Avant 30 onns è mort il cumponist jauer Fredy Oswald.

L'Artg musical sa regorda d'ina da las impurtantas persunalitads dal chant e da la musica en Val Müstair. Ils 21 da settember èsi 30 onns dapi la mort d Alfred (Fredy) Oswald (1938-1991). Oriund da Müstair ha Fredy Oswald passentà la gronda part da sia vita a Samedan. Da professiun era el chau-tren tar la Viafier retica. Dasperas era el musicant cun corp ed olma (Engadiner Ländlerfründa), chantadur incharnà, dirigent bainvulent (musicas: Müstair, S-chanf, Susch e Zuoz; chor baselgia: Samedan e Puntraschigna) e cumponist talentà. Fredy Oswald ha scrit passa 50 ovras per chors, musica instrumentala e per furmaziun da ländlers. La pli enconuschenta: La perla zoppada, ina spezia imni da la Val Müstair.

Redacziun: Giusep G. Decurtins