Is die bohaai oor aardverwarming nie 'n blote bangmaakstorie nie? Wat is die oorsprong van harde modderballe met 'n gat in die middel wat by Thabazimbi gevind is? Hoe identifiseer 'n mens 'n padda met 'n vreemde kwaakgeluid wat sy verskyning in 'n tuin in Johannesburg gemaak het?

Hoekom is daar temperatuurverskille tussen voorwerpe in dieselfde vertrek? Hoe kry sommige padda- en visspesies dit reg om tydens droogtes vir lang tye ondergronds te oorwinter? En wat word van al die rubberstof wat daagliks weens slytasie van motorbande af kom?

Hoe het reënmeters ontwikkel, en wat is die nut daarvan? Kan 'n mens elektrisiteit uit die kosmiese agtergrondstrale tap? Wie besluit watter diere moet as probleemdiere geklassifiseer word?

Wie het die atoomhorlosie uitgevind, en hoe werk dit? Hoekom het mense fobies, en wat veroorsaak dit? Bestaan klimaatsverandering werklik, of is dit 'n verdigsel?

Wie besluit watter plante is onkruid? Hoekom breek seuns se stemme en meisies s'n nie? Wat is dejà vu?

Hoe beland 'n visfossiel in 'n Sandklip-skeur in die omgewing van Bethlehem? Is dit moontlik dat 'n lewende padda binne in 'n rotsbal gevind kan word? Hoekom is 'n kameelperd se nek so lank, en hoevel nekwerwels het hy? En hoekom reageer kraaie aggressief teenoor 'n persoon wat bo-op die Hillbrowtoring werk?

Navigeer muskiete op klank, lig, velreuk of koolsuurgas? Hoekom sit watervoëls net op sekere damme? Kry 'n mens krappe langs die Weskus? En kan paddas van kleur verander en in bome klim?

Wat is die doel van die dun beentjie wat aan die agterkant van 'n hoenderboudjie aangetref word? Hoekom drom miere op die kabels van 'n elektriese heining saam? Is dit biologies moontlik vir 'n mens om binne sekondes slagtande te ontwikkel en weer net so vining te absorbeer?

Watter rol speel ligene in die ekostelsel? Hoekom neem dit langer om biltong in die koue droë wintermaande droog te kry, as in die die warm somermaande wanneer daar heelwat vog in die lug is? Wanneer 'n mens 'n beker koffie in die mikrogolfoond warm maak, hou dit dadelik op kook wanneer jy dit uithaal. Hoekom begin dit weer kook as jy dit 10 sekondes later met 'n teelepel roer?

Daar word deesdae baie gewag gemaak van die sogenaamde “wonderneut” wat 'n mens help om deur middel van diaree gewig te verloor. Is dit nie skadelik vir 'n mens se gesondheid nie? Hoekom kry 'n mens gestreepte en wit sywurms? En wat veroorsaak dat 'n groot verskeidenheid fungi vanjaar skielik hulle verskyning in 'n tuin in Centurion gemaak het?