Prát, innsløg og tónleikur.

Í gjár kundi Tórshavnar Bátafelag hátíðarhalda 25 ára stovningardag, og í dag er felagið eitt sunt og gott felag við nógvum virksemi, ið gagnar bæði limum og umhvørvinum kring húsið hjá felagnum, sum liggur á Bryggjubakka í Havn. Hetta eru teir tríggir Debes Danberg, Jógvan Bæk og Odd Bjellvåg samdir um. Teir eru allir í nevndini í felagnum og gera nú klárt til at hátíðarhalda stovningardagin við einari veitslu í næsta mánað.

Hanus Kjølbro, veðurfrøðingur á Veðurstovu Føroya var gestur í serfrøðingatáttinum. Evnið var veður - serliga um vind og hvirlur, men eisini svaraði Hanus upp á spurningar frá forvitnum lurtarum.

Spurningar vóru um alt frá, hvussu miðalvindur verður roknaður, hvar í Føroyum tað er serliga ábært og hví tað er trupult at gera veðurforsøgnir í Føroyum.

Gestir hesaferð:

Hanus Kjølbro

Durita Kastalag

Iben Faaborg

Jegvan Bæk

Debes Danberg

Odd Bjellvåg

Andrias Klein Gregoriussen

Ætlanin hjá Jens Jákupi Hansen at røkka hægsta fjall í Afrika og síðani Suðuramerika, hevur verið nógv umrødd.

Nú er fyrsti partur avgreiddur, tí Jens Jákup hevur, saman við ferðafelaga sínum, Gunduri Mortensen, vunnið á Kilimanjaro.

- Hetta var ein nógv lættari túrur, enn eg hevði væntað, sigur Jens Jákup Hansen.

At ganga um allar Vágar var størri avbjóðing, leggur hann aftrat. Kortini var ferðin lærurík.

Her sæst video frá síðstu náttini.

Í sendingini eru Andrias Klein Gregoriussen, Marjun Niclasen, Tóri Højgaard, Jens Jákup Hansen

Tað er ein sannroynd, at nógvir barnagarðar og skúlar brúka Facebook, tá myndir verða lagdar. Tað er ikki besta loysnin.

Frægari var, um annar pallur bleiv brúktur til endamálið, sigur Tóri Højgaard, stjóri á Dátueftirlitinum.

Gestir í sendingini eru Andrias Klein Gregoriussen, Helena F. Jørmundsson, Anita Hentze Hardlei, Bogi Krossteig

Á Altjóða Down Syndrom-degnum, sum er 21. mars, verður hesa ferð skipað fyri einum øðrvísi tiltaki. Tað eru nøkur foreldur, sum hava sett sær fyri at gera eina stóra myndarøð.

Helena F. Jørmundsson og Anita Hentze Hardlei, ið báðar eru mammur at børnum við Down syndromi, vísa á, at umleið 40 fólk í Føroyum hava Down syndrom.

Hetta er tó bara ein kvalifiserað meting, tí eingin teljing er gjørd.

Tær vóna, at so nógv sum gjørligt koma við í myndarøðina.

Russiski trolarin, Olshana, sakk við Flesjarnar 3. august í 2007. Nú verður arbeitt við at gera ein dokumentar um at kava niður til vrakið.

Tað gingu heili 13 ár, frá tí at Olshana sakk, til kavarar fóru niður. Bogi Krossteig var sjálvur millum teir fyrstu.

Hann minnist løtuna, á 47 metra dýpi, tá masturin brádliga kom undan, og teir vistu, at teir vóru á rættari leið. 

Olshana er á umleið 78 metra dýpi. Trolarin líkist sær sjálvum og er ógvuliga áhugaverdur at vitja, heldur Bogi Krossteig.