Haidee Muller-Isaacs gesels oor die heel eerste, en ook die heel laaste, langspeelplaat van Oudtshoorn se Môrester Senior Sekondêre Skoolkoor, wat in 1973 gemaak is. Die koorleier destyds was Bennie Arends. Haidee het vir hom op haar tuisdorp gaan kuier.

Suid-Afrika het unieke Oujaarstradisies. Tabied Dante, ‘n lid van die uitvoerende komitee van die Kaapse Maleierkoorraad, is al 22 jaar lank betrokke by die koor as afrigter, en ook by die Kaapse Klopse. Hy vertel van die Oujaarsaandlopies of staptogte en wat die verskil is tussen die Maleierkoor en die Kaapse Klopse.

The Invaders, ‘n popmusiekgroep wie se liedjies heelwat lewens bygekry het sedert hulle laaste album, THERE’S A LIGHT, THERE’S A WAY, 46 jaar gelede uitgereik is. Hulle musiek is steeds só gewild dat die DAK-netwerk ‘n standbeeld vir hulle op hulle tuisdorp, Kariega, wil oprig.

En nou is ons weer terug by die Van Stadensrivier, waar die Baai se eerste opgaardam in 1885 opgerig is om toe al die droogtegeteisterde streek se dors te help les. Mariska Spoormaker praat verder met David Raymer, gewese munisipale wateringenieur, oor die tweede dam wat in die Van Stadensrivier gebou is om bykomende water na die groeiende Port Elizabeth via pyplyne te stuur. In 'n vorige aflewering het Mariska en David die Boonste van Stadens-dam bespreek. Nou kom die Laer Van Stadensdam aan die beurt.

Daagliks hoor ons op sakenuusverslae en lees ons in sakeverslae woorde waarmee ons nie vertroud is nie of nie weet wat dit beteken nie. In GeldGids se reeks, GeldAlfabet, verduidelik ons paneel kundiges die algemeenste sakeverwante woorde, van A tot Z, en die betekenis daarvan. Geldverwante begrippe wat onder die letter M val, word bespreek deur Linda van Greunen, direkteur van die Trust-sake-eenheid van HHG Finansiële Groep, Stephan van der Watt en Eduan Basson van HGG se Welvaart-sake-eenheid, en Karen Pnematicatos van Helderberg Insurance Brokers, ‘n eenheid van HHG Finansiële Groep.

Haidee Muller-Isaascs kuier by Lizeth Horstink, 'n oudargivaris van die SAUK wat na haar aftrede besluit het om ou boeke te herstel en om notaboeke te maak. Sy vertel van die vreugde wat dit aan mense verskaf wanneer sy hulle ou geliefde boeke herstel. Haidee het in haar werkswinkel by haar huis in Somerset-Wes gaan inloer.

Wynand Claassen het tydens die hoogtepunt van Afrikanernasionalisme as ‘n liberale argitekstudent die Springbokke in Nieu-Seeland aangevoer tydens die meelbomtoer. Sy styl het baie gehelp om saam met spelers soos Rob Louw en Errol Tobias die kritiese buitelandse media te woord te staan. Sy droom om vir die Bokke teen die All Blacks te speel, het soms na aan ‘n nagmerrie gedraai, en met twee wedstryde wat tydens die toer afgestel is, het die toer deurentyd aan ‘n dun draadjie gehang. Johan Rademan het met Wynand Claassen gesels.

Dr. Linda-Louise Geldenhuys gesels oor die openbarings en insigte wat op vele vlakke van die lewe uit die pandemie na vore gekom het.

Dit was so hittete of Jurg Human en Margit Meyer-Rodenbeck se geliefde restaurantteater in Durbanville het sy deure gesluit. Haidee Muller-Isaacs was daar om te hoor hoe dit nou gaan. Hulle deel hulle gunsteling herinneringe van hierdie hartsplek, en hulle raad aan ander wat dalk ook op moedverloor se vlakte sit.