Avant 140 onns è Jacques Offenbach mort sper Paris. Jakob u Jacques Offenbach – naschì ils 20 da zercladur 1819 a Cologna, mort ils 5 doctober 1880 sper Paris – è stà in cumponist, cellist e directur da teater tudestg-franzos. El vala sco l'inventader da l'operetta moderna, vul dir da quella che è semancipada e daventada uschè in genre independent dal teater musical. I sa tracta dad ovras per la tribuna cun ina presa critic-satirica. En sias operettas prenda Offenbach gugent situaziuns dal mintgadi e persunas da la societad aristocratica sin la corna. Sia musica è viv-frestga, da grond schlantsch e d'ina ritmica marcanta. Las melodias van bainspert en l'ureglia (Barcarole ord Les Contes d'Hoffmann u il Can-Can ord Orpheus in der Unterwelt). Sper sia musica per la tribuna (102 ovras, d.a. La belle Hélène, La vie parisienne, Barbe-bleue) ha Offenbach era cumponì per cello e piano e concerts per cello ed orchester.

Redacziun: Giusep G. Decurtins