Fjölmenningarsetur hefur opnað upplýsingavef fyrir innflytjendur og fólk af erlendum uppruna fyrir alþingiskosningarnar sem eru framundan. Þar getur fólk fundið upplýsingar um kosningarnar: Hverjir hafa kosningarétt? Hvaða framboð eru í boði? Hver eru málefnin? Hvar er hægt að nálgast upplýsingar og fréttir o.s.frv. Nicole Leigh Mosty, forstöðukona Fjölmenningarseturs kom í þáttinn og sagði meira frá þessum upplýsingavef og hvernig fólk getur snúið sér.

Listaverk prýða víða heimili Íslendinga. Málverk, teikningar, textílverk, höggmyndir og silfurgripir eru viðkvæmir gripir sem þarfnast umönnunar og alúðar. Sérfræðingur Listasafns Íslands mun fjalla um varðveislu listaverka í heimahúsum og veita góð ráð varðandi umhirðu þeirra og er þetta partur af dagskránni Gæðastundir í Listasafni Íslands sem er ætluð eldri borgurum. Við fengum að vita hvernig á að varðveita og hugsa um listaverkin heima og forvitnuðumst líka um þessa dagskrá hjá Ólafi Inga Jónssyni forverði á Listasafni Íslands og Ragnheiði Vignisdóttur verkefnisstjóra viðburða hjá Listasafninu í þættinum í dag.

Póstkort frá Magnúsi R. er ný pistlaþáttaröð Magnúsar R. Einarssonar. Hann segir í þeim af ferðum sínum, áhugamálum og því sem rekur á fjörur hans í landi upplýsingahraðbrautarinnar. Í þessu fyrsta póstkorti í þessari röð sagði hann af veðrinu sem er áhugamál alls heimsins, ekki síst nú á tímum þegar veður gerast vályndari og ýktari með vaxandi loftmengun. Veðrið getur líka haft góð áhrif og var til dæmis undirstaðan í spænska efnahagsundrinu sem varð fyrir sjötíu árum.

UMSJÓN GUÐRÚN GUNNARSDÓTTIR OG GUNNAR HANSSON