Lovisa Petersen Glerfoss setti sær eitt heldur øðrvísi nýggjárslyfti við ársbyrjan í fjør, sum nú er borið á mál. Hon byrjaði 1. januar í 2019 at hekla eitt teppi, eitt umfar um dagin, har hitastigini í Sandavági klokkan tvey hvønn dag avgjørdu litin.

Annað jólakvøld og nýggjárskvøld sendi Kringvarpið stuttrøðina 'Valið um virðini'. Ein sending, har vit fylgdu Jørgeni Niclasen og Akseli V. Johannesen í døgunum upp undir valið.

Tvey lið frá kringvarpinum fylgdu hvør sínum floksformanni seinastu dagarnar fyri valið. Ein fotografur, ein ljóðmaður og ein reportari var á hvørjum liðinum.

Tá í samanum kom vóru áleið hundrað tímar av upptøkum komnar til høldar. Hetta kravdi nógv av toyminum handan sendingina at seta saman.

Gestir í sendingini:

Karl Vidtfeldt, Heri Andreasen, Jens Christian Olsen, Eyðun M. Thomsen, Uni L. Hansen, Jens Jákup Hansen, Jógvan Arge og Símun Christian Olsen.

Hoyr Jógvan Arge lýta aftur á árini sum útvarpsmaður.

Sandoyar ítróttarfelag B71 helt hálvtrýss ára føðingardag nýggjársdag.

Í samband við hátíðarhaldið varð ein minnispláta avdúkað. Minnisplátan er av fyrstvaldu nevnd felagsins og harvið stovnarunum av B71 afturi í 1970.

Millum annað fekk B71 50.000 krónur í gávu frá Sands Kommunu.

Gestir í sendingini: Jóhanna á Tjaldrafløtti, Turið Nolsøe og Elin Henriksen.

Nú eitt nýtt ár er byrjað, eru mong, sum hava sett sær fyri at tapa seg.

Jóhanna á Tjaldrafløtti er kostráðgevi og stjóri á Húsarhaldsskúla Føroya. Í 23 ár hava tey á húsarhaldsskúlanum havt eitt lívsstílsskeið.

Tá tað kemur til at lætna, so sigur Jóhanna, at mann fyrst og fremst skal spyrja seg sjálvan, hví mann ynskir at lætna nøkur kilo. Síðani er tað umráðandi at finna útav hvørjar broytingar í dagligdegnum skulu til, fyri at mann kann lætna nøkur kilo.

Bárður á Steig Nielsen, løgmaður, helt gamlaárskvøld sína fyrstu nýggjársøðu. Røðan byggir í stóran mun á føroyska felagsskapin og gerandishetjur.

Ein nýggjársøða skal savna fólkið, og hon skal ikki verða ov politiskt. Tó helt Turið Nolsøe millum annað, at røðan til tíðir var ov trygg og lítið sigandi.

Súsanna Krossteig Hansen, vanliga nevnd Ussa, hevur síðan hon var ung genta verið tilknýtt hondbóltsfelagnum, Kyndli.

Serliga hevur hon brúkt óteljandi tímar til sjálvboðið arbeiði til gagns fyri felagið.

- Tað hevur alstóran týdning at fólk knýtt at feløgum kring landið hjálpa til, uttan at fáa nakað afturfyri, tí tað ber slett ikki til uttan, sigur Ussa.

Hondbólturin fyllir nógv í heiminum hjá Ussu. Báðar døtrarnar spæla við bestu deildini hjá Kyndli og eru á kvinnulandsliðnum, umframt at maður hennara, Andreas, er venjari hjá KÍF.

Nýggjársaftan sita mong fólk framman fyri skíggjanum og síggja nýggjársrøðurnar frá drotningini og løgmanni.

Nýggjársdag er aftur ein møguleiki at uppliva eina nýggjársrøðu, tí tá skal Sjúrður Skaale halda eina heldur øðrvísi røðu á DR2.

Sjúrður vil ikki avdúka alt ov nógv um innihaldið, men hann sigur, at hann tekur upprunastøði í ævintýrarinum Sigert Patursson.

Nýggjársrøðan hjá Sjúrði Skaale kann upplivast í sendingini Deadline á DR2 1. januar klokkan 21:30 føroyska tíð.