglike webblaaie wat bedryf word om skenkings onder die vaandel van hulp aan Oekraïne te steel.

Elrita Venter en Kurt Schlechter laat Johan Rademan en Martelize Brink proe aan ‘n skemerkelkie met gestookte granate as die sterbestandeel.

Edwin Etzebeth vertel vir Haidee Muller-Isaacs van sy uitdagings as 'n kind met disleksie. Hy is geboelie, maar daar was onderwysers wat hulle oor hom ontferm het. Hy het op 13 die skool verlaat en los werkies begin doen. Hy vertel hoe hy as negentienjarige sy sibbe alleen moes grootmaak nadat hulle wees gelaat is. Hy glo daar is ‘n rede hoekom die Here sekere goed op sy pad geplaas het.

Dr. Daniel Hugo gesels oor die limiriek. Hy het sy doktorsgraad verwerf in vernufpoësie, waarvan die limiriek een voorbeeld is.

Dr. Elbé Coetsee vertel van die Mogalakwena Navorsingsentrum in Limpopo wat internasionale studente ontvang, wat navorsing doen oor Afrikakultuur en -ekologie.

Anton Rabe, president van die Internasionale Toutrekfederasie, gesels oor dié sport in Suid-Afrika.

Jacqui January gesels PC Ferreira, ‘n boer en bewaarder in die Groot Karoo. Hy vertel dat die laaste seekoei 230 jaar gelede in die Seekoeirivier geskiet is. Hy maak deesdae die bewaring en hervestiging van meer as net seekoeie sy lewenstaak.

Gizelle Kruger vertel vir Johan Rademan en Martelize Brink van ondernemings se verantwoordelikheid met die verpakking van hulle produkte, en hoe dit herwin kan word.

Junette Syster gesels oor haar loopbaan as ‘n sogenaamde kurwemodel.