L'Artg musical per Tschuncaisma 2020 maina enavos la roda dal temp per 23 onns.

«Chants da la romantica per chor a capella» – sut quest titel han Ils Cantins gì concertà ils 7 da zercladur 1997 a Lai en la baselgia da San Carlo. Ils Cantins – la sedia da quest chor cun ses 60 giuvenils era a Mustér – surtut la scola claustrala. Ursin Defuns ha fundà quel il 1983. Ed el – l'Ursin è stà la bun'olma ed il bun spiert da quella furmaziun – ha manà, organisà e dirigì quella 20 onns a la lunga, fin il 2003.

Il program dals 7 da zercladur 1997 a Lai: i sa tracta d'in concert meditativ-sacral cun ovras per chor da l'epoca da la romantica, ovras da: Johannes Brahms, Felix Mendelssohn-Bartholdy, Anton Bruckner e dal cumponist da Vaduz, il mez-sursilvan Josef Gabriel Rheinberger (sia mamma è stada Maria Elisabeth Carigiet oriunda da Mustér) e da Giusep Huonder, da lezzas uras il cumponist-chasa dals Cantins.