Í dag var aftur þessi nýi liður í þættinum sem við köllum Sérfræðingurinn. Í síðustu viku svaraði Aldís Þorbjörg Ólafsdóttir kynlífsráðgjafi spurningum hlustenda og í dag kom til okkar Gunnar Svanbergsson sjúkraþjálfari. Við fengum sendar spurningar frá hlustendum og Gunnar gerði sitt besta til að svara þeim í þættinum.

Safnahús Borgarfjarðar stendur fyrir sýningu á ljósmyndum sem Helgi Bjarnason tók í Borgarnesi á fyrrihluta níunda áratugarins. Helgi var þá fréttaritari fyrir Morgunblaðið á staðnum. Á sýninguna hefur hann valið ljósmyndir af fólki og mannlífi í Borgarnesi, aðallega frá árunum 1981 til 1984. Það eru ekki eingöngu myndir sem birst hafa í Morgunblaðinu eða öðrum blöðum heldur ekki síður myndir sem ekki hentuðu til birtingar með fréttum. Á fjórða hundrað andlit sjást á þessum myndum og vísar yfirskrift sýningarinnar, 353 andlit, til þess. Helgi sagði frá myndunum og sýningunni í þættinum í dag.

Þúsundir Íslendinga á öllum aldri hafa notið þess að halda í göngur með Háskóla Íslands og Ferðafélagi Íslands undanfarin ár og þegið fróðleik í fararnesti frá vísindamönnum og sérfræðingum Háskólans. Og í dag kl.18 er hægt að sjá pöddur í návígi í Elliðaárdalnum. Skordýr eru fjölbreyttasti flokkur dýra á jörðinni og á Íslandi hefur skordýrum fjölgað undanfarin ár af ýmsum ástæðum. Gísli Már Gíslason, skordýrasérfræðingur frá Háskóla Íslands mun fræða fólk um heim skordýranna, við hringdum í hann í þættinum.

UMSJÓN GUÐRÚN GUNNARSDÓTTIR OG GUNNAR HANSSON