У новым выпуску падкаста "Глыбінны народ" рухаемся ў беларускую вёску.

Беларуская вёска гібее і няма гэтаму канца. Прынамсі так шмат хто лічыць. Але хапае і тых, хто перакананы, што ў нашых вёсках можна і трэба жыць. Але пры гэтым трэба ўмець бараніць свае правы.

Сваімі парадамі аб тым, як зрабіць жыццё у вёсцы больш камфортным і пазітыўным падзяліліся рэгіянальныя актывісты Ігар Случак і Аліна Нагорная, жыхары вёскі Перасека на Рагачоўшчыне, якія выдалі кнігу “Абаронім вёску”.

Новы выпуск падкаста «Глыбінны народ» прысвечаны Бабруйску.

Бабруйск — ажна сёмы па велічыні горад нашай краіны. Ён славіцца сваёй крэпасцю, архітэктурай, атмасферай ды габрэйскай спадчынай. Вельмі жывы і душэўны горад з цікавымі гісторыямі, але пры гэтым такі незаўважны на нашай мапе падзей і навінаў. Чаму ж так склалася, які патэнцыял ды плюсы-мінуса ў яго ёсць мы абмяркуем з журналісткай Алесяй Лацінскай.

Сярод беларусаў хапае хрысціянаў і мусульманаў, крышнаітаў ці наогул атэістаў. Але шмат хто заўважае, што мы захоўваем і багата чаго з нашага паганскага мінулага, а ў асобных рэгіёнах і дагэтуль у нядзелю могуць схадзіць на богаслужэнне ў царкву, а потым – да нейкага ўшанаванага мясцовага камяня, каб папрасіць аб чымсці.

У чарговым выпуску нашага падкаста пагамонім пра Вялеса, Сварога ды іншых багоў нашых продкаў, абмяркуем язычніцкія рэлікты ў беларускіх рэгіёнах і нават тое, як бонстыкі папулярызавалі нашу багатую міфалагічную спадчыну. Дапамог нам у гэтым Зміцер Скварчэўскі, кандыдат гістарычных навук і міфолаг, аўтар кнігі «Па слядах багоў: нарысы беларускай міфалогіі».

У межах падкаста пра рэгіёны «Глыбінны народ» мы ўжо паспелі абмеркаваць усе абласныя цэнтры. Усе акрамя Брэста. Самы час выправіць сітуацыю!

Брэст заўжды быў самай заходняй крэпасцю ды «брамай савецкай імперыі», але пасля ейнага развалу стаў нашым, беларускім вакенцам у Еўропу. І здаецца гэта добра паўплывала на развіццё горада.

Пра самае актуальнае з жыцця Брэста паразмаўляем з грамадскім і культурніцкім актывістам Віктарам Клімусам.

Фота: Аляксандра Мурашка

У новым выпуску падкаста «Глыбінны народ» гутарым з Ганай Палей пра прыгажосць Мазыра.

Мазыр вядомы не толькі як цэнтр нафтаперапрацоўкі. Гэта магічны закуток сапраўднага Палесся на Гомельшчыне. Мясцовыя часта параўноўваюць свой горад са Швейцарыяй: прырода сапраўды стварыла тут такі мудрагелісты рэльеф, які дазволіў нават пабудаваць гарналыжны комплекс.

Пра ўсё чароўнае і нечароўнае, што ёсць у Мазыры мы паразмаўлялі з арт-мэнэджаркай культурніцка-адукацыйнай платформы «Першы крок» Ганнай Палей у новым выпуску падкаста «Глыбінны народ».

У новым выпуску падкаста "Глыбінны народ" Яўген Меркіс гутарыць з Антонам Раднянковым пра страхі і праблемы жыхароў беларускіх рэгіёнаў.

Развіццё рэгіёнаў даўно з'яўляецца галаўным болем і для ўладаў, і для тых беларусаў, што жывуць па-за Мінскам. Праз эканамічны ды грамадска-палітычны крызіс сітуацыя пагаршаецца імклівымі тэмпамі.

Цэнтр новых ідэй апублікаваў даследаванне рэгіёнаў, у якім зафіксаваў тыя праблемы і пытанні, што насамрэч хвалююць яго жыхароў. У новым выпуску падкаста "Глыбінны народ" разбіраем яго галоўныя вывады і даем прагноз развіцця падзей з дырэктарам Цэнтра новых ідэй Антонам Раднянковым.

Спасылка на даследаванне.

У новым выпуску падкаста "Глыбінны народ" разам з Генадзем Коршунавым абмяркоўваем беларускае грамадства.

Белыя, чырвоныя, зялёныя, усходнія ды заходнія, тутэйшыя ды неверагодныя: беларусы такія розныя. А што пра беларусаў і стан нашага грамадства кажуць навукоўцы? Пра гэта падкаст “Глыбінны народ” пагаманіў са старэйшым аналітыкам Цэнтра новых ідэй, сацыёлагам Генадзем Коршунавым.

У новым выпуску падкаста “Глыбінны народ” размаўляем з экскурсаводам Яўгенам Апанасевічам пра турызм у рэгіёнах.

Мы ўсе хочам, каб наш родны край быў прыцягальным магнітам для сваіх ды замежнікаў. Пра тое, як развіваць турызм у рэгіёнах, як гэтая галіна перажывае наступствы каронавіруса ды жніўня 2020-га, а таксама самыя апошнія трэнды падкаст “Глыбінны народ” пагаманіў з экскурсаводам, лепшым гідам Беларусі 2018 года ды спецыялістам па турызме Яўгенам Апанасевічам.

У чарговым выпуску падкаст “Глыбінны народ” рушыць у нашае мінулае - такое далёкае і блізкае адначасова ў відзе гісторыка-культурнай спадчыны.

Ці можна яшчэ нешта выратаваць у рэгіёнах і як гэта зрабіць, адкуль узяць на гэта грошы, якіх вечна няма, ці ўсе аб’екты мы ведаем і як іх аднаўляць? А таксама вечнае пытанне: у якія непапсовыя мясціны завітаць у якасці турыста?

Разбіраемся з гэтым ды іншымі пытаннямі з гісторыкам,экскурсаводам ды сябрам праўлення ГА "Беларускі камітэт ICOMOS" Цімохам Акудовічам.

Падкаст “Глыбінны народ” распачынае другі сезон і ў першым выпуску разбірае пытанні абароназдольнасці Беларусі.

Прызыўная або кантрактная, гульні з мігрантамі на мяжы, вечны выбар — Расія або НАТА, чые салдаты мацнейшыя — пра беларускую армію, і да яе існуе багата пытанняў.

Ваенны эксперт Ягор Лебядок дапамог нам разабрацца ў перавагах, заганах ды шляхах рэфармавання беларускага войска, а таксама распавёў пра тое, чаму хлопцы з рэгіёнаў у перыяд службы пачуваюцца лепш за "гарадскіх".