Guitar Islancio fagnar sínu 20. Starfsári með tónleikum í Bæjarbíói í Hafnarfirði annað kvöld. Á tónleikunum munu Guitar Islancio og gestir þeirra leika lög sem spanna þeirra 20 ára starfsferil. Þeir Björn Thoroddsen og Jón Rafnson komu með hljóðfærin ásamt Richard Gillis trompetleikara frá Kanada í þáttinn og spiluðu í beinni útsendingu. Þeir voru föstudagsgestir Mannlega þáttarins í þetta sinn.

Óperudagar standa yfir og um helgina verður sennilega sett Íslandsmet í fjölda óperusýninga á einni helgi þegar 8 óperusýningar af 6 mismunandi stykkjum verða fluttar og yfir 100 manns taka þátt í 30 mismunandi viðburðum. Guja Sandholt og Hrafnhildur Árnadóttir Hafstað söngkona komu í þáttinn og sögðu frá þessu stóra verkefni en meginmarkmið þess er að efla starfsvettvang klassískra söngvara á Íslandi.

Svo kom Sigurlaug Margrét Jónasdóttir, besti vinur bragðlaukanna, til okkar með sitt vikulega matarspjall. Í þetta sinn sagði hún frá mat sem hlýjar, eins og t.d. hjörtu, enda ekki vanþörf á þegar farið er að kólna.

Umsjón Guðrún Gunnarsdóttir og Gunnar Hansson