Il chantadur da vaglia da la Lumnezia è mort l'entschatta da favrer. En l'emissiun vulain nus ans regurdar dal bassist impressiunant.

Carli Elvedi è naschì da Son Silvester 1932 a Cumbel en Val Lumnezia. Gia da pitschen ha ses conturn remartgà sia vusch, ses organ admirabel ch'el haja forsa er ertà da l'aug. Quai di almain ses frar giuven Pius. Plirs onns ha Carli chantà en il Chor viril Lumnezia e pli tard, cun prender dimora a Cuira, ha el chantà en divers chors en la regiun da Cuira.

En l'emissiun repassain nus la carriera da chant da Carli Elvedi che ha surdà l'olma al Segner ils 7-02-2022. Nus udin divers solos dad el sco era registraziuns dal Chor dils Larischs e dal Chor viril Lumnezia.