Hvat eyðkennir tað góða parlagið, og hví er umráðandi, at pør geva rúm fyri hvørjumøðrum, samstundis sum parlagið verður raðfest?

Hetta var nakað av tí, sum Margret Mortensen, psykoterapeutur og parterapeutur, tosaði um, tá hon vitjaði í morgunsendingini. Eisini svaraði hon spurningum frá lurtarum.

Luttakarar: Petur Hans Dahl, Anna Louisa Gaard, Tóki Berg Mikkelsen, Eyðbjørg Abrahamsen og Alberg Abrahamsen.

Hoyr sendingina her.

Hjúnini Eyðbjørg og Albert Abrahamsen hava í 12 ár stuðlað eini gentu í Senegal, og herfyri hendi tað serstaka, at Albert fekk høvið at hitta gentuna, sum nú er 15 ára gomul.

Eyðbjørg og Albert Abrahamsen siga, at tey ofta hava hugsað um gentuna og hennara umstøður.

Albert minnist, at hann alt fyri eitt kendi gentuna aftur, tá tey hittust á skúlanum. Tey hava javnan fingið myndir sendandi úr Senegal.

Hon kendi kortini ikki hann, og gentan var ógvuliga smæðin í fyrstuni.

Tey vóru saman einar fimm tímar henda dagin, og sum tíðin gekk, hvarv smædni.

Tá hon var tannáringur, sang Anna Louisa Gaard, sum er uppvaksin í Skálafirði, í bólki.

Nakað eftir fóru limirnir hvør til sítt, og hon legði tónleikin á hillina fyribils.

Árini eftir var tað annað enn tónleikurin, ið fór við orkuni.

Anna Louisa Gaard bleiv mamma fyrstu ferð, tá hon var 20, og hon átti fjórða barnið, tá hon var 27.

Um somu tíð tók hon HF og bleiv Bachelor í sjúkrarøktarfrøði.

31 ára gomul fekk hon gittar í føðingardagsgávu frá manni sínum.

Hon lærdi seg at spæla, og hevur nú eisini skrivað fleiri sangir.

Seinasta hálva árið hevur 25 ára gamli Tóki Berg Mikkelsen úr Havn havt eitt heldur øðrvísi starv.

Hann er seyðahundavenjari í Wales og venur hundar, sum eitt nú luttaka í stórum, altjóða seyðahundakappingum. Onkrir av hundunum, hann venur, verða eisini seldir til Føroya.

- Mín avbjóðing sum seyðahundavenjari er at blíva vinurin hjá hundinum so skjótt sum til ber, tí hundurin arbeiðir betur og vil arbeiða fyri teg, um hann følir, at tit eru vinir, greiðir Tóki Berg Mikkelsen frá.

Luttakarar: Pól Arni Holm, Kristiaan Joensen, Kristina Bærentsen, Elin Henriksen

Oftari og oftari síggjast orðingar sum stovnarin av, eigarin av og brúkarin av heldur enn tey, sum stovna, eiga ella brúka.

Føroyskt er eitt mál, har vit brúka nógv sagnorð, meðan til dømis danskt og týskt eru mál við nógvum navnorðum.

- Tað sæst ofta aftur í týddum tekstum, at vit orða okkum knortlut, tí vit týða útlendsk navnorð til føroyskt heldur enn at skriva tey um til sagnorð, sigur Elin Henriksen, málkøn.

Í hesum samanhanginum tosa vit eisini um orðini, begribelighed, håndtbarhed og meningsfuldhed, tí hvussu skulu vit siga hetta á føroyskum, spyr lurtari.

Kristina Bærendsen minnist, at hon í fyrstu atløgu als ikki hevði hug at syngja í íslendska eurovision-umfarinum,.

Tað var Sveinn Runar Sigurdsson, í Íslandi bara nevndur Dr. Eurovision, ið hevði skrivað sangin Mama Said.

Hann hevði leingi leitað eftir røttu røddini at bera sangin fram.

Tað var ikki fyrr enn hann hoyrdi Kristinu Bærendsen, at hann var sannførdur um, at hann hevði funnið rætta sangaran.

Kristina Bærendsen játtaði loksins at syngja Mama Said, men hon leggur dent á, at hon persónliga ikki var í einum góðum staði í lívinum.

Fólkakæri John Mogensen var hittsangari av teimum heilt stóru. Hann útgav bestseljandi plátur, og sangirnir liva væl nú 40 ár eftir, at John Mogensen doyði alt ov ungur í 1977.

Danski sjónleikarin, Rasmus Bjerg, spældi John Mogensen í filminum Så længe jeg lever. Síðani hevur Rasmus Bjerg framført sum John Mogensen á festivalum og konsertum. Og leygarkvøldið fer hann á pall í Føroyum.

Í morgunsendingini greiddi Rasmus Bjerg millum annað frá, hvussu hann hevur fyrireikað seg til at syngja og upptraðka, sum John Mogensen.

Luttakarar: Christina Ravnsfjall, Bjarni Johansen, Jógvan D. Hansen og Ragnheiður Bogadóttir, Mikael Thomsen, Rasmus Bjerg og Armgarð Arge