Hello VOA - វីអូអេ podcast - Page 51

February 03, 2020 Hello VOA ស្រ្តីនិងភាពជាអ្នកដឹកនាំ៖ ការពង្រឹងអំណាចដល់ស្រ្តីជាគន្លឹះជួយបញ្ចប់ភាពក្រីក្រ - កុម្ភៈ 04, 2020

អ្នកស្រី ងន់ វ៉ាន់ថា ស្ថាបនិកសហគ្រាសសូត្រពណ៌កម្ពុជាឬ Color Silk Cambodia បានថ្លែងថានៅពេលស្រ្តីមានភាពឯករាជ្យទាំងក្នុងផ្នែកហិរញ្ញវត្ថុនិងការសម្រេចចិត្តនោះ វានឹងជួយពង្រឹងស្ថានភាពគ្រួសាររបស់ពួកគេឲ្យមានភាពរីកចម្រើន មានលទ្ធភាពទទួលបានសេវាសុខាភិបាលល្អប្រសើរ មានការរស់នៅសមរម្យ មានលទ្ធភាពបញ្ជូនកូនទៅសាលារៀន និងមានលទ្ធភាពដឹកនាំក្រុមគ្រួសារប្រកបដោយសុខមាលភាព៕ (អ្នកស្រី ស៊ូ ពេជ្រចិន្តា, Hello VOA ស្ត្រីនិងភាពជាអ្នកដឹកនាំ វ៉ាស៊ីនតោន ថ្ងៃទី៣ ខែកុម្ភៈ ឆ្នាំ ២០២០)

29 min

January 31, 2020 Hello VOA ពិសេស៖ លោក ត្រាំ ទំនងជារក្សាតំណែងបាន តែប៉ះពាល់សំឡេងឆ្នោតរើសប្រធានាធិបតី អាមេរិកខែវិច្ឆិកា - កុម្ភៈ 01, 2020

សវនាការនៅព្រឹទ្ធសភាទំនងជាមិនអាចរកសំឡេងបានគ្រប់គ្រាន់ដើម្បីកោះហៅ សាក្សីសំខាន់ៗមកបំភ្លឺ និងមិនអាចរកសំឡេង២ភាគ៣ ឬ ៦៧រូប ដើម្បីដកហូត តំណែងលោកប្រធានាធិបតី ដូណាល់ ត្រាំបានទេ ដោយសារថា ក្រុមព្រឹទ្ធសភា គណបក្សសាធារណរដ្ឋរបស់លោក ត្រាំចំនួន៥៣រូប ក្នុងចំណោម១០០រូបមិនគាំទ្រ។ តែពលរដ្ឋខ្មែរអាមេរិកាំងខ្លះបាននិយាយថា កិត្តិយសលោក ត្រាំ និងគោលនយោបាយការបរទេសអាមេរិកពេលនេះ មានការប៉ះទង្គិចខ្លាំង ដោយសារការបង្ហាញឲ្យឃើញពីទោសកំហុសរឿងរំលោភអំណាច និងពាក់ព័ន្ធនឹងបទចោទប្រកាន់រឿងអាស្រូវជាមួយបរទេសក្នុងសវនាការនៅព្រឹទ្ធសភាអាមេរិកនេះ។ រឿងទាំងនេះទំនងជាធ្វើឲ្យពលរដ្ឋអាមេរិកាំងត្រូវពិចារណា នៅពេលបោះឆ្នោតជ្រើសរើស ប្រធានាធិបតីនៅខែវិច្ឆិកាខាងមុខ ថាតើត្រូវសម្រេចឲ្យលោក ត្រាំ កាន់តំណែងក្នុង អាណត្តិទី២ចុងក្រោយ ឬ ក៏ត្រូវផ្លាស់ប្តូរ។ នេះបើតាមការអះអាងរបស់លោកទឹង យ័ប ប្រធានអង្គការខ្មែរអាមេរិកាំងដើម្បីសិទ្ធិមនុស្សនិងប្រជាធិបតេយ្យ (CAHRAD) ក្នុងរដ្ឋវីជីនៀ (Virginia) និង លោក គុជ ច័ន្ទលី អ្នកវិភាគក្នុងរដ្ឋម៉ារីលែន (Maryland)៕ (លោក សុខ ខេមរា, Hello VOA ពិសេស, វ៉ាស៊ីនតោន, ៣១ មករា ២០២០)

31 min

January 30, 2020 Hello VOA៖ មន្ត្រីសិទ្ធិមនុស្សថាសំណុំរឿងលោកកឹម សុខា គួរដោះស្រាយតាមនយោបាយដើម្បីរក្សា EBA - មករា 31, 2020

ការចោទប្រកាន់លោក កឹម សុខា ប្រធានគណបក្សជំទាស់ដែលត្រូវរំលាយពីបទសន្ទិដ្ឋិភាពជាមួយបរទេស ឬ ក្បត់ជាតិ ត្រូវអង្គការអន្តរជាតិនិងប្រទេសមួយចំនួនគិតថាជារឿងនយោបាយ។ មន្ត្រីសិទ្ធិមនុស្សបានលើកឡើងថា រឿងលោកកឹម សុខា នេះគួរអ្នកនយោបាយដោះស្រាយគ្នា ដើម្បីកុំឲ្យបាត់បង់ប្រព័ន្ធអនុគ្រោះពន្ធ EBA ដែលសហភាពអឺរ៉ុបនឹងសម្រេចនៅថ្ងៃទី១២ ខែកុម្ភៈ ថាព្យួរឬមិនព្យួរ ដោយសារបញ្ហាប្រជាធិបតេយ្យនិងសិទ្ធិមនុស្សកម្ពុជា។ នេះបើតាមការអះអាងរបស់លោក អំ សំអាត អនុប្រធានអង្គការឃ្លាំមើលសិទ្ធិមនុស្ស លីកាដូ។ លោកថា ប្រព័ន្ធអនុគ្រោះពន្ធ EBA ជារឿងសំខាន់សម្រាប់កម្មករជាង៦០ម៉ឺននាក់ និងពលរដ្ឋកម្ពុជាជាច្រើនលាននាក់៕ (លោកសុខ ខេមរា, Hello VOA, វ៉ាស៊ីនតោន, ៣០ មករា ២០២០)

25 min

January 28, 2020 Hello VOA៖ អ្នកឯកទេសស្នើឱ្យមានតម្លាភាពក្នុងសវនាការលោកកឹម សុខា - មករា 29, 2020

លោកឱក សេរីសោភក្តិ៍ អ្នកឯកទេសផ្នែកអភិបាលកិច្ចល្អ ស្នើឱ្យតុលាការរាជធានីភ្នំពេញបើកឱ្យពលរដ្ឋនិងអ្នកសារព័ត៌មានទទួលបានព័ត៌មានពេញលេញពីសវនាការកាត់ក្តីលោកកឹម សុខា ប្រធានគណបក្សសង្គ្រោះជាតិ ពីបទក្បត់ជាតិដើម្បីឱ្យមានភាពយុត្តិធម៌និងពង្រឹងគោលការណ៍«តម្លាភាព‍»។ ការស្នើឡើងនេះបានធ្វើឡើង ក្រោយពីតុលាការបានរឹតត្បិតអ្នកសារព័ត៌មាននិងអង្គការសង្គមស៊ីវិលមួយចំនួន មិនឱ្យចូលរួមយកព័ត៌មាននិងសង្កេតការណ៍ដោយផ្ទាល់។ (លោកម៉ែន គឹមសេង, Hello VOA, វ៉ាស៊ីនតោន, ២៧ មករា ២០២០)

26 min

January 23, 2020 Hello VOA៖ អ្នកស្រីមូរ សុខហួរ ជំរុញលើកកម្ពស់សិទ្ធិសហជីពកម្មករសំណង់ - មករា 24, 2020

អតីតបក្សប្រឆាំងនៅកម្ពុជា យល់ថា សហជីពខាងផ្នែកសំណង់គួរតែមានសិទ្ធិធំជាងមុន ដើម្បីការពារផលប្រយោជន៍កម្មករក្នុងពេលដែលពួកគេប្រឈមនឹងកង្វះសុវត្ថិភាពកាន់តែខ្លាំង ខណៈពេលដែលវិស័យសំណង់កាន់តែរីកដុះដាល ជាពិសេសក្រោយពីការបាក់សំណង់ថ្មីពីរកន្លែង ដែលមានពលរដ្ឋកម្ពុជាជាង១០០នាក់ស្លាប់ និងរបួស។ អ្នកស្រីមូរ សុខហួរ អនុប្រធានគណបក្សសង្គ្រោះជាតិ បានបញ្ជាក់ក្នុងកម្មវិធី Hello VOA ថា កូនៗរបស់កម្មករសំណង់ទាំងនោះក៏រងផលប៉ះពាល់ខ្លាំងទាំងសុវត្ថិភាពនិងការសិក្សា ដែលបញ្ហាទាំងអស់នេះគឺរដ្ឋាភិបាលកម្ពុជានិងអ្នកតំណាងរាស្ត្រត្រូវយកចិត្តទុកដាក់៕ (លោកម៉ែន គឹមសេង, Hello VOA, វ៉ាស៊ីនតោន, ២៣ មករា ២០២០)

27 min

January 20, 2020 Hello VOA សំឡេងជំនាន់ថ្មី៖ ជីអាចម៍ជន្លេនជួយជីវភាពកសិករនិងបរិស្ថាន - មករា 20, 2020

«ជន្លេន»គឺគម្រោងកែប្រែកាកសំណល់សរីរាង្គ ឬកាកសំណល់សើម ឲ្យទៅជាអាចម៍ជន្លេន ដែលជាជីមានសារធាតុចិញ្ចឹមសម្រាប់កសិករប្រើប្រាស់លើដំណាំ ដើម្បីកាត់បន្ថយការប្រើប្រាស់ជីគីមី។ កញ្ញា សុខ សុធារតន៍ ស្ថាបនិក «ជន្លេន» ដែលជាគម្រោងកែប្រែកាកសំណល់សរីរាង្គទៅជាជីអាចម៍ជន្លេន លើកឡើងក្នុងកម្មវិធី Hello VOA សំឡេងជំនាន់ថ្មី កាលពីយប់ថ្ងៃច័ន្ទថា ការចិញ្ចឹមជន្លេនឲ្យស៊ីកាកសំណល់សរីរាង្គ អាចជួយការពារបរិស្ថាន និងធ្វើឲ្យជីវភាពកសិករប្រសើរឡើង។ (កាន់ វិច្ឆិកា, Hello VOA សំឡេងជំនាន់ថ្មី, ភ្នំពេញ, ២០ មករា ២០២០)

30 min

January 16, 2020 Hello VOA សុខភាព៖ ជំងឺមហារីកដោះ (ភាគទី២) វិធីព្យាបាលនិងការបង្ការ - មករា 17, 2020

អ្នកជំនាញវេជ្ជសាស្ត្រគឺ លោក តាំង តេកហុង វេជ្ជបណ្ឌិតខ្មែរនៅសហរដ្ឋអាមេរិក និងលោក ព្រាប ឡី វេជ្ជបណ្ឌិតខ្មែរនៅប្រទេសកម្ពុជាបានថ្លែងថា របៀបព្យាបាលជំងឺមហារីកដោះ គេត្រូវជ្រើសរើសតាមប្រភេទមហារីក ដំណាក់កាល កម្រិត ទំហំ និងតើកោសិកាមហារីកអាចប្រែប្រួលក្រោមអនុភាពអ័រម៉ូនឬក៏អត់។ អ្នកជំនាញណែនាំឲ្យស្ត្រីស្គាល់ចំណាំនិងយល់ច្បាស់ពីដោះរបស់ខ្លួនឯង ស្គាល់សុខភាពទូទៅរបស់ដោះ យល់ពីផលប្រយោជន៍ និងត្រូវស្ទាបដោះរកមហារីកខ្លួនឯងជាប្រចាំ ហើយប្រសិនបើដឹងថា មានសាច់ដុំ នោះត្រូវប្រញាប់ទៅជួបគ្រូពេទ្យជំនាញជាបន្ទាន់៕ (អ្នកស្រី ស៊ូ ពេជ្រចិន្តា, Hello VOA សុខភាព, វ៉ាស៊ីនតោន, ១៦ មករា ២០២០)

29 min

January 13, 2020 Hello VOA៖ សហជីពកម្មករថា អ្នកទទួលខុសត្រូវចំពោះហេតុការណ៍បាក់រលំអគារនៅតែជាអាថ៌កំបាំង - មករា 14, 2020

តំណាងសហជីពកម្មករក្នុងប្រទេសកម្ពុជាលើកឡើងថា ភាពស្រពិចស្រពិលចំពោះអ្នកទទួលខុសត្រូវ នៅតែមាននៅឡើយ ក្រោយពីមានហេតុការណ៍បាក់រលំអគារនៅខេត្តកែប កាលពីថ្ងៃទី៣ ខែមករា។ លោក សុខ គីន ប្រធានសហព័ន្ធសហជីពកម្មករសំណង់និងព្រៃឈើកម្ពុជា មានប្រសាសន៍នៅក្នុងកម្មវិធី Hello VOA កាលពីថ្ងៃច័ន្ទទី១៣ ខែមករា ឆ្នាំ២០២០ ថា៖ «‍មានបញ្ហាអាថ៌កំបាំងច្រើននៅក្នុងនោះ ដោយសារតែយើងពិនិត្យមើលទៅពាក់ព័ន្ធនឹងរឿងហ្នឹង ឃើញខាងមន្ទីរចុះត្រួតពិនិត្យមើលថា ការសាងសង់ហ្នឹង វាខុសបច្ចេកទេស ប៉ុន្តែមិនបានហាមឃាត់ជាបន្ទាន់ឬចាត់វិធានការណ៍ណាមួយទៅលើអ្នកសាងសង់ឬក្រុមហ៊ុនហ្នឹងទេ។ ឃើញហើយនៅតែបន្ត ដល់ពេលបញ្ហាកើតឡើង អត់ដឹងថាអ្នកណាទទួលខុសត្រូវ»។ អ្នកស្រី អ៊ូ ទេពផល្លីន ប្រធានសហព័ន្ធសហជីពកម្មករ ចំណីអាហារនិងសេវាកម្មកម្ពុជា ដែលជាវាគ្មិនម្នាក់ដែរ មានប្រសាសន៍ថា ៖ «‍គឺថាវប្បធម៌នៅស្រុកយើង មានតែទទួលត្រូវ តែមិនដែលមានទទួលខុស»៕ (សាយ មុន្នី, Hello VOA, វ៉ាស៊ីនតោន,១៣ មករា ២០២០)

31 min

January 09, 2020 Hello VOA៖ អ្នកជំនាញថាប្រទេសសាមីអាចទាមទារទ្រព្យរបស់បុគ្គលពុករលួយមកវិញបាន - មករា 10, 2020

អ្នកជំនាញខាងតម្លាភាពនិងអភិបាលកិច្ចក្នុងប្រទេសកម្ពុជា បានលើកឡើងថា ប្រទេសសាមីនៃជនដែលត្រូវបានរកឃើញថា បានប្រព្រឹត្តអំពើពុករលួយ អាចស្នើសុំឬសហការជាមួយប្រទេសដទៃ ដើម្បីទាមទារយកទ្រព្យសម្បត្តិរបស់ជននោះដែលស្ថិតនៅក្រៅប្រទេសមកវិញបាន។ លោក ប៉ិច ពិសី នាយកកម្មវិធីជាន់ខ្ពស់នៃអង្គការតម្លាភាពកម្ពុជាមានប្រសាសន៍នៅក្នុងកម្មវិធី Hello VOA កាលពីថ្ងៃព្រហស្បតិ៍ទី០៩ខែមករាឆ្នាំ២០២០ ដោយលើកយកឧទាហរណ៍ក្នុងប្រទេសម៉ាឡេស៊ីបច្ចុប្បន្នថា៖ «‍គឺលោក Jho Low គឺគាត់ជាប់ពាក់ព័ន្ធជាមួយនាយករដ្ឋមន្ត្រីម៉ាឡេស៊ី គឺគាត់មានទ្រព្យច្រើន នៅប្រទេសអឺរ៉ុបផង នៅចិនផង នៅសាំងហ្គាពួរផង នៅសហរដ្ឋអាមេរិកក៏មាន អញ្ចឹងបច្ចុប្បន្ននេះគឺរដ្ឋាភិបាលម៉ាឡេ ក្រោយពីលោកបណ្ឌិត Mahathir [Mohamad] គាត់បានឈ្នះឆ្នោតមក គឺគាត់បានព្យាយាមនៅក្នុងការចាប់ផ្ដើមនីតិវិធីនៃការយកទ្រព្យសម្បត្តិដែលត្រូវបានបាត់បង់តាមរយៈលោក Jho Lowហ្នឹង មកឱ្យប្រជាពលរដ្ឋម៉ាឡេវិញ»។ (សាយ មុន្នី, Hello VOA, វ៉ាស៊ីនតោន, ០៩ មករា ២០២០)

26 min

January 02, 2020 Hello VOA៖ ឆ្នាំវៀតណាមធ្វើប្រធានអាស៊ាននិងការត្រៀមខ្លួនរបស់កម្ពុជា - មករា 03, 2020

វៀតណាមដែលជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ និងជារដ្ឋភាគីក្នុងជម្លោះសមុទ្រចិនខាងត្បូងជាមួយនឹងចិនផង បាននិងកំពុងឡើងគ្រងតំណែងជាប្រធានឆ្លាស់វេនរបស់អាស៊ាន នៅឆ្នាំ២០២០នេះ។ ក្នុងឆ្នាំ២០២០ដែលវៀតណាមធ្វើប្រធានអាស៊ាននេះ តំបន់អាស៊ានខ្លួនឯងនិងសាកលលោកទាំងមូល កំពុងស្ថិតក្នុងស្ថានភាពតានតឹង ក្នុងសំណុំរឿងនិងរបៀបវារៈជាច្រើន ដែលការណ៍នេះនាំឱ្យឆ្នាំ២០២០ ជាឆ្នាំសាកល្បងថាមពលរបស់ប្លុកដែលមាន១០ប្រទេសនេះ ថា រឹងមាំកម្រិតណា ជាពិសេសជាមួយនឹងការដឹកនាំរបស់វៀតណាមតែម្ដង។ លោក ពុយ គា អ្នកឆ្លើយឆ្លងព័ត៌មានយូរឆ្នាំ ឱ្យទីភ្នាក់ងារព័ត៌មានជប៉ុនក្យូដូ ដែលបានតាមដានកិច្ចការអាស៊ានអស់២០ឆ្នាំមកហើយ បានអញ្ជើញមកចូលរួមជាវាគ្មិន ដើម្បីជជែកអំពីបញ្ហាខាងលើ ក្នុងកម្មវិធី Hello VOA កាលពីរាត្រីថ្ងៃទី០២ ខែមករា ឆ្នាំ២០២០។ (អូន ឆេងប៉រ, Hello VOA, ភ្នំពេញ, ២ មករា ២០២០)

32 min

Share Hello VOA - វីអូអេ

Sign up to save your podcasts

Hello VOA - វីអូអេ

Hello VOA - វីអូអេ episodes

About Hello VOA - វីអូអេ