euroradio.fm

Напярэдадні візіту ў ЗША прэзідэнта Украіны Уладзіміра Зяленскага, прэзідэнт ЗША Дональд Трамп проста ўзяў — і пазваніў Пуціну. І ў выніку гэтай размовы, па словах Трампа, яны дамовіліся сустрэцца бліжэйшым часам з Пуціным у Будапешце. Сталіцы краіны, лідар якой будуе сваю знешнюю палітыку паводле беларускай прымаўкі пра “ласкавае цяля”… Дарэчы, Трамп (у чарговы раз) не выключае, што ў яго атрымаецца сабраць за адным сталом Зяленскага з Пуціным. А вось пра “канал сувязі” Вашынгтона з Масквой і лепшага медыятара ўсёй Еўразіі Лукашэнку нешта ў гэтай гісторыі не толькі не чуваць — ён тут не назіраецца ад слова зусім.

Што стаіць за раптоўным тэлефанаваннем Трампа ў Крэмль напярэдадні візіту Зяленскага ў Вашынгтон і чаго ад гэтага візіту чакаць? Чаму для сустрэчы Трампа і Пуціна быў абраны Будапешт і якім чынам Пуцін туды зможа дабрацца і не апынуцца па выніку ў Гаазе? Чаму гэты этап замірэння Расіі і Украіны Трампам абыходзіцца без Лукашэнкі і чаго чакаць ад прапанаванай ім Трампу “вялікай здзелкі”? На гэтыя ды іншыя пытанні ў эфіры Еўрарадыё адказвае палітычны аглядальнік Радыё Свабода Юрый Дракахруст

Трамп цягам двух тыдняў збіраецца сустрэцца з Пуціным, што стала непрыемным сюрпрызам для Зяленскага, які прыляцеў у Вашынгтон па "Тамагаўкі". Беларуская тэма тут фігунуе ўскосна. Нашы НПЗ павялічылі пастаўкі ў Расію. Ці робіць гэта іх законнай мэтай для тых самых "Тамагаўкаў", якія могуць апынуцца ў распараджэнні ўкраінскага войска?

Абмяркуем гэта з блогерам і палітыкам Аляксандрам Кныровічам. Таксама пагаворым пра планы ўладаў на 2026 год, стан беларускай прамысловасці і бескампрапісную барацьбу з чэргамі на запраўках.

Наступная здзелка — Ватыкан — Еўразум за 16 кастрычніка | Новости Беларуси за 16 октября by Euroradio

Пайшоў другі месяц з таго часу, як была дэпартаваная ў Літву апошняя група вызваленых беларускіх палітвязняў. І хоць адпачатку гучалі абяцанні, што жадаючыя пераехаць з Літвы ў Польшу атрымаюць такую магчымасць насуперак патрабаваннем рэгламента “Дублін ІІІ”, але ніхто да сёння такога пераезду здзейсніць не здолеў. Бо, як аказалася, палітычныя рашэнні і абяцанні не так проста выконваюцца на практыцы. Як і абяцанні дапамагчы беларусам справіцца з іншымі бюракратычна-легалізацыйнымі выклікамі, з якімі яны сутыкнуліся: атрыманнем міжнароднай абароны, рэгістрацыяй народжаных у эміграцыі дзяцей, атрыманнем пенсій…

Ці гатовыя Польшча і Літва насамрэч на практыцы вырашыць пытанне “Дубліна” для вызваленых палітвязняў і што перашкаджае гэтае пытанне вырашыць? Ці будзе такая практыка абыходу “Дубліна” распаўсюджвацца і на іншых беларусаў? Што адбываецца з атрыманнем міжнароднай абароны ў Польшчы і з якімі праблемамі яшчэ сутыкаюцца беларусы ў эміграцыі? На гэтыя ды іншыя пытанні ў эфіры Еўрарадыё адказваюць кіраўніца аддзела прававой дапамогі Цэнтра беларускай салідарнасці Вольга Дабравольская і дарадца Святланы Ціханоўскай у юрыдычных пытаннях Леанід Марозаў

Лукашэнка старанна імкнецца наладзіць адносіны з Трампам і атрымаць ад яго “вялікую здзелку”… І насамрэч, пра тое, каб гэтая “здзелка” атрымалася, марыць не толькі ён, не толькі сваякі палітвязняў, але і ўсе беларусы, якія хочуць спынення пакут людзей за кратамі. Бо вынікам дамоўленасцяў становіцца менавіта вызваленне палітвязняў. Але — не спыненне рэпрэсій, не адмова ад практыкі дэпартацыі людзей са сваёй краіны ў замежжа, не… Працягваць можна доўга. Але хто і што можа прапанаваць шлях іншы?

Ці гатовы Трамп пайсці на “вялікую здзелку” з Лукашэнкам і што той можа запатрабаваць за вызваленне палітвязняў? Чаму Лукашэнка ўвогуле вырашыў звярнуцца да Трампа і ці ўзгоднены гэты крок быў з Масквой? Што разлічвае атрымаць Лукашэнка ад “вялікай здзелкі” з Трампам і навошта Трампу Лукашэнка ў сённяшняй сітуацыі? Пра гэта і шмат што іншае мы і разважаем у жывым эфіры Еўрарадыё з кіраўніком Агенцтва еўраатлантычнага супрацоўніцтва Валерыем Кавалеўскім у 14:00. Праграма выходзіць раз на два тыдні.

16 кастрычніка ў эфіры Еўрарадыё — філосаф, метадолаг, былы палітвязень Уладзімір Мацкевіч.

Мы як нацыя павінны нарэшце вызначыцца не толькі з тым, на якім этапе, у якім месцы мы ўсе знаходзімся, але і з тым, што нам неабходна рабіць, каб наблізіць перамогу і, што самае галоўнае — вяртанне на радзіму. Варта разумець, што чым даўжэй наша грамадства застаецца падзеленым і раскіданым, тым складаней нам будзе паразумецца, калі магчымасць вярнуцца з’явіцца. Сёння мы мусім знайсці агульны падмурак нашага існавання як беларусаў і, адштурнуўшыся ад гэтага падмурку, планаваць супольныя дзеянні, перакананы Уладзімір Мацкевіч.

Пра тое, ці здольныя беларусы сёння спланаваць супольныя дзеянні і рэалізаваць свае планы, ці гатовыя мы іх рэалізаваць праз сілавы сцэнар і пра тое, навошта беларусам сёння нацыяналізм і пошукі ідэнтычнасці, мы і разважаем у праграме “Ідэя Х” з Уладзімірам Мацкевічам.

Рэальныя прыбыткі насельніцтва выраслі на 10% у перыяд са студзеня па жнівень, і Нацбанк, кажуць злыя языкі, запусціў з гэтай нагоды друкавальны станок. Лукашэнка, па сваёй звычцы некага “ператрахіваць”, зладзіў гэты працэс у Легпраме. Не адстаюць ад яго ў гэтым і так званыя сілавікі, якія працягваюць няспынна рэпрэсаваць беларусаў. Нягледзячы на тое, што Лукашэнка старанна імкнецца наладзіць адносіны з Трампам і атрымаць ад яго “вялікую здзелку”…

Што стаіць за ростам рэальных заробкаў і ці сапраўды гэта можа стаць нагодай для Нацбанка запусціць друкавальны станок? Чаму Лукашэнка ізноў незадаволены Легпрамам і што зменіць “перасоўваннне ложкаў”? Што разлічвае атрымаць Лукашэнка ад “вялікай здзелкі” з Трампам і навошта Трампу Лукашэнка? На гэтыя ды іншыя пытанні ў эфіры Еўрарадыё адказвае рэдактарка выдання “План Б”, былая палітзняволеная Вольга Лойка

Ці далучыцца ЕС да дыялогу Мінска і Вашынтона — Еўразум за 15 кастрычніка | Новости Беларуси за 15 октября by Euroradio

Каманда беларусаў запусціла новы праект “K6 Live”. Які хоць і пачынае, як кажуць стваральнікі праекту, свой шлях з музыкі, але імкнецца стаць паўнавартасным late-night show — адкрытай культурнай прасторай для творцаў у эміграцыі і не толькі. “Жывыя выступы, шчырыя лёгкія размовы, прыемная атмасфера — такія складнікі “K6 Live”, — кажуць заснавальнікі. І абяцаюць, што гэта будзе “прастора свабоды, дыялогу і жывой культуры, якая ўзнікае нягледзячы на выклікі эміграцыі”.

Што падштурхнула да заснавання праекту “K6 Live” і ці не было сумневаў у мэтазгоднасці такога праекта? З якімі складанасцямі сутыкнуліся і чым праект адрозніваецца ад іншых культурніцкіх ініцыятыў? На гэтыя ды іншыя пытанні ў эфіры Еўрарадыё адказвае адзін са стваральнікаў праекта, музыка, прадзюсар Антон Шніп і музычная журналістка, крытык, арганізатарка культурных імпрэз Марына Савіцкая

Раптоўна сабраная нарада для абмеркавання “беларуска-амерыканскіх стасункаў” і настойлівыя звароты Лукашэнкі да прэзідэнта ЗША Трампа са словамі пра гатоўнасць да “вялікай здзелкі”, выклікалі адчуванне, што бліжэйшым часам не выключанае новае вызваленне палітвязняў. Ніякай дадатковай інфармацыі ні ад Лукашэнкі, ні ад іншых удзельнікаў нарады кшталту старшыні КДБ і Саўбеза не прагучала: ні адносна памераў той “вялікай здзелкі”, ні, тым больш, умоў, на якіх вызваленыя па здзелцы могуць выйсці на волю.

Ці варта чакаць новых вызваленняў і ці можна казаць пра ўмовы, на якіх гэта вызваленне можа адбыцца? Большасць вызваленых і дэпартаваных палітвязняў выказваюцца пра неабходнасць узмацнення ціску на рэжым — ці ўлічваюць гэта меркаванне прыхільнікі перамоў з рэжымам? Ці далучыцца ЕС да перамоў Трампа з рэжымам Лукашэнкі і што не так з з мантрай "мы ўжо перамаглі"? На гэтыя ды іншыя пытанні ў жывым эфіры Еўрарадыё адказвае палітычны аглядальнік Віталь Цыганкоў