Erla Skúladóttir leikkona hefur búið í rúmlega þrjá áratugi í New York borg, nánar tiltekið á Manhattan og er nú hér heima í stuttri heimsókn. Við spurðum hana út í hvernig hún hefur upplifað ástandið í borginni frá því kórónaveirufaraldurinn skall á með miklum þunga þar í vor.

Konur með mikinn fæðingarótta (Tókófóbíu) eru líklegri til að fæða barn sitt með keisaraskurði. Rannsóknir hafa einnig sýnt að konur með mikinn fæðingarótta eru líklegri til að velja mænudeyfingu og gangsetningu fæðingar. Um 4-15% kvenna eru með mikinn fæðingarótta, samkvæmt rannsókn sem gerð var í fimm löndum auk Íslands. Fæðingarótti einkennist af hræðslu við sársauka í fæðingu, ótta við að geta ekki fætt barn og ótta við foreldrahlutverkið og einnig eru konur með fæðingarótta lengur að fæða barn sitt. Við ræddum við Unni Birnu Bassadóttur tónlistarkonu sem er haldin tókófóbíu/fæðingarótta og hefur í nokkur ár verið hluti af hópi kvenna á sérstakri facebooksíðu þar sem þær skiptast á skoðunum og veita hver annari stuðning. Nú gengur Unnur með sitt fyrsta barn og hefur verið opin með þennan ótta sinn á samfélagsmiðlum.

Þorsteinn Sigfússon hefur starfað sem svæðisstjóri Orkubús Vestfjarða með aðsetur á Hólmavík í hátt í fjóra áratugi. Kristín Einarsdóttir, okkar kona á Ströndum, hitti Þorstein og ræddi við hann um starfið og ýmislegt annað.

UMSJÓN GUNNAR HANSSON OG GUÐRÚN GUNNARSDÓTTIR