Бурхан биднийг Өөрийнхөө Хүүтэй адил болгон өөрчлөхөөр урьдаас тогтсон юм. Сүнслэг өсөлтөнд хувь нэмэр оруулах чухал олон зүйлс бидний амьдралд байдаг. Гэхдээ Др.Стэнли бидэнд хэрвээ бид “буруу зорилгоор зөв зүйлийг хийх юм бол” бидний сүнслэг өсөлт саатах болно гэдгийг сануулж байна.

Бидний хувьд өөрсдийнхөө ажил төрөл, төлөвлөгөө зорилго гэж гүйсээр нэг л мэдэхэд Бурханыг мартчихсан явах тохиолдол олон гардаг шүү дээ. Бид өөрсдийн ажлын хуваарь, гэр бүл, найз нөхөд, хувийн асуудал гэж явсаар Бурханыг тэр бүх зүйлсийнхээ хойно оруулчихдаг. Харин өнөөдөр Др.Стэнли бидэнд сүнслэг зүйлст мэдрэмжгүй хандах нь ямар үр дагавар авчирдаг болохыг бидэнд зааж өгөх болно.

Бидний амьдралд хүнд хэцүү асуудал тулгарах үед бид тэр зовлон яагаад бидэнд тулгарсан юм бол гэдгийг мэдэхийг хүсдэг. Нөгөөтэйгүүр энэ зовлон бушуухан дуусаасай гэж хүсдэг шүү дээ. Гэтэл эдгээрээс илүү чухал нэг зүйлийг Бурхан харж байдаг. Биднийг үүнд ямар хариу үйлдэл үзүүлэх нь вэ гэдгийг Бурхан харж байдаг. Тэгвэл зовлон бэрхшээлийн өмнө бид ямар хариу үйлдэл үзүүлэх ёстой вэ гэдгийг Др.Стэнли бидэнтэй хуваалцах болно.

Нөхцөл байдлаасаа болоод бидний анхаара ямар амархан сарнидаг болохыг та мэдэх үү? Бидний харилцаа, бидний ажил төрөл, бидний санхүү мөнгө амжилтаар дүүрэн байх тэр үед бид итгэл найдвараа, анхаарлаа Бурхан дээр биш харин тэдгээр зүйлс рүүгээ амархан шилжүүлчихдэг. Энэ тохиолдолд Бурхан бидний амьдралд зовлон бэрхшээлийг зөвшөөрч үүгээрээ дамжуулан биднийг сэгсэрдэг. Бидний итгэж найдаж байсан тэр бүх зүйлсийн хуурамч болохыг бидэнд харуулж бидний анхаарлыг, бидний итгэлийг эргээд Бурхан дээр авчирдаг. Бидний амьдрал дахь зовлон бэрхшээлээр дамжуулан Бурхан биднийг хайрласан хайраа хэрхэн илэрхийлдэг тухай өнөөдөр хамтдаа Др.Стэнлийн сургаалаар үргэлжлүүлэн үзэцгээе.

Боловсруулж цэвэршүүлээгүй алт маш олон янзын хольцыг агуулсан байдаг. Харин алтыг маш өндөр температураар халааж цэвэршүүлэх үед түүнд агуулагдаж байсан хольц нь устаж алт цэвэршдэг. Ийнхүү цэвэршүүлсэн алт болон мөнгөний үнэ цэнэ эрс нэмэгддэг. Яг үүний нэгэн адилаар Бурхан бидний итгэлийг ч мөн тийнхүү цэвэршүүлдэг. Бидний амьдралаас тэрхүү илүү дутуу хольцыг зайлуулан цэвэршүүлэхийн тулд Бурхан зовлон бэрхшээлийг хэрэглэдэг. Өнөөдрийн энэ цагт Др.Чарльз Стэнли “Зовлон дунд ч урагш давших” тэрхүү нууцыг бидэнтэй үргэлжлүүлэн хуваалцах болно.

Бурханаас танд хандан бэлдсэн хамгийн сайн сайхан бүхнийг хүртэхийг та хүсэж байна уу? Та өөрийнхөө потенциалыг илүү нэмэгдүүлэхийг хүсдэг үү? Итгэгч бид бүгд л энэ асуултанд “тийм” гэж хариулах байх. Гэхдээ ингэхийн тулд бид зовж зүдэрч, хөлсөө урсгаж, хүнд хэцүүг давах ёстой гэвэл бидний хариулт өөрчлөгдөх болов уу? Бид бүгд л амьдралдаа зовлон бэрхшээлээс аль болох л зайлсхийдэг шүү дээ. Энэ бол мэдээжийн хэрэг. Гэхдээ зовлон бэрхшээл гэдэг үнэндээ биднийг сүнслэг төлөвшилд хүргэх зам болдог юм. Бидэнтэй хамтай байж Др.Стэнлийн өнөөдрийн сургаалыг сонсож “зовлон дунд ч урагш давших” тэр гайхамшигтай нууцаас суралцаарай.

Энэ дэлхийн нүдээр харах юм бол сул дорой байдал гэдэг муу чанар юм. Эсрэгээрээ хүчтэй, чадалтай, өөртөө итгэлтэй байна гэдэг амжилтанд хүргэх сайн чанарууд болдог. Итгэгч бидний хувьд ихэнхдээ Бурханы үнэлэмжээр биш харин энэ дэлхийн үнэлэмжээр амьдардаг. Бид өөрсдийн анхаарлыг Бурханаас холдуулж өөрсдийнхөө хүч чадалд, мэргэн ухаан, туршлагад найдаж эхлэх тэр үед Бурхан бидний амьдралд хөндлөнгөөс оролцож, бидний хувьд юу нь чухал болохыг ойлгуулдаг. Зовлон гуниг, саад бэрхшээл нь бидний өөртөө итгэх итгэлийг хугалж, Бурханаас хамааралтай болж өөрчлөгдөхөд Бурханы хамгийн шилдэг хэрэгсэл болж өгдөг. Бурхан таны анхаарлыг Өөр лүүгээ татахыг оролдоод байгаа юм биш биз?

Өнөөдөр таны амьдралд давахын аргагүй юм шиг санагдах тэр хүнд хэцүү асуудал, зовлон бэрхшээл байна уу? Хэрвээ байгаа бол та тэр асуудалдаа яаж хандаж байна вэ? Ямар хариу үйлдэл үзүүлж байна вэ? Давж гарахын төлөө тэмцэж байна уу? эсвэл аль болох үл тоож байна уу? Бурхан бидний амьдралд хүнд хэцүү нөхцөл байдал, зовлон гунигийг зөвшөөрөхдөө цаана нь ямагт бидэнд хамгийн сайн зорилгыг өвөрлөсөн байдаг гэдгийг өнөөдөр Др.Стэнли бидэнтэй Библиэс хуваалцах болно.

Өнөөдөр бид өөрсдийнхөө амьдралд тулгардаг асуудал зовлон саад бэрхшээлийг өөр өнцгөөс буюу Бурханы хардаг өнцгөөс харахыг оролдох болно. Бурхан биднийг зовлон гунигтаа дарагдан суух биш харин “зовлон дунд ч урагш давшаасай” гэж хүсдэг.  “Гай зовлонтой нөхцөл байдал дунд би яаж урагшлах юм бэ?” гэж та бодож байж болох юм. Миний амьдралд тохиолдоод байгаа энэ өвчин зөвлөн, харилцааны асуудлууд, санхүүгийн уналтууд Бурханаас эхтэй юм болов уу? гэж та бодож байсан байж болох юм. Хэрвээ эдгээр асуултууд танд танил сонсогдож байгаа бол та өнөөдрийн дугаарыг сувгаа солилгүйгээр сонсооро

Христэд итгэгчидийн хувьд итгэлийн амьдралдаа суралцах ёстой хамгийн хэцүү нэг зүйл бол Эзэнийг тэвчээртэйгээр хүлээх явдал юм. Эзэн бидэнд Өөрийнхөө хүслийг илчилж, бидний амьдралд эсвэл биднээр дамжуулан юу хийхийг хүсэж байгаагаа илчилж өгдөг. Тэгэнгүүтээ “гэхдээ одоо биш, Намайг хүлээ” гэж хэлдэг. Хэдийгээр бид хүлээх дургүй боловч Бурханыг хүлээлгүйгээр түрүүлж гүйх нь ухаалаг алхам биш юм. Бурхан бидний нүднээс далд ч гэсэн ажилласаар байгаа гэдгийг, бидэнд өгсөн зорилгоо биелүүлэхийн тулд Бурхан нөхцөл байдлуудыг өөрчилж, хүмүүсийн дотор ажилласаар байгаа гэдэгт бид итгэлтэй байж болно. Өнөөдөр Др.Чарльз Стэнли бидэнд “Эзэнийг хүлээхүйн шагнал” ямар агуу болохыг зааж өгөх болно.