Heimildarmynd um Ómar Ragnarsson og hans baráttu gegn virkjunarframkvæmdum við Kárahnjúka verður sýnd á RÚV í kvöld, en í dag er dagur íslenskrar náttúru og einnig áttræðisafmælisdagur Ómars Ragnarssonar. Myndin sýnir hugsjónamanninn Ómar fara í útsýnisferðir með fólk yfir það svæði sem fór undir virkjunina. Hann flaug m.a. með hluta ríkisstjórnarinnar og fleira fólk. Ómar kom í þáttinn ásamt Sigurði Grímssyni, öðrum höfundi myndarinnar.

Anna Halldórsdóttir tónlistarkona er gestur Sagnakaffis í kvöld í Gerðubergi og ætlar að segja sögur í tali og tónum. Anna lét að sér kveða á tíunda áratugnum þegar hún hlaut íslensku tónlistarverðlaunin fyrir Villta morgna sem besti nýliðinn í tónlist og var valin að hita upp fyrir tónlistarmanninn Sting þegar hann heimsótti Ísland árið 1997. Hún hefur sent frá sér þrjár hljómplötur með eigin tónlist, Villtir morgnar, Undravefurinn og Here. Anna bjó og starfaði í New York í 15 ár og vann þar að tónlist, hljóðmynd fyrir kvikmyndir og heimildamyndir og margt annað. Anna kom í þáttinn í dag.

Umsjón: GUÐRÚN GUNNARSDÓTTIR OG GUNNAR HANSSON