«Vus stuais laschar crudar tut!». Quai di Helge Schneider sco tip per improvisar meglier en il podcast. Tuttina pacheteschan Marcus ed Elias or inqual istorgia da l'internet ed as laschan lura purtar da quellas tras l'episoda 16. Suenter 7 emnas dovra era IL podcast rumantsch anc temp per stgaudar.

ILS DUS DA NUS van en la pausa da stad. Vus pudais fin alura pachetar Vossas valischs cun las pli novas scuvertas or da l'astronomia, biologia e lingua rumantscha. Sch'era Vus avais mintgatant l'impressiun, che Vossas genitalias èn cusidas ensemen, tadlai l'episoda 15. Nus avain respostas.

Era tar ILS DUS DA NUS vai vers la stad. Quai celebrain nus cun schambun diabolic, soccas bletschas e chautschas sut en il tgil. Sajas da la partida per discutar questas piculezzas che fan sbavar da la gritta u quellas propostas che duain remplazzar «l'animal dal palc».

En noss auto da clowns hai plaz per tuts. Cusrins, savrinas e tut la «basdrinada». Elias raquinta si'istorgia d'in accident ch'el ha gì sin il palc, e Marcus raquinta da sia premiera sco barkeeper. Ed en las preferenzas persunalas faschain il mintgadi pli agreabel. Sfunsai dimena en l'episoda 13!

Quest'emna elavurainsa divers resuns e messagis da noss pievel e sfundrain in in'u tschella anecdota da temps passats. Elias ha mal il dies, Marcus patescha dad in nausch siemi e per na vegnir massa sentimentals tractainsa nossas insultas preferidas.

In'episoda pli frestga che paun-seghel: Elias è gist turnà d'in viadi da lavur e Marcus emprova da tegnair or il bler temp liber senza daventar in um vegl cinic. Co fissi d'avair pes movibels sco in schimpans e tge fageinsa, sche nus chattain or, sco che nus murin?

Tge èn stads ils avantatgs e dischavantatgs d'esser in giuvenil? Il spectrum è vast e cumpiglia lenergia infinita ch'ins ha da quel temp ma era situaziuns da ricla pervia ch'ins na riva betg da sortir da sia pel. Tge che resta dentant sut il stritg dals onns da «teenager» udis en l'episoda 10.

Il pli grond return quest onn dapi Pasca. ILS DUS DA NUS as beneventan puspè cun bratscha averta e discutan en l'episoda 9 detagls exclusivs davart l'inscunter musical da Linard Bardill e Kanye West.

L'atmosfera è sco avant las vacanzas da stad. La buna luna regna, ils spruhs vegnan ed il temp curra. L'episoda 8 marchescha l'ultima episoda da l'emprim bloc e tematisescha tranter auter quellas flosclas, retoricas u betg retoricas, che nagin dovra. Gizzai las ureglias!

Tar l'igiena na fa Elias betg cumpromiss. Saja quai sin tualettas u en nossa nova rubrica «la schelta». Tge chè ultra da quai anc crudà giu da la «planta da schleppas» quest'emna udis en l'episoda 7 dad ILS DUS DA NUS.