euroradio.fm

Пакуль ва ўсім свеце спрачаюцца, хто вінаваты ў канфлікце паміж Трампам і Зяленскім, ці быў ён загадзя спланаваны і разыграны, а таксама разважаюць, якія пагрозы, перадусім для Украіны, гэтая сітуацыя будзе мець, без адказу застаюцца пытанні пра тое, як гэты канфлікт і яго працяг адаб’юцца на Беларусі і якія будуць мець наступствы для беларусаў. Бо калі ваенны канфлікт спрабуюць вырашыць так, як вырашаюць канфлікт у бізнесе, то заўсёды знойдзецца той, кім ахвяруюць. І не заўжды гэта прамы ўдзельнік канфлікту…

Чым небяспечны бізнес-падыход у пытанні спынення вайны і ці можа ён спрацаваць у выпадку з Расіяй і Украінай? Што варта чакаць ад сустрэчы Трампа з Пуціным і чаму не агучваюцца ўмовы і кампрамісы, на якія мусіць пайсці Расія? Ці не стане Беларусь суцяшальным прызам для Расіі ў выніку спынення вайны ва Украіне? Гэтыя ды іншыя тэмы абмяркоўваем у штотыднёвым жывым эфіры Еўрарадыё з кіраўніком варшаўскага Цэнтра палітычнага аналізу і прагнозу, доктарам палітычных навук, сябрам “Вольнай Беларусі” Паўлам Усавым.

Стомленасцю амерыканскага грамадтсва “левай павестачкай” тлумачылі (сярод іншага) асобныя эксперты перамогу на выбарах Дональда Трампа. Да ўсяго, ён, як знаны “рашала”, абяцаў цягам некалькіх дзён павырашаць праблемы і канфлікты, якія іншым здаваліся невырашальнымі: спыніць вайну ва Украіне, вырашыць пытанне мігрантаў (пакуль яны ўсіх хатніх жывёл простых амерыканцаў не паелі), зрабіць Канаду 51-м штатам і гэтак далей, ажно да засялення Марса. Але выглядае на тое, што найлепш у “лепшага за Вашынгтона” прэзідэнта атрымалася губляць сяброў. А “правая павестачка” пачынае палохаць нават грамадзян ЗША.

Ці выглядаюць дзеянні першых тыдняў Трампа паслядоўнымі і як надоўга хопіць яго цікавасці да вайны Расіі з Украінай? Якія пагрозы нясе “правая павестка” трампаўскай адміністрацыі і ці гатовая Еўропа супрацьстаяць націску з Вашынгтона? Ці не памыліліся прадстаўнікі беларускіх дэмсіл, дэманструючы свае сімпатыі Зяленскаму ў яго канфлікце з Трампам? На гэтыя ды іншыя пытанні ў эфіры Еўрарадыё адказвае палітычны аналітык, аглядальнік Віталь Цыганкоў.

Крыўдлівы Трамп і Оруэл у калоніі — Еўразум за 4 сакавіка | Новости Беларуси за 4 марта by Euroradio

Выглядае на тое, што Трамп (ці, хутчэй, яго адміністрацыя і Дзярждэп) абраў у дачыненнях з Лукашэнкам стратэгію, пра неабходнасць якой казалі асобныя прадстаўнікі беларускіх дэмакратычных сіл. Маецца на ўвазе адмова ад ціску, выстаўлення непрымальных (для рэжыму) умоў і санкцый і пераход да гандлю і гнуткай палітычнай пазіцыі. І нібыта менавіта гэтая змена стала прычынай таго, што рэжым пачаў вызваляць палітвязняў. Не спыняючы рэпрэсій, вызваляючы пераважна тых, у каго і так хутка заканчваўся тэрмін, але…

Як даўно ідуць непублічныя перамовы паміж Вашынгтонам і Мінскам і ці сталі вынікам гэтых перамоў вызваленні палітвязняў Лукашэнкам? Чаго праз гэтыя перамовы імкнецца дасягнуць рэжым і навошта яны ЗША? Чаму для Кіева так важна, каб у дамове наконт рэдказямельных металаў прапісалі гарантыі баспекі і чым любыя гарантыі на паперы лепшыя за Будапешцкі мемарандум? На гэтыя ды іншыя пытанні ў жывым эфіры Еўрарадыё адказвае экс-дыпламат, кіраўнік ініцыятывы MALDZIS, старшы даследчык Цэнтра новых ідэй Павел Мацукевіч.

“Як ты?” Доброволец вернулся с Донбасса, ходит на пары и делает "домашку"| Падкаст з добраахвотнікам by Euroradio

Чамусьці часам здараецца так, што людзі, якія нібыта прагнуць свабоды і дэмакратыі, абіраюць сваімі лідарамі асоб, якія не хаваюць свайго намеру і гэтыя свабоды, і гэтую дэмакратыю знішчыць. Прычым папярэднія дзеянні гэтых палітыкаў ніяк не сведчаць пра іх паспяховаць, але ні на аўтарытарныя праявы, ні на хлуслівыя абяцанні, ні на непісьменнасць і цемрашальства ўвагі не звяртаецца. І ўсё дзеля мары пра “моцную руку”, якая сілай зацягне ўсіх у светлую і шчаслівую будучыню.

Чаму людзі абіраюць відавочна аўтарытарных палітыкаў на кіроўныя пасады і ў чым падабенства Трампа, аяталы Хамейні і Лукашэнкі? Чаго і якімі метадамі імкнуўся дамагчыся Трамп падчас свайго першага прэзідэнцтва і што ў выніку атрымалася? Чаму аўтарытарныя лідары асабліва балюча ўспрымаюць супраціў іх лідарству з боку творчых людзей — пісьменнікаў, музыкаў, актораў і журналістаў? Пра гэта і шмат што іншае мы і разважаем у жывым эфіры Еўрарадыё з кандыдатам гістарычных навук Яўгенам Красуліным.

Два гады прабылі за кратамі музыкі фэнтэзі-фолк гурта IRDORATH Надзея і Уладзімір Калачы. Пасля вызвалення яны выехалі з Беларусі і неўзабаве запісалі песню, якая стала ілюстрацыяй таго, што перажылі музыкі за гэтыя гады зняволення, пра што марылі і ў што верылі. Але на гэтым праца не спынілася, і вось ужо IRDORATH выправіўся ў першы пасля вызвалення еўрапейскі тур, скараючы сваёй энергіяй і сваёй музыкай.

Як гады за кратамі паўплывалі на іх і іх творчасць, што дае сілы выходзіць на сцэну? Што было самым складаным пасля вызвалення і як давялося наноў вучыцца граць на інструментах? З якой праграмай выправіліся ў еўрапейскі тур і якія цікавосткі падрыхтавалі сваім слухачам? На гэтыя ды іншыя пытанні ў эфіры Еўрарадыё адказваюць удзельнікі гурта IRDORATH Надзея і Уладзімір Калачы.

Візіт у Мінск прадстаўніка адміністрацыі Дональда Трампа Крыса Сміта і той факт, што выехаў ён з Беларусі не адзін, а з трыма вызваленымі з лукашэнкаўскай турмы вязнямі, сведчыць пра тое, што пэўны дыялог паміж Мінскам і Вашынгтонам непублічна, але ішоў не адзін дзень. Але гэтыя візіт і вызваленне на фоне магчымага пачатку перамоў паміж Украінай і Расіяй пры пасярэдніцтве ЗША наконт спынення вайны выглядаюць невыпадковымі. Вось толькі далейшыя падзеі, якія прывялі да скандалу паміж Зяленскім і Трампам, ставяць пад сумнеў не толькі планы Мінска, але і будучыню ўсяго нашага рэгіёна.

Ці стаў візіт Сміта доказам наяўнасці перамоў паміж Мінскам і ЗША і што дае Лукашэнку гэтае пацяпленне адносінаў з Вашынгтонам? Як скандал паміж Трампам і Зяленскім уплывае на Беларусь і ці застаецца шанец на перамовы паміж Кіевам і Масквой найбліжэйшым часам? Ці існуе імавернасць новага расійскага нападу з тэрыторыі Беларусі і ці здолеюць лабісты Лукашэнкі ўгаварыць ЗША зняць санкцыі з Беларусі без выканання Мінскам агучаных раней умоў? На гэтыя ды іншыя пытанні ў эфіры Еўрарадыё адказвае палітычны аналітык, эксперт Берлінскага цэнтра Карнегі Арцём Шрайбман.

Сварку паміж кіраўнікамі Украіны і ЗША Уладзімірам Зяленскім і Дональдам Трампам ужо прааналізавалі з розных бакоў і аспектаў. Разварочваўся канфлікт у жывым эфіры, і гэта давала магчымасць аналізаваць не толькі па гарачых слядах, але і маючы перад сабой першакрыніцу, а не сведчанні з “трэціх рук”. Тым не менш пытанняў па-ранейшаму шмат, а наяўнасць запісу сустрэчы ў Авальнай зале пакідае аналітыкам прастору для інтэрпрэтацыі прычын і матываў удзельнікаў канфлікту.

Ці сапраўды менавіта амерыканскі бок мэтанакіравана правакаваў Зяленскага і з якога моманту ўсё пайшло не па плане ў той сустрэчы лідараў Украіны і ЗША? Якія перспектывы адкрывала падпісанне пагаднення па рэдказямельных металах і пры чым тут гарантыі бяспекі? Якія наступствы не толькі для Украіны, але і для Беларусі можа мець зрыў супрацы Украіны і ЗША? Гэтыя ды іншыя тэмы абмяркоўваем у штотыднёвым жывым эфіры Еўрарадыё з дацэнткай, кандыдаткай гістарычных навук, эксперткай па міжнароднай палітыцы Розай Турарбекавай.

Скандал у Трампа і бітва за "Пагоню" — Еўразум за 3 сакавіка | Новости Беларуси за 3 марта by Euroradio