Ruben van Wyk het langer as 30 jaar by die SAUK in Seepunt, Kaapstad, as bode gewerk. Hy was alombekend vir sy borrelende geaardheid en natuurlik het hy oor die jare heen in almal by die Seepunt-gebou se harte ingekruip. Ruben het ‘n paar jaar gelede afgetree, en verlede week het hy ongelukkig gesterf. Vandag wil ons graag hulde aan Ruben van Wyk bring, en ons speel vir jou ‘n opname van ‘n geselsie tussen Haidee Muller en Ruben wat in 2014 kort voor sy aftrede uitgesaai is. Ruben, jy sal altyd in ons harte bly voortleef.

Alvano Baartman het sy sig verloor toe hy drie jaar oud was nadat sy pa hom teen die kop geslaan het. Vandag is musiek sy passie. Hy vertel vir Martelize Brink van die uitdagings as siggestremde om ‘n suksesvolle loopbaan as kletsrymer te volg.

Roelf le Roux, 'n afgetrede geoloog, vertel van Barberton se besondere geologie en die gebied wat as wêrelderfenisgebied verklaar is.

Suid-Afrika het deel geword van die internasionale gemeenskap in ‘n naskoolse leerdersprojek. Lights On Afterschool, wat die afgelope 20 jaar internasionale bestaan, is nou vir die eerste keer in Suid-Afrika. Jacqui January het meer gaan uitvind oor die projek.

Noordhoek met sy perdekultuur, doen langtermynbeplanning om die dorp se karakter te bewaar te midde van verstedeliking en ander uitdagings. Marike Colyn van die Belastingbetalersvereniging vertel hoe die dorp al die rolspelers hierby betrek het.

Die konsep van geologie kom van twee Griekse woorde - geo, wat Aarde beteken, en logo wat studie beteken. Dit gaan oor die wetenskap en ontleding van die binne- en buitevorm van die planeet. Dit is dus die bestudering van die vlakke wat die aardbol vorm en die vormingsmeganisme daarvan. Jacqui January gesels met geoloog prof. Hennie Theart.

Martelize Brink praat met Jan Vermeulen, redakteur by My Broadband en ondersoekende joernalis, oor wat WASP is, die probleme daarmee en watter rol dit gespeel het in die moord op luitenant-kolonel Charl Kinnear.

Johan Rademan praat met Shane Petzer van Magpie Art Collective op Barrydale oor hulle kandelare, wat agt jaar lank in die Withuis in Washington DC gehang het. Dit het saam met die Obamas na hulle nuwe huis getrek.

Hierdie is die storie van Robert Lipka van Port Elizabeth wat só dankbaar was toe hy in 2016 suksesvol teen prostaatkanker behandel is, dat hy sy hare die afgelope vier jaar laat groei het. Maar sy spoggerige poniestert gaan nou waai, het hy vir Mariska Spoormaker gesê.

Johan Rademan praat met Bart Pieterse, wat 16 jaar lank verbonde was aan die polisie se honde-eenheid op Bethlehem. Het daar met ‘n patrollie- en springstofhond gewerk, en het ook agt jaar lank in Irak en Afghanistan met honde gewerk.