Fálase

No novo episodio do podcast informativo de Praza, conducido por David Lombao, escoitamos as historias de mulleres do mar que fican en terra mentres os seus maridos están embarcados e tamén a voz de Sari Alabau, unha das impulsoras da loita obreira e antifranquista nos sucesos de Ferrol en 1972, mobilización pola que a ditadura a encarcerou

No novo episodio do Fálase, o podcast informativo de Praza.gal, estivemos no acto en que Feijóo ratificou que vai ser o sucesor de Pablo Casado no PP e explicamos como se vai converter no primeiro presidente na historia da Xunta que renuncia ao cargo, para o que repasamos como deixaron o Goberno os seus predecesores: Albor, Laxe, Fraga e Touriño. Con María Yáñez achegámonos ao que se fala en VINTE (https://vinte.praza.gal) comezando por 'Xuntos', a emblemática canción de Juan Pardo "expropiada" polos Familia Caamagno. Conducido por David Lombao

No novo episodio do podcast informativo de Praza.gal damos contexto ao tráxico naufraxio do Villa de Pitanxo coa axuda dun mariñeiro veterano de Terranova e analizamos o impacto en Galicia da crise interna do PP, comezando polas diferenzas coa renuncia de Feijóo en 2018 a liderar o partido e seguindo polo mapa político que se abrirá en Galicia se o actual presidente renuncia de vez. Conducido por David Lombao e con todo o equipo de Praza.gal

No novo episodio do podcast informativo de Praza.gal analizamos o contraste entre o discurso do arcebispado de Santiago sobre a investigación de abusos sexuais na Igrexa e as retesías que amosa ao respecto o Goberno galego, botando man da hemeroteca e tamén das posturas máis recentes dos principais grupos políticos do país. Tamén nos achegamos a VINTE, con "Ana come pan" e moita música. Conducido por David Lombao

O segundo episodio de Fálase céntrase nos datos que acreditan que Galicia bate récords de cartos depositados nos bancos mentres o número de sucursais é o menor dende 1974 e repasa as orixes de parte do problema, coa fusión das desaparecidas grandes caixas galegas. Tamén escoitamos as reflexións de Rafael Pillado, veterano traballador e sindicalista do naval ferrolán que vén de revelar que padece un cancro provocado polos anos en que tivo que manipular amianto.

Conducido por David Lombao.

Nace o primeiro podcast informativo producido por Praza.gal coa vontade de explicar, contextualizar ou resumir algunhas das informacións nas que traballamos. Neste primeiro episodio abordamos a suba dos prezos da vivenda de alugueiro e o escaso balance do primeiro ano do teléfono 'antiocupacións' da Xunta. Tamén nos achegamos a VINTE coa súa directora, María Yáñez, onde se fala da enorme vaga expansiva do paso das Tanxugueiras polo Benidorm Fest, pero tamén de moita máis música e dun podcast da casa: Café Derby 21