Svavar Viðarsson fékk blóðtappa í heila og greindist fyrir um ári með hjartagalla og voru honum ekki gefnar miklar líkur á bata. Þannig fór hins vegar að Svavar náði fullum bata og eltir nú ástríðu sína í tónlist því í kjölfarið gaf hann út plötu með tónlist eftir sig. Svavar sagði okkur sögu sína af hremmingum síðasta árs og hvernig hann tók það jákvæða í lífinu út úr þeim.

Héðinn Sveinbjörnsson ber titilinn aðalhamingjustjóri og er meðlimur í samtökum sem kalla sig Chief Happiness Officers þar sem hann fór á námskeið árið 2019. Hann hefur verið að vinna í þessum málum síðan. Það er mikilvægt að starfsfólk upplifi hamingju á vinnustaðnum, finni tilgang og að það sé metið að verðleikum og samtökin vilja stuðla að þessu með sínu starfi og að svokallaður hamingjustjóri sé ávallt innan starfshópsins til að tryggja þetta. Núna er verið að safna gögnum um hamingju vinnandi fólks á alþjóðavísu og Héðinn vill að sem flestir Íslendingar taki þátt í henni til að hægt verði að bera saman niðurstöður annara þjóða. Við hringdum í Héðinn þar sem hann var í vinnunni á veitingastaðnum Bjargarsteini í Grundarfirði.

Elsa Katrín Ólafsdóttir ljósmyndari hefur sýnt undanfarið myndaröð sína, Afkomendur Borgarfjarðar, í Hafnarhúsinu Borgarfirði Eystri. Myndaröðin er nokkurskonar skrásetning á andlitum Borgfirðinga, en allir sem eiga ættir að rekja, eru búsettir eða hafa sterkar taugar til staðarins voru boðnir velkomnir í portrett myndatöku. Þátttakendur verkefnisins urðu rétt tæplega 200 sem fór fram úr vonum. Hugmyndin kviknaði hjá Elsu út frá myndaröð Jóhannesar Kjarvals, Hausarnir hans Kjarvals. Kjarval teiknaði þá andlitsmyndir af fullorðnum Borgfirðingum á þriðja áratug síðustu aldar. Við fengum Elsu til að segja okkur frekar frá þessu verkefni í þætti dagsins.

Tónlist í þættinum í dag:

Ástarkveðja (Frá Tjörninni að Öskjuhlíð) / Ingibjörg Þorbergs og Hljómsveit bandaríska flughersins (Ingibjörg Þorbergs og Þorsteinn Sveinsson)

Gömul sár / Svavar H. Viðarsson (Svavar Hafþór Viðarsson)

Hamingjan / Björgvin Halldórsson (Bob Merill og Þorsteinn Eggertsson)

Litla lagið / Sigrún Harðardóttir (Ómar Ragnarsson, Bennet, Orion, Welch, Marvin, Rostill)

UMSJÓN: GUÐRÚN GUNNARSDÓTTIR OG GUNNAR HANSSON