Vera, hinsegin félag kvenna og kvára, sem var stofnað sumarið 2019, hefur verið vettvangur fyrir hinsegin konur og kvár til að hittast og skapa samfélag. Fyrsti viðburður félagsins er viðburðarröð á skemmtistaðnum Kiki á miðvikudögum í október og nóvember. Fyrsta skiptið var í síðustu viku og því verður annar viðburðurinn í kvöld. Við fengum þær Tinnu Haraldsdóttur og Ástrós Erlu Benediktsdóttur til að segja okkur betur frá þessu félagi og þessum viðburðum í þættinum.

Á ljóðakaffi sem fram fer í kaffhúsinu í Gerðubergi munu þær Linda Vilhjálmsdóttir og Sigurlaug Didda Jónsdóttir lesa ljóðin sín og segja sögur. Þær eiga það helst sameiginlegt að í ljóðum þeirra er viss uppreisnarandi, hugrekki og sjálfsskoðun. Ljóð þeirra eru ólík, en oft lituð af innsæi og visku sem lífsreynslan hefur fært þeim. Þær Linda og Didda komu í þáttinn í dag og sögðu frá ljóðum sínum og sögum.

Við fengum póstkort frá Magnúsi R. Einarssyni í dag. Það er kominn tími fyrir Magnús að kveðja Alicante og Spán, allavega í bil. Það var aðeins tvennt sem var leiðinlegt á þessum tveim og hálfa ári; útgöngubannið vegna kórónuveirunnar en það varði í rúma þrjá mánuði. Hitt var þegar Magnús var rændur af ungum hnífamönnum. Undir lokin segir hann af þeim heiðri og sóma sem helsta flamencolistamanni Spánverja er sýndur.

UMSJÓN GUÐRÚN GUNNARSDÓTTIR OG GUNNAR HANSSON