Sennilega hefur handþvottur aldrei verið mikilvægari en þessi misserin. Við rannsóknir og athuganir áður en Covid 19 kom til skjalanna, hefur komið fram að almennt virðist fólk ekki þvo sér nægilega oft né nægilega vel um hendurnar. Handþvottur er mikilvægasta sýkingavörnin sem hægt er að viðhafa því snerting, bein og óbein, er lang algengasta smitleið sýkla milli manna. Og nú virðist vera að sýkingum almennt virðist fækka þegar fólk er að þvo sér betur um hendur en nokkru sinni áður og spritta. Ása Steinunn Atladóttir hjúkrunarfræðingur og verkefnisstjóri á sóttvarnasviði Embættis landlæknis kom í þáttinn.

Stjórn ME félags Íslands hefur lýst yfir áhyggjum vegna mögulegrar aukningar á ME sjúkdómnum í kjölfarCOVID-19 faraldursins, en helstu áhættuþættir fyrir ME eru slæmar veirusýkingar. Alþjóðlegur vitundarvakningardagur ME sjúklinga er í dag og því fengum við Guðrúnu Sæmundsdóttur formann ME félags Íslands til að koma í þáttinn og segja okkur frekar frá deginum og ME.

Kristín Einarsdóttir steig á bak glænýju reiðhjóli og hjólaði sem leið lá yfir Bjarnarfjarðarhálsinn til að heimsækja Vigdísi Esradóttur sem rekur hótel Laugarhól. Þær spjölluðu vítt og breitt um gistimöguleika á Ströndum, afþreyingu, gönguleiðir og fleira.

UMSJÓN GUÐRÚN GUNNARSDÓTTIR OG GUNNAR HANSSON