Ina perla or da noss archiv, registrada ils 18 da schaner 1986

Il 57avel inscunter da chapellas a Landquart ha stuì vegnir annullà er quest onn. Atgnamain è quai adina in dals eveniments impurtants en il chalender da la musica populara cun var 1'000 aspectaturas ed aspectaturs – e cun chapellas grischunas e da tut la Svizra che fan musica en il Forum im Ried a Landquart. Però, sco l'onn passà - er questa giada è stada la situaziun da corona memia difficila per far ina gronda sairada cun musica e divertiment.

Perquai preschentain nus in Artg cun ina registraziun da temps passads, ina perla da noss archiv, parts dal 22avel inscunter dals 18 da schaner dal 1986 en il Marsöl a Cuira ch'è sta blers onns il lieu per quel eveniment, l'emprima giada il 1965 sin iniziativa dal musicant e cumponist Hans Niederdorfer. Quella giada ha moderà ha Wysel Gyr, ina da las figuras impurtantas da la scena da la musica populara, surtut pervia da sia emissiun da televisiun «Für Stadt und Land». Vus udis chapellas e furmaziuns da num e da pum, grischunas, da tut la Svizra: las chapellas Grischuna, ils Schwyzerörgeli-Fründa Felsberg, ils Bündner Ländlerfründa e bleras autras.