Sævar Helgi Bragason, eða Stjörnu Sævar, kom í þáttinn í dag. Hann sagði okkur frá því hvernig hægt var að finna út að víkingarnir hefðu vissulega farið til vesturheims út frá trjáhringjum og kolefnasamsetningu trjáa á austurströnd Norður Ameríku með tilliti til sólstorma fyrr á öldum. Svo hlustuðum við á hljóð sem hafa verið tekin upp nýlega á mars, en Sævar útskýrði fyrir okkur af hverju hljóð berst á annan hátt á mars en á jörðinni. Svo sagði Sævar Helgi frá nýju bókinni sinni um Sólkerfið, sem er nýkomin út.

Að elda fyrir einn, girnilegan, hollan, einfaldan og bragðgóðan mat af öllu tagi, þarf ekki að þýða eilífa afganga og sama matinn marga daga í röð. Það er ekkert mál að elda litla skammta en sífellt fleiri búa einir og þurfa á því að halda. Nanna Rögnvaldardóttir hefur gefið út enn eina matreiðslubókina, Borð fyrir einn, þar sem hún gefur uppskriftir af matnum sem hún ber á borð fyrir sig eina.

Við fengum svo póstkort frá Magnús R. Einarssyni í dag. Í póstkorti dagsins segir Magnús frá því að hann sé fluttur heim frá Spáni. Af því tilefni segir hann frá ýmsu sem honum þykir ólíkt með spænsku og íslensku þjóðinni, til að mynda umferðarmenningu, víðsýni, drykkjusiðum, matarneyslu og fleiru. Í lokin segir hann frá glæpunum í og við Torrevieja en það svæði er vinsælast meðal Íslendinga að heimsækja og til að búa á.

UMSJÓN GUÐRÚN GUNNARSDÓTTIR OG GUNNAR HANSSON