A actualidade do día en Tui e na comarca do Baixo Miño nos informativos da Radio Municipal de Tui. Agora podes escoitar de novo Noticias ás 13.30h con Javier Martínez e Beti Rey.

Dende 2011 celébrase a Emoción dos Viños un evento singular entorno aos viños galegos e portugueses principalmente que ata o de agora tiña lugar no claustro da Catedral de Tui e que este ano cambiar de emprazamento cara a Quinta de Santa Lúzia en Valença.

A cita será o sábado 2 e o domingo 3 de xullo coa participación de máis de 80 adegas e 300 viños. Así o explicaron Marina Cruces e Antonio Portela, organizadores do evento na presentación do mesmo esta mañá en Valença.

Do 25 ao 30 de xullo a Eurocidade Tui-Valença acollerá unha nova edición do IKFEM, o Festival Internacional de Instrumentos de Tecla. No mesmo destacados profesores nacionais e internacionais do panorama musical impartirán clases maxistrais de instrumentos de teclado. Tamén haberá novidades das que daba conta a directora do festival Andrea González. A matrícula está aberta ata o 10 de xullo. Máis información en www.ikfem.com

Informativo das 13.30 do martes, 21 de xuño, da Radio Municipal de Tui

Dende as 00:34 estamos xa, oficialmente no verán. Hoxe celebramos a xornada na que o sol brilla durante máis tempo no ceo e de aí, o San Xoán do próximo xoves cando xa as antigas tribos pagás tentaban darlle forza ao sol que, a partir de hoxe, irá perdendo a súa loita e reducindo o seu tempo de presenza.

Amais, por primeira vez en 68 anos, o solsticio de verán coincide con lúa chea e, en Tui, con ceos amplamente despexados que nos permitirán gozar da mesma dende o luscofusco preto das nove da noite.

O padeeiro do Kaiak Tudense José Luís Bouza retírase da competición ao máximo nivel, pero non deixa o piragüismo, deporte ao que seguirá ligado agora coma adestrador logo de que as lesións non o respectaran.

Dos 14 anos competindo a nivel nacional e internacional quédase sobre todo coas amizades. E amais salientaba a temporada de 2011 cos éxitos logrados tras operarse do hombreiro.

Informativo das 13.30 do luns 20 de xuño da Radio Municpal de Tui

Hoxe celébrase o día do refuxiado, pero pouco ou nada hai que celebrar. Europa vive a peor crise migratoria por mor dun conflito bélico dende a Segunda Guerra Mundial cun drama que afecta a milleiros de persoas, particularmente procedentes de Siria, que foxen da guerra do seu país.

cos refuxiados sirios foi con quen compartiu o seu camiño o fotógrafo vigués Adrian Irago quen durante os meses de setembro e outubro viaxou a Lesbos xunto co tamén galego Felipe Carnotto. O proxecto agora tradúcese na exposición “Exodus: na procura do refuxio”, con en torno a vinte fotografías en branco e negro que nos achegan a súa loita por fuxir do conflito bélico.

Continuamos o noso repaso polos institutos da comarca no que comprobamos cómo están a aplicar os cambios de oferta educativa coa aplicación da LOMCE en Bacharelato. Se no IES San Paio e no Indalecio Pérez Tizón restrinxiuse a oferta educativa, nomeadamente a materia de robótica, para evitar que o alumando virase na obriga de escoller obrigatoriamente relixión. Nos centros de Tomiño e A Sangriña da Guarda optaron por una solución diferente.

Mañá celebrarase en Tui o I Campionato Galego Integrador de Slalom no que participan de forma conxunta persoas con e sen discapacidade. A proba, organizado polo Club Sen Amarras, en colaboración coa Federación de Motonáutica e o Concello de Tui, foi presentada esta mañá na casa do concello da man da presidenta da asociación, Susana María Costa, os vogais Marcos Casaleiro e Pedro Nunes, o presidente da Federación Galega de Motonáutica, José Fernández, o concelleiro de Deportes, Laureano Alonso e o alcalde de Tui, Enrique Cabaleiro.