Ils dis da festa, advent e Nadal, per bleras e blers il pli bel temp da l’onn. In temp privà, cun sias savurs che sveglian regurdientschas, cun chandailas e glischs – ed era cun chant e musica. Oz As vuless jau manar en il Tirol dal Sid, ina regiun cun ina gronda e vasta tradiziun da chant e musica per il temp d’advent. E nus faschain il congual cun nossa regiun nua che quai è auter.

Il pled «advent» sa basa sin il latin «adventus», e signifitga «arriv». Per ils cristians è l'advent il temp da l’aspectativa, il temp da preparaziun per l'arriv da Cristus, la notg da Nadal.

L'advent è er il temp da las fieras da Nadal, da la savur da vin chaud, da far biscuits, chantar chanzuns, il temp per sa regurdar: dal Nadal da l’uffanza. In advent senza glisch e chandailas, senza speranza e brama, giavischs e regurdientschas – quai è grev da s’imaginar.

Ina part impurtanta dals dis da festa: tradiziuns, chant e musica. Tar nus na datti betg uschè bleras, però en ina regiun vischina, en il Tirol dal Sid, exista ina cultura d’advent e Nadal fitg ritga: «L’artg musical» dad oz preschenta chant e musica dal Vnuost e d’autras valladas e nus discurrin da quellas tradiziuns fitg preschentas. Cun Gernot Niederfriniger da Mals, musicant, cumponist, dirigent e president ubain «Obmann» dal «Südtiroler Volksmusikverein» – e cun Reinhard Zangerle, chantadur e schurnalist da musica cun in’atgna emissiun tar la RAI dal Tirol da Sid: «Meine Volksmusik». E per vegnir a savair pertge che nossa tradiziun da chant e musica per l'advent n’è betg uschè gronda sun jau stà tar Hans-Peter Schreich, reverenda pensiunà ed enconuschider da l’istorgia e da la cultura da nossa regiun.