د دې اوونۍ د "هارون باچا هنري ګړۍ" خپرونې مېلمه د پېښور يو پېژندلی سندرغاړی شوکت محمود دی. نوموړي د خپلې سرکاري نوکرۍ ترڅنګ هنر ته هم وخت ورکړی او يوشمېر سندرې يې ويلي دي. د پاکستان حکومت د ۲۰۲۲ز په مارچ کې د شوکت محمود د هنري کارونو د ستاينې په پار ورته صدارتي جايزه ورکړې ده. د نوموړي د ژوند او هنر په اړه د ده خبرې او ځينې سندرې يې د غږ په ځای کې اورېدای شئ.

د دې اوونۍ د "هارون باچا هنري ګړۍ" خپرونې مېلمانه د سوات دوه ځوان سندرغاړي، اياز خان او ناصر رېشم دي. دوی په وروستيو کې په مېنګوره کې د موسيقۍ په يوه څلور ورځنۍ مېله کې سندرې وويلې. دا مېله پوليس محکمې جوړه کړې وه. دا سندرغاړي وايي، د سوات مدني ټولنه هم بايد ورته مېلې او د موسيقۍ محفلونه جوړ کړي چې د ځايي ولس له ترهګرۍ سره تړلې وېرې ترهې ختمې شي. په خپرونه کې د اياز خان او ناصر رېشم د خبرو ترڅنګ د هغوی سندرې هم اورېدای شئ.

د دې اوونۍ د (هارون باچا هنري ګړۍ ) خپرونې مېلمه د پېښور يو پېژندلی سندرغاړی ګل اکبر راهي دی. نوموړی وايي، موسيقي يې له خپل ماما، احمد ګل استاده زده کړې ده. راهي خوښ دی چې په وروستيو کې يې يو شمېر سندرې مشهورې شوې دي، خو زياتوي چې دومره عوايد نه لري چې خپل او د خپلې کورنۍ ضرورتونه په اسانه پوره کړي. د ګل اکبر راهي د ژوند او هنر په اړه د ده خبرې او ځينې سندرې يې د غږ په ځای کې اورېدای شئ.

د دې اوونۍ د "هارون باچا هنري ګړۍ" خپرونې مېلمه د پښتو او اردو ډرامو يو نوميالی اداکار ارشد حسين دی. نوموړی په پېښور کې اوسي او په وروستیو کې یې "په ټولبند کې د روزي" (روزي اېن لاک ډاون) په نوم يو ټېلي فلم پر يوټيوب خپور کړی دی. دی د فلم د کيسې ليکوال او هم هدايتکار دی. ارشد حسين په خپله په فلم کې د موسيقۍ د يو استاد کردار لوبولی دی. نوموړی وايي، د فلم کيسه تر ډېره د کورونا جهاني وبا په وختونو کې د سيمې خلکو، په تېره هنرمندانو ته، له ورپېښو ستونزو څرخي. په خپرونه کې د ارشد حسين د فلم په اړه د خبرو ترڅنګ ځينې سندرې هم اورېدای شئ.

د دې اوونۍ د "هارون باچا هنري ګړۍ" خپرونې مېلمه د ملاکنډ د تاڼې کلي يو ځوان رباب غږوونکی بلال خان بلال دی. نوموړی په ټولنيزو علومو کې ماسټري لري او له تېرې څه مودې راهيسې په اسلام اباد کې د "اهنګ کده" په نوم د رباب او دموسيقۍ د يو شمېر نورو الاتو د زدکړې يو مرکز چلوي. بلال وايي، اوسمهال شاوخوا ۷۰ کسان، چې نجونه هم پکې شاملې دي، د ده په مرکز کې موسيقي زده کوي. د بلال خان بلال د هنري هلو ځلو په اړه د ده خبرې او په رباب غږولې ځينې نغمې يې د غږ په ځای کې اورېدای شئ.

د دې اوونۍ د "هارون باچا هنري ګړۍ" خپرونې مېلمه پېژندلی سندرغاړی شاه فاروق دی. نوموړی وايي، د سندرغاړي په توګه شهرت دې ته اړ کړ چې له خپل پلرني ټاټوبي بنو څخه کوټې ته کډه شي. فاروق دا مهال په پېښور کې اوسي. دی وايي، سندرې يې دومره ډېرې دي چې دقيق شمېر يې نه دی ورمعلوم. دی البته په خپګان وايي چې له دې باوجود چې دی او يوشمېر نور پښتانه سندرغاړي په خپلو سندرو کې د امن غږ پورته کوي، سيمه لا هم ارامه نه ده. د شاه فاروق دا خبرې او ځينې سندرې يې د غږ په ځای کې اورېدای شئ.

د مشال راډيو د "هارون باچا هنري ګړۍ" خپرونې د دې اوونۍ مېلمه د خيبر پښتونخوا د ملاکنډ يو پېژندلی سندرغاړی سردار يوسفزی دی. نوموړی وايي، له ۱۹۸۴ز راهيسې سندرې وايي، خو اولنی غږیز البم يې په ۲۰۰۵ز کې خپور کړی وو. يوسفزی په خپګان وايي چې په سيمه کې يې هنر او هنرمند ته درانه نه کتل کېږي. د ده په خبره، په ملاکنډ کې يو وارې بيا د وسلوالو د موجوديت له امله که له يوې خوا عام خلک په وېره کې دي نو له بلې خوا هنرمندان په خلاص مټ هنر نشي کولی. د يوسفزي خبرې او ځينې سندرې يې د غږ په ځای کې اورېدای شئ.

د دې اوونۍ د "هارون باچا هنري ګړۍ" خپرونې مېلمه پېژندلی سندرغاړی کرن خان دی. نوموړی تازه د اسټراليا له هنري سفره پېښور ته ستون شوی دی. کرن خان وايي چې اسټراليا مېشته پښتنو او افغانانو نه يوازې په خپل محنت ځانته ښه او معياري ژوند برابر کړی بلکې په خپل کلتور او هنرمندانو هم مين دي. په خپرونه کې د اسټراليا د کنسرټونو په اړه د کرن خان خبرې او ځينې سندرې اورېدای شئ.

د دې اوونۍ د "هارون باچا هنري ګړۍ" خپرونې مېلمه ځوان افغان سندرغاړی مير خان مقری دی. نوموړی د نوميالي سندرغاړي عبدالله مقري زوی دی او له تېرې یوې مودې راهيسې د عربي اماراتو په دوبۍ کې اوسي. مقری د خپلو کاروباري هلو ځلو ترڅنګ وخت په وخت سندرې هم جوړوي او پر خپل يوټيوب چینل يې خپروي. نوموړي په وروستیو کې "د شاه زلمو وطن" په نوم يوه نوې سندره خپره کړې. مقری وايي، له هغې راهيسې چې طالبان پر افغانستان واکمن شوي، د هغه هېواد هنر او موسيقي له سختو چیلېنجونو سره مخامخ شوي. دی له همدې امله پر نړيوالو غږ کوي چې د افغانستان د فرهنګ ساتونکي له پامه و نه غورځوي. د مير خان مقري دا خبرې او یوشمېر سندرې يې د غږ په ځای کې اورېدای شئ.

د دې اوونۍ د "هارون باچا هنري ګړۍ" خپرونې مېلمه د ملاکنډ د بټخېلې يو سندرغاړی اختر شاه دی. دی وايي، له دې باوجود چې کورنۍ یې دیني وه او د هنر مخالفه وه، خپل شوق سندرو ويلو ته اړ کړ. اختر شاه په يوه سرکاري محکمه کې نوکر دی خو زياتوي چې تنخا يې دومره نه ده چې د سندرو جوړولو لپاره ترې پيسې بېلې کړي. د نوموړي د ژوند او هنر په اړه خبرې او ځينې سندرې يې د غږ په ځای کې اورېدای شئ.