O alcalde de Tui, Enrique Cabaleiro, sinalou hoxe na presentación de 8 fotografía antigas de Tui que dende o goberno local fíxase coma prioridade pór de relevancia o patrimonio histórico da cidade, sinalando que se trata dun elemento fundamental dentro da promoción turística da cidade. Apuntaba nese senso que o turismo é un dos elementos máis dinamizadores e que máis recursos externos aporta.

Parte do patrimonio histórico de Tui está reflectido en fotografías que amosan a cidade e as súas xentes ao longo da historia. Por este motivo o concello ven de editar oito láminas con fotografías de Juan Vila datadas entre os anos 50 e 60 que se poden ver na Oficina Municipal de Turismo. Así o explicaba o concelleiro de Turismo, Laureano Alonso. Esta é a primeira dunha serie de fotografías ás que se sumarán outras imaxes antigas do Entroido ou das Festas de San Telmo

O Concello de Tomiño pon en marcha o Circuíto Cultural 2016 dirixido a comisións e organizadores de festas. Este circuíto, aprobado o luns en Xunta Local de Goberno, lles permitirá acceder a un desconto na contratación de grupos de música tomiñeses.

Este circuíto cultural púxose en marcha en 2012, e o ano pasado presentáronse un centenar de solicitudes de axuda para a contratación de grupos locais. Así o explicaba á Radio Municipal de Tui a concelleira de Cultura de Tomiño, Cristina Martínez.

Esta mañá en Tomiño tivo lugar a presentación da programación formativa do Concello por parte da alcaldesa, Sandra González, e da concelleira de Mocidade, Fátima Rodríguez. Fátima Rodríguez, en declaracións á Radio Municipal de Tui, destacou a aposta por leva a cabo un plan integral para a formación que busca mellorar a calidade de vida e benestar social da mocidade. Ao longo do ano realizarase actividades formativas que parten das propias demandas da mocidade

Os interesados poden acadar máis información ou inscribirse en [email protected] ou por teléfono no 986 62 20 01.

A Plataforma de Emigrantes Retornados do Baixo Miño concentrouse hoxe na Praza de San Fernando, diante da delegación da Axencia Tributaria, en Tui para reclamar a mesma tributación que os xubilados que cotizaron en España os que o fixeron noutros países. Tamén demandan que se recoñezan as cualificacións de incapacidade doutros países, así coma a tributación para os herdeiros. Benito Alonso é o seu voceiro

A Organización de Palangreiros Guardeses (OR.PA.GU) desprazouse a Xapón para coñecer as distintas fases da pesqueira de palangre de superficie e os seus produtos. Durante catro días a delegación da organización, encabezada polo seu presidente, Joaquín Cadilla, percorreu distintos espazos de Tokio e da cidade de Kesennuma, onde mantiveron distintos encontros. Joaquín Cadilla, presidente de ORPAGU explicou á Radio Municipal de Tui os dous obxectivos principais que tivo esta viaxe.

Hoxe visitou o Concello de Tui, a Catedral e o Arquivo Diocesano a profesora da Universidade de Curtin, Australia, Anna Haebich, que está a facer unha investigación sobre a figura do Padre Rosendo Salvado e o seu labor pedagóxico en Nova Nursia a través da música. No encontro, Anna Haebich coñeceu algunhas anécdotas sobre a figura do polifacético bispo Salvado, xunto con documentos e cartas de Salvado, así coma o cartel que en 1945 conmemoraba os 100 anos da partida do bispo de Tui.

A presidenta da Deputación, Carmela Silva, ofreceu onte, na súa primeira visita institucional ao Rosal, a súa colaboración ao alcalde, Jesús Mª Fernández Portela, para apoiar ao Concello nos plans de futuro que ten en marcha. O alcalde Rosaleiro valorou positivamente esta visita pola boa disposición da presidenta provincial.

Así en materia de seguridade vial o alcalde destacou a senda peonil de Valdemiñotos, que está xa na terceira fase, quedando pendente un paso elevado.

Outra das solicitudes do Concello á Deputación foi a colaboración para convocar un concurso de ideas para tranformar íntegramente a Praza do Calvario

O Centro de Saúde de Oia inaugurarase o próximo mes de marzo. Así o avanzaba a alcaldesa de Oia, Cristina Correa., quen destacaba a importancia que este feito terá para o Concello.

Precisamente onte en Oia abordaron obras a acometer neste entorno, coma o muro que separará o colexio Mestre Manuel García de Oia do novo Centro de Saude. O fixeron nun encontro entre a alcaldesa Cristina Correa e o delegado territorial da Xunta en Pontevedra, José Manuel Cores Tourís, que analizaron o financiamento desta obra nunha reunión na que tamén estivo o xefe territorial de Educación, César Pérez Ares.

Realizar unha serie de reformas no Plan Xeral de Ordenación Municipal de Tui foi un dos puntos que estiveron onte sobre a mesa no encontro que en Santiago mantiveron o alcalde de Tui, Enrique Cabaleiro, e a secretaria xeral de Ordenación do Territorio e Urbanismo, Encarnación Rivas. Ao encontro asistiu tamén a concelleira de Urbanismo, Yolanda Rodríguez, e un técnico municipal.

En concreto trátase de solucionar os erros detectados na grafía dos ríos, e por outran a modificación puntual do Plan no que se refire aos PERI’s de San Bartolomé. Tamén se busca facer unha delimitación máis precisa do Parque Empresarial de Areas. Así o explicou o alcalde, Enrique Cabaleiro, á Radio Municipal de Tui.