MANNLEGI ÞÁTTURINN 16.JÚNÍ

UMSJÓN GUÐRÚN GUNNARSDÓTTIR OG MARGRÉT BLÖNDAL

Kontóristinn er komin aftur á dagskrá Mannlega þáttarins. Steinar Þór Ólafsson skoðar vinnumarkaðinn með augum þess sem ætlar að leita að vinnu og jafnvel skipta um atvinnuvettvang en hvað skiptir mestu máli í leit að nýrri vinnu, nýjum verkefnum? Á slíkum tímamótum þarf að huga að ferilskránni og margir þurfa að uppfæra hana og það er ekki sama hvernig það er gert. Steinar Þór settist niður með Thelmu Kristínu Kvaran, ráðgjafa hjá Intellecta, en allt frá aldamótunum síðustu hefur Intellecta aðstoðað fyrirtæki og hið opinbera við ráðningar.

Bókakaffið á Selfossi hleypti af stokkunum þematengdri viðburðaröð á sunnudaginn. Yfirskriftin er Menningarsumarið á Bókakaffinu og titill fyrsta viðburðar var Nú andar suðrið - þar voru þýðingar í aðalhlutverki og þau sem komu fram voru Hallgrímur Helgason, Helga Soffía Einarsdóttir, Árni Óskarsson og Halldóra Thoroddsen að ógleymdri Pamelu De Sensi sem bæði las út ítalskri þýðingu á bók Halldóru Tvöfalt gler og lék tvö verk annað eftir Elínu Gunnlaugsdóttur og hitt eftir Astor Piazzolla. Dagskráin var flutt tvisvar og það er skemmst frá því að segja að það var fullt út úr dyrum í fyrra sinnið og litlu færri í það síðara. Það erueigendur bókakaffisins þau Elín Gunnlaugsdóttir tónskáld og Bjarni Harðarson rithöfundur sem standa að þessum viðburðum.

Og við fórum yfir ýmislegt sem er í boði á 17.júní í Reykjavík,Kópavogi,Hafnarfirði og Akureyri, það verða ekki hefðbundin hátíðahöld en hátíðahöld engu að síður, margir viðburðir og þeir dreifðir um stærra svæði.