Ils 15 d'avrigl ha Gion Giusep Derungs cumplenì ses 89avel anniversari.

Professer Gion Giusep Derungs è creschì si a Surcasti en Lumnezia-sut. Suenter avair fatg la patenta da magister, ha el dal 1958 fin 1964 fatg studis da musica a Basilea. Dal 1964 fin 1997 è el stà magister da musica a la Scola chantunala da Cuira. Gion Giusep Derungs è dirigent, expert e surtut cumponist.

Per ses 89avel anniversari porta La classica da RTR ovras instrumentalas dal giubilar. En il center da questa emissiun stat IL STROLI, 11 istorgias per clavazin (cumponì 2004). Andriy Dragan ha interpretà quellas ils 25 da mars 2021 per RTR. Dasperas udin nus duas istorgias dal Stroli en la versiun cammeristica (Stella Ingrosso, flauta; Josias Just, clarinetta; Elisabeth Göring, fagot; Cornelia Brandis, violina e Luzius Gartmann, cello), lura parts ord Ein Sommertag (2013) sunà dal Calamus Trio, 3 da las 5 chanzuns popularas (2008) interpretà dal INSO National Symphony Orchestra Lemberg (Ucraina) ensemen cun la chantadura da Breil Salome Cavegn (dir. Simon Camartin) e 4 dals 5 moviments dal Bläserquintett (2017) dà da musicists e musicistas da Lemberg.