Esta tarde serán inauguradas as obras do Parque Infantil do Montiño en Rebordáns, logo de ser renovado completamente. No mesmo investiuse 26.494,86 euros do Plan de Obras e Servizos (POS) da Deputación de Pontevedra de 2015.

En concreto instalouse un novo firme con pavimento de seguridade e novos elementos de xogo.

Esta actuación súmase á realizada xa anteriormente no Parque Infantil do Penedo, segundo explicaba hoxe o alcalde de Tui, Enrique Cabaleiro.

Balance positivo da XX Feira de Artesanía de Tui celebrada esta fin de semana no conxunto histórico de Tui. O concelleiro de Turismo, Laureano Alonso, responsable este ano da organización, destacou as miles de persoas que pasaron na fin de semana pola feira, o nivel de vendas acadas e a repercusión positiva que tivo tamén na hostalería local.

A Plataforma da VAC Tui-A Guarda xunto coas AAVV Monte do Seo, a Asociación Cultural Seixos Albos e a Comunidade de Montes de Areas valoran positivamente o anuncio feito pola conselleira de Infraestruturas, Ethel Vázquez, sobre o tramo I da VAC e o acceso ao parque empresarial, coa próxima licitación en maio do proxecto construtivo, pero agardan que isto non quede so nunha promesa. Están contentos pero expectantes na execución das obras, tal e coma explicaba Marcos Gómez, membro da Plataforma de Afectados.

O alcalde de Tui, Enrique Cabaleiro, cualificou de boa nova o anuncio feito este mediodía pola conselleira de Infraestruturas, Ethel de Vázquez do investimento de 12 millóns de euros no Tramo I da VAC Tui-A Guarda. No seu parecer esta rectificación por parte da Xunta responde á presión exercida polos alcaldes e a mancomunidade do Baixo Miño, así como o malestar do veciños e do sector empresarial tras o desvío da partida de 3,6 millóns euros para o Corredor do Morrazo.

O alcalde de Tui tamén se referiu, no ámbito local, aos trámites que se están a seguir para a apertura da rúa Ourense.

A conselleira de Infraestruturas, Ethel Vázquez, anuncia investimento de 12 millóns de euros no Tramo I da VAC Tui-A Guarda incluíndo o acceso ao parque empresarial de Areas. No mes maio licitarán o proxecto construtivo para iniciar posteriormente o proceso expropiatorio e licitar as obras. Así o explicou en rolda de prensa este mediodía.

O próximo mes de maio comezarán a executarse unha serie de obras por parte da Confederación Hidrográfica do Miño-Sil nos ríos Louro, Miño, Tamuxe ou Tea, entre outros, afectados polos temporais de xaneiro e febreiro. Trátase da eliminación de tapóns de restos vexetais, restauración de marxes erosionadas e defensa das mesmas, rozas, retirada de acarreos, sedimentos e residuos, co obxectivo de restituír a capacidade de desaugadoiro das canles afectadas, cun investimento de case 400 mil euros. Así o explicou o presidente da CHMS, Francisco Marín.

Esta semana a conselleira de Infraestruturas anunciará unha serie de investimentos en infraestruturas na comarca do Baixo Miño. Así o explicou onte en Tui o vicepresidente da Xunta, Alfonso Rueda, que se reuniu na cidade cos representantes do PP en toda a comarca.

A Mancomunidade do Baixo Miño acordou na súa reunión de hoxe, por unanimidade, solicitar á Xunta que manteña o investimento na VAC Tui-A Guarda , e un calendario de actuacións neste vial. Amais trataron tamén o xeodestino Val Miño-Baixo Miño, e a promoción turística da comarca. Así o explicou Cristina Correa, presidenta da Mancomunidade do Baixo Miño, e alcaldesa de Oia.

O domingo 1 de maio celebrarase o I Trail Monte Aloia organizado pola Asociación Cultural Comisión Festas Virxe das Dores de Guillarei. Foi presentado esta mañá polo concelleiro de Deportes, Laureano Alonso, o presidente da Entidade Local Menor de Pazos de Reis, Enrique Perez, xunto a Rafael Estévez e José Villaverde, da asociación organizadora. Trátase dunha carreira a pé por montaña, sendeiros e con fortes desniveis. O trail consta de 25 quilómetros e 1.400 metros de desnivel, que sairá ás 9h dende a Macoca, e ominitrail de 15 quilómetros con 800 metros de desnivel e que sairá media hora máis tarde. Explicaban na presentación que transcorrer polo Parque Natural é un valor engadido, polo que nos próximos anos podería converterse en referente. Tamén deron conta de parte do percorrido.

Na Guarda está convocado mañá un pleno extraordinario e urxente para reclamar o mantemento da partida orzamentaria destinada á VAC Tui-A Guarda. O alcalde da Guarda, Antonio Lomba, cualificou esta infraestrutura de fundamental para a comarca, pero máis aínda para o seu municipio. Por iso propoñen mañá á corporación que se pronuncien sobre o tema.

No escrito consensuado solicitarán que se anule a modificación da partida, e reclaman que estableza plan de investimento e prazos para rematar esta vía.