د دې اوونۍ د "هارون باچا هنري ګړۍ" خپرونې مېلمه د خيبر پښتونخوا د صوابۍ د زېدې کلي يو سندرغاړی او باجه (هارمونيم) غږوونکی عرفان زېده وال دی. نوموړی د يوې هنري کورنۍ دی. زېده وال د هنر پيل له تبلې غږولو کړی وو خو وروسته يې باجه او ورسره سندره ويل زده کړل. دی وايي، ۲۵ کاله د نوميالي ولسي سندرغاړي کفايت شاه باچا په هنري ډله کې پاتې شوی. هغه زياتوي چې د خلکو د اقتصادي ستونزو له وجې د هنرمندانو کار روزګار خراب شوی دی. د عرفان زېده وال دا خبرې او ځينې سندرې يې په خپرونه کې اورېدای شئ.

په هارون باچا هنري ګړۍ کې مو نن د سوات ځوان سندرغاړی شهاب شاهین مېلمه دی. د نوموړي مورنۍ ژبه توروالي ده خو له پښتو سره د مینې له کبله پښتو سندرې وايي. هغه اوسمهال د موسیقۍ زده کړې کوي او د لاهور له بیکنهاوس نیشنل یا ملي پوهنتونه یې د تیېټر (تیاتر)، فلم او ټېلېوېژن په څانګه کې لوړې زده کړې کړې دي. په خپرونه کې د شاهین سندرې هم درخپروو.

په هارون باچا هنري ګړۍ کې مو دا اوونۍ د ملاکنډ له ځوان سندرغاړي کمال خان سره خبرې کړې دي. نوموړي د خپل اواز او د ښه شاعرې د انتخاب له کبله په کم وخت کې په پښتو موسیقۍ کې نوم ګټلی دی. دی وايي، خپل هنر د ولس بیدارۍ لپاره کارول غواړي. په خپرونه کې د نوموړي سندرې هم اورېدای شئ.

د دې اوونۍ د "هارون باچا هنري ګړۍ" خپرونې مېلمه د پېښور يو پېژندلی سندرغاړی خالد ملک دی. نوموړی اصلاً د صوابۍ دی خو په پېښور کې لوی شوی او هم له هغه ځايه يې د هنر پيل کړی دی. د ملک يوشمېر سندرې مشهورې شوې دي. دی البته وايي چې اوسمهال د يوې سندرې په جوړولو لږترلږه ۵۰،۰۰۰ روپۍ لګښت کېږي او په خبره يې چې پښتانه سندرغاړي له دې امله پرېشانه دي. د خالد ملک دا خبرې او ځينې سندرې يې په خپرونه کې اورېدای شئ.

د دې اوونۍ د "هارون باچا هنري ګړۍ" خپرونې مېلمه سندرغاړی خورشيد عالم صابر دی. نوموړی د خيبر پښتونخوا د مردان د بخشالي کلي دی. ۵۳ کلن صابر د خپل ژوند زياتره وخت د عربي هېوادونو په مساپرۍ کې تېر کړی او اوسمهال په متحده عربي اماراتو کې کار روزګار کوي. صابر وايي، يوشمېر کمپوزونه يې د مشهورتيا وړ وي، خو دی يې ولس ته په ويډيويي بڼه د وړاندې کولو په چل نه پوهېږي. د نوموړي دا خبرې او ځينې سندرې يې په خپرونه کې اورېدای شئ.

د دې اوونۍ د "هارون باچا هنري ګړۍ" خپرونې مېلمه د پېښور يو نوميالی شپېلۍ يا فلوټ غږوونکی بلال شفقت دی. نوموړی وايي، کورنۍ يې شاوخوا ۷۰ کاله مخکې له لاهوره پېښور ته کډه شوې ده. د شفقت د کورنۍ يوشمېر کسان بېلا بېل سازونه غږوي او شاګردان هم روزي. د شفقت په خبره، د سيمې له تقريباً ټولو نومياليو سندرغاړو سره يې په سټوډيو کې او يا هم پر سټيج په شپېلۍ همکاري کړې ده. دی دعوه کوي چې په تېرو ۲۵ کلونو کې يې د پښتو په سلګونه زره سندرو کې شپېلۍ غږولې. د نوموړي دا خبرې او غږولې ځينې نغمې يې په خپرونه کې اورېدای شئ.

د دې اوونۍ د "هارون باچا هنري ګړۍ" خپرونې مېلمه د خيبر پښتونخوا د چارسدې يو پېژندلی سندرغاړی خيال ګل نسيم دی. د ده پلرنی ټاټوبی د صوابۍ "پرمولي" کلی دی خو د موسيقۍ د زده کړې لپاره شاوخوا ۱۷ کاله وړاندې د چارسدې اتمانزیو ته کډه شوی وو او له خپلې کورنۍ سره اوس هم هلته اوسي. نسيم يوشمېر غزلونه او ولسي سندرې ويلې دي خو په وروستيو کلونو کې يې نوې سندره نه ده خپره کړې. دی زياتوي، نوي کمپوزونه يې تيار کړي، خو په سټوډيو کې يې د ثبتولو پيسې نه لري. د خيال ګل نسيم دا خبرې او ځينې سندرې يې په خپرونه کې اورېدای شئ.

د دې اوونۍ د "هارون باچا هنري ګړۍ" خپرونې مېلمه د بلوچستان د کوټې يو پېژندلی سندرغاړی طاهر فېروز دی. نوموړی په پښتو ادبياتو کې ماسټري لري. د ده په وينا، د سندرو پيل يې د پاکستان راډيو له کوټې څانګې کړی. وروسته يې د ټېلېويژن پروګرامونو ترڅنګ يوشمېر کیسټونه هم خپاره کړل. فېروز له يوه ځايي اېف اېم راډيو سره د يوې هنري خپرونې د کوربه په توګه هم کار کوي. نوموړی زياتوي، د اوسنيو ډېجېټل سندرو خوند د کیسټونو هغو ته نه رسي. د ده دا خبرې او سندرې يې په خپرونه کې اورېدای شئ.

د دې اوونۍ په "هارون باچا هنري ګړۍ" کې مو سندرغاړی جلال خان یوسفزی مېلمه دی. نوموړی د خیبر پښتونخوا د صوابۍ اوسېدونکی دی، د پېښور له اېډورډز کالج او پوهنتونه یې زده کړې دي او د سندرو ویلو تر څنګ په اسلام اباد کې وکالت هم کوي. په خپرونه کې له یوسفزي سره د هغه پر ژوند او هنر غږېدلي یو او سندرې یې هم درخپروو. بشپړه خپرونه واورئ.

دا اوونۍ مو په هارون باچا هنري ګړۍ کې د جنوبي وزیرستان له سندرغاړي شان خان سره خبرې کړې دي. نوموړی اوسمهال په اسلام اباد کې اوسي او د پښتو تر څنګ یې په اردو ژبه هم سندرې ویلې دي. شان خان د نومیالي سندرغاړي کمال مسید زوی دی. دی وايي، ټولنیزو شبکو د ده په ګډون ګڼو پښتنو هنرمندانو ته ګټه رسولې ده. په خپرونه کې د خان د ژوند او هنر په اړه نورې خبرې او سندرې اورېدای شئ.