O zunir, o zuar, o zumbar… e o bruar. Na Guarda coñecen ben o significado de cada unha destas verbas pois soamente os que viven no e do mar coñéceno en toda a sua xenerosidade e tamén na súa severidade. Inspirándose precisamente no son do mar cando zorrega coas rochas da costa, o cantautor guardés Tino Baz presentará na noite de mañá venres o concerto “Cantares do Brueiro”.

O novo pavillón de deportes de Tui acolle este domingo dende ás 10.30 h o III Campionato Ibérico de Kung-Fu Eurocidade. Será moi dinámico e espectacular nas modalidades de KugFu Tradicional e Moderno e cunha exhibición de Tai-Chi.

Escoitamos a Carlos Alonso, presidente da Federación Galega de Kung-Fu, Aaron Blanco, responsable de Kung-Fu Moderno; Jose Antonio Parada, director do departamento de Tai-chi

e a Eduardo Méndez Sanjurjo, director do Campionato.

Este sábado dende ás 12.30h hora española celébrase o II Campionato de Judo Eurocidade no pavillón de deportes de Valença a presidenta do Judo Club Valença, Argentina Sousa, explicou que van participar 200 deportistas das categorías xuvenil e cadete. O adestrador do Judo Club Valença, Rui Ferreira, destacou a implantación que o judo está a ter.

Esta mañá presentouse no Rosal o documento resultado da segunda fase do proceso participativo de elaboración da estratexia de desenvolvemento local: as Liñas de actuación e o Plan de acción. Éste é o paso previo a ter o documento para a candidatura final, que recollerá a estratexia local que rexirá o proceso de financiación de proxectos nas convocatorias de fondos LEADER do programa 2014-2020. Así nolo explicou Marco García, técnico do GDR14

Esta mañá a Organización de Palangreiros Guardeses, ORPAGU, presentou en Ourense o libro “Peixe espada: pesca, composición química e valor nutricional” que trata polo miúdo as características técnicas do peixe espada. Con este manual, froito da colaboración coa Universidade de Vigo, ORPAGU busca crear sinerxias entre o mundo da pesca e o da universidade e a investigación.

Quedan soamente 5 días para que o 21 de xuño chegue o verán e porén hoxe aínda saímos da casa co paraugas preparados para a choiva. Acumulamos varios días de inestabilidade que nos fan temer o peor, pero atención porque as previsións son positivas. O fin de semana al altas presións chegarán a Galicia e segundo Meteogalicia, se todo vai como debería, a partir da tarde do sábado gozaremos de altas temperaturas e ceos plenamente despexados para poder comezar a desfrutar das praias e deixar atrás o branco invernal da nosa pel.

Hoxe visitounos un grupo de nenos e nenas da Galiña Azul de Tui cos que falamos... de todo un pouco. E con actuación musical incluída! O primeiro que aprendimos foi que teñen allos porros e o segundo, moi importante: non esquecerse de saudar a mamá e a papá.

Máis de 120 alumnos dos CEIP’s nº1, nº2 e de Pazos de Reis van participar na Aloiada 2016 que propiciará xornadas de convivencia entre os escolares con práctica deportiva en plena natureza. Aínda que inicialmente estaba prevista para este xoves e venres, ante a previsión de choiva, foi adiada para o próximo luns 20 e martes 21.

A novena edición da Aloiada foi presentada esta mañá na casa do concello. Escoitamos ao concelleiro de deportes, Laureano Alonso, o director do CEIP de Pazos de Reis, Manuel Fálquez, a directora do CEIP nº1, Cristina Novoa, o director do CEIP nº2 Luis Ruíz, e aos profesores de educación física, Fernando Domínguez, ,Alberto López e Beatriz González, así coma o alcalde de Tui, Enrique Cabaleiro,

A fotografía ten á capacidade de recoller un instante, un fragmento da vida, que queda inmortalizado para sempre e que nos permite non esquecer cando o tempo, que transcorre devagar pero sen pausa, aneboa a nosa memoria. Reunións familiares, encontros con amigos e viaxes son algunhas das circunstancias que requiren de nos para premer o botón da cámara fotográfica. Pos ben, aqueles que gocen dun bo álbum de fotografías de viaxes poderán participar no X Certame fotográfico “Viaxando” organizado polo Espazo Xove de Tui en colaboración coas OMIX de Salceda, A Guarda, O Rosal, Tomiño, Baiona, Gondomar e O Porriño.

Pero as fotografías tamén poden ser unha ferramenta de sensibilización e achegamento cultural. E esa é precisamente a premisa da terceira edición do concurso “Imaxes con Fondo” organizado polo fondo galego de cooperación e solidariedade e co que colabora o concello da Guarda.

este mediodía o conselleiro de Economía, Emprego e Industria, Francisco Conde, atópase visitando as instalacións de Utingal, en Tui, xunto co xerente Jesús González. Esta empresa, dedicada ao sector da aeronáutica e a automoción, recibiu a semana pasada o premio Idea Empresa 4.0.

Escoitamos primeiro a Jesús González, xerente de utingal, quen agradeceu a visita do conselleiro e despois a Francisco Conde, que resaltou a importancia do sector no futuro industrial de Galicia.