Þær fréttir bárust í vikunni að hin vinsæli dúett Skoppa og Skrýtla er að hætta störfum. Leikkonurnar Hrefna Hallgrímsdóttir og Linda Ásgeirsdóttir hafa verið í hlutverkum Skoppu og Skrýtlu í um 18 ár og nú finnst þeim rétt að láta staðar numið. Þær stöllur voru föstudagsgestir Mannlega þáttarins í dag og sögðu okkur frá þessum viðburðarríku árum sem Skoppa og Skrýtla og frá samsöngsskemmtunum sem eru framundan í Sambíó í Álfabakka þar sem börnin og þær sjálfar ætla að kveðja þessar skemmtilegu persónur með leik og söng.

Matarspjallið með Sigurlaugu Margréti var á sínum stað í þættinum í dag. Sigurlaug Margrét hringdi í góðkunningja þáttarins, Albert Eiríksson og fékk góð ráð í sambandi við að undirbúa veislu og hann sagði okkur fræga sögu sem gerðist á Ísafirði. Albert stakk einnig upp á að vinnustaðir, og í rauninni allir, myndu gefa sér tíma fyrir helgina og hafa föstudagskaffi, sem hann segir að sé fullkomin byrjun á góðri helgi.

UMSJÓN GUÐRÚN GUNNARSDÓTTIR OG GUNNAR HANSSON