Та чухал шийдвэрүүдийг гаргахдаа хэрхэн гаргадаг вэ? Та бодож тунгааж, давуу тал сул талуудыг нь жагсааж, найз нөхөдтэйгөө зөвлөлддөг үү? Магадгүй та шийдвэр гаргахдаа маш хурдан гаргачихаад, араас нь би юу хийчихвээ гэж боддог хүн байж болох юм. Бид амьдралдаа гаргах ёстой чухал шийдвэрүүдээ заавал ганцаарханаа гаргах албагүй ээ. Би танд нэгэн сайн мэдээг дуулгая. Бидний зөвлөгч бий. Тэр бол бидэнд үргэлж хамгийн сайныг хүсдэг, тэрхүү төгс зөвлөгч Есүс Христ юм. Өнөөдрийн үг бидэнд Бурханы удирдамжийг хүлээх нь ямар чухал болохыг сануулах болно. Бидэнтэй хамт байж, Бурханы мэргэн удирдамжийг хэрхэн хүлээх талаар Чарльз Стэнлийн сургаалыг сонсоорой.

Библи бол Бурханы Үг юм. Библид хувиршгүй, төгс үнэн агуулагдаж байдаг. Өнөөдөр олон хүмүүс төгс үнэн гэж байхгүй, үнэн гэдэг бол харьцангуй ойлголт гэж үзэх болжээ. Хэн нэгэн хүн ямар нэг зүйлд итгэлээ гээд тэр итгэсэн зүйл нь үнэн болчихдоггүйг бид мэднэ. Тэр хүний бат итгэж байгаа зүйл нь худлаа зүйл ч байж болно. Тэгвэл бидний итгэж буй зүйл үнэн болохыг бид юугаар шалгах вэ? Библи бол бидний амьдралд Бурханаас өгөгдсөн сурах бичиг, гарын авлага болохыг өнөөдөр Др.Стэнли бидэнд сануулах гэж байна.

Бидний амьдрал эцэс төгсгөлгүй ар араасаа цуварсан шийдэврүүдийн нийлбэр юм. Хэзээ орноосоо босох вэ, юу өмсөх вэ, юу идэх вэ гээд л. Эдгээр шийдвэрүүдийнхээ ихэнхийг бид хувийнхаа үзэмжээр гаргадаг. Зарим шийдвэрүүд маань бидний хувьд бүр зуршил болчихсон байдаг. Мэдээж цай хоол, өмсөх зүүхтэй холбоотой шийдвэрүүдийг бид хувийнхаа үзэмжээр шийдэхэд асуудалгүй. Харин амьдралаа шийдэх томоохон асуудлууд дээр бид хэтэрхий хувийн үзэмж, мэдрэмжиндээ тулгуурласан шийдвэр гаргаж болохгүй юм. Хэрвээ тэгэх юм бол бид маш амархан асуудалд орох болно. Ухаалаг шийдвэр гаргахын тулд бид Бурханы зөвлөгөөг авах хэрэгтэй. Тэгээд тэрхүү зөвлөгөөний дагуу зоригтойгоор, дуулгавартайгаар алхах хэрэгтэй юм шүү.

Өнөөдөр Христийн чуулганууд нэгэн аюултай дайсантай тулгараад байна. Энэ дайсан бол улс төрийн хавчлага шахалт биш, үнэнийг үл ойшоосон энэ нийгэм биш, итгэгчдийг хавчиж буй харгис хэрцгий үйлдлүүд ч биш юм. Хэдийгээр эдгээр нь чуулганы хувьд амаргүй асуудлууд байж болох ч хамгийн аюултай дайсан итгэгчдийн зүрх сэтгэл дотор байдаг юм. Өнөөдөр Др.Стэнли бидэнтэй яагаад итгэгч бид хайхрамжгүй, санаа амарлингуй байж болохгүй вэ гэдэг талаар ярилцах болно.

Бид бүгд амьдралдаа өөрөөсөө асуудаг гурван асуулт байдаг. “Би хаанаас ирсэн юм бэ?”, “Би юуны учир амьдран байна вэ?”, “Би энэ амьдралынхаа төсгөлд хаашаа одох вэ?”. Бидний дотор төрдөг эдгээр асуултуудын хариултыг Библи бидэнд хангалттай өгч чаддаг. Библид Бурханы бодол санаа агуулагдсан байдаг болохоор Библийн өгч байгаа хариултууд тэр бүр бидний бодол санаа, бидний логикоос өөр байдаг. Бурханы хэмжээлшгүй үнэ цэнэтэй үнэнд суурилсан байдаг. 

            Өнөөдөр Др.Стэнли бидэнд Библи бидний амьдралын талбар бүрт Бурханы мэргэн удирдамжийг хүргэх чадалтай гэдгийг дахин сануулах болно. Энэ утгаараа Библи бол бидний амьдралын сурах бичиг юм. Ингээд хамтдаа Др.Чарльз Стэнлийн ярианд анхаарлаа хандуулцгаая.

Хүмүүс олон янзын шалтгаанаар Библийн эрх мэдлийг үгүйсгэдэг. Гэхдээ хамгийн гол шалтгаан нь хүмүүс орчин үеийн нийгэмд Библийг хэтэрхий хоцрогдмол гэж боддог. Тэгвэл өнөөдөр Др.Стэнли бидэнд Бурханы үг бол өнөөдөр орчин үед ч бас адилхан хүч чадалтай хэвээрээ болохыг нотлон тайлбарлах болно. Библийн хуудаснаас бид Бурханы мөн чанарын талаар болон Түүний авралын төлөвлөгөөний талаар гайхамшигтай үнэнийг таньж мэдэж чадна. Үнэндээ Библи бол бидний амьдралын “Сурах бичиг” билээ

Удахгүй энэ дэлхийгээс явах болно гэдгийг дагалдагч нартаа хэлэхдээ Есүс тэднийг айж түгшиж байгааг мэдэж байсан. Тиймдээ ч Есүс дагалдагч нараа тайвшруулахын тулд Иохан 16:7 дээр “Харин Би та нарт үнэнийг хэлж байна. Миний явах нь та нарт хэрэгтэй. Хэрэв Би явахгүй бол Туслагч та нар уруу ирэхгүй. Харин Би явбал Өөрөө Түүнийг та нар уруу илгээнэ” гэж хэлсэн байдаг. Есүс энэ амлалтыг өгөхдөө тэр үеийн дагалдагчиддаа өгөөд зогсохгүй өнөөдрийн бидэнд ч бас өгсөн юм. Хэрвээ бид Эзэн Есүстэй илүү ойр байхыг хүсвэл бид Есүсийн бид рүү илгээсэн “Багш” болох Ариун Сүнс рүү хандах ёстой юм. Өнөөдрийн энэ цагаар дамжуулан Др.Чарльз Стэнли бидэнд Ариун Сүнсний үйлчлэлийн талаар илүү ихийг олж мэдэхэд маань туслах болно.

“Надад хэний ч туслалцаа хэрэггүй. Би үүнийг өөрөө хийж чадна”. Бид бүгд л энэ үгийг их бага ямар нэгэн хэмжээгээр хэлдэг. Мэдээж бидний өөрсдөө хийж чадах зүйлс олон бий. Гэхдээ зарим нэг зүйлс дээр бид Бурханаас хамааралтай байх ёстой байдаг. Чухамдаа үүнийг л Др.Стэнли бидэнд өнөөдөр сануулж байна. Бид Бурханы алдрын төлөө гээд ямар ч зүйлийг хийсэн зөвхөн өөрийнхөө хүч чадалд түшиглэх юм бол бид гарцаагүй бүтэлгүйтэх болно. Бид заавал бүтэлгүйтлээр дүүрэн амьдрах албагүй юм. Ариун Сүнс бидэнтэй хамт байж бидэнд туслахад хэзээд бэлэн байдаг. Өнөөдөр бид Ариун Сүнс бол “Бидний Багш” гэсэн сэдвээр хамтдаа үзэх болно.

Библи дээрх Бурханд агуугаар үйлчилсэн үйлчлэгч нарын тухай бодох үед таны дотор хэний нэр орж ирдэг вэ? Мосе юу? Давид уу? Паул уу? Петр үү? Эдгээр эрчүүд Бурханы төлөө агуу зүйлсийг хийсэн нь үнэн боловч эднээс ч дутахааргүй гайхалтайгаар Бурханд үйлчилсэн тийм баатрууд олон бий. Өнөөдөр Др.Стэнли бидэнд Библи дээр тэр бүр дурдагдаад байдггүй нэгэн гайхалтай баатрын талаар өгүүлэх болно. Тэр хүний дотор бусдад үйлчлэх гайхалтай зүрх сэтгэл байсан. Тэр хүн бол бидний бахархан дуурайвал зохих хүмүүсийн нэг мөнөөсөө мөн юм. Тэр хүнийг Филип гэдэг. Өнөөдөр хамтдаа Филип нэгэн Етиоп хүнтэй уулзсан уулзалтын талаар үзэнгээ энэ түүхээс “бидний гэрчлэл” яг ямар байх ёстой юм бэ гэдгийг үзэцгээх болно.

Итгэгч хүн нэг бүр Христийн сайн мэдээг бусадтай хуваалцах үүрэг хүлээсэн байдаг. Бидний авсан тушаал бол маш тодорхой. Матай 28:19 дээр “Иймээс явж, бүх үндэстнийг дагалдагч болгогтун. Эцэг, Хүү, Ариун Сүнсний нэрээр тэдэнд баптисм хүртээ” гэсэн байдаг. Олон итгэгчид Эзэний энэхүү тушаалыг дуулгавартай дагахыг хүсдэг. Гэхдээ үүнийг Христийн талаар бусдад ярих төдийгөөр хязгаарлаж бодоод байдаг. Өнөөдрийн нэвтрүүлгээр бид, “бидний гэрчлэл” нь бидний үг яриагаар хязгаарлагддаггүй юм байна гэдгийг үзэх болно.