Jain Siddh Bhatti (Prakrit) जैन सिद्ध भत्ति (प्राकृत) ★

अट्ठविहकम्ममुक्के, अगुण अणोवमे सिद्धे । अट्ठमपुढविणिविट्टे, णिट्ठियकज्जे य वंदिमो णिच्चं । ॥ १ ॥

तित्थयरेदरसिद्धे, जलथल आयासणिव्वुदे सिद्धे ।

अंतयडेदरसिद्धे, उक्कस्सजहण्णमज्झियोगाहे ।। २ ।।

उडमहतिरियलोए, छव्विहकाले य णिव्वुदे सिद्धे ।

उवसग्गणिरुवसग्गे, दीवोदहिणिव्वुदे य वंदामि ।।३।।

पच्छायडेय सिद्धे, दुग्गतिगचदुणाण पंचचदुरजमे ।

परिपडिदा परिपडिदे, संजमसम्मत्तणाणमादीहिं ।। ४ ।।

साहरणासाहरणे, समुग्घादेदरे य णिव्वादे ।

ठिद पलियंक णिसण्णो, विगयमले परपणाणगे वंदे ।। ५ ।।

पुंवेदं वेदंता, जे पुरिसा खवगसेढिमारूढा ।

सेसोदयेण वि तहा, झाणुवजुत्ता य ते हु सिज्झंति ।।६।।

पत्तेयसयंबुद्धा, बोहियबुद्धा य होंति ते सिद्धा।

पत्तेयं पत्तेयं, समयं समयं पडिवदामि सदा ।।७।।

पण णव दु अट्ठवीसा, चउ तियणवदि य दोण्णि पंचेव ।

वावण्णहीणविसया, पर्याड विणासेण होंति ते सिद्धा ।।८।।

अइसयमव्वाबाहं, सोक्खमणंतं अणोवमं परमं ।

इंदियविसयातीदं, अप्पत्तं अच्चयं च ते पत्ता ।। ९ ।।

लोगग्गमत्थयत्था, चरमसरीरेण ते हु किंचूणा ।

गयसित्थमूसगन्भे, जारिस आयार तारिसायारा ।।१०।।

जरमरणजम्मरहिया, ते सिद्धा मम सुभत्तिजुत्तस्स |

दिंतु वरणाणलाहं, बुहयण परियत्थणं परमसुद्धं । । ११ ।।

किच्चा काउस्सग्गं, चतुरट्ठयदोषविरहियं सुपरिसुद्धं ।

अइभत्तिसंपउत्तो, जो वंदइ लहु लहइ परमसुहं । । १२ ।। ★

अंचलिका

★

इच्छामि भंते सिद्धिभत्तिकाउस्सग्गो कओ तस्सालोचेउं सम्मणाणसम्मदंसण सम्पचारित्तजुत्ताणं, अट्ठविहकम्मविप्पमुक्काणं, अट्ठगुणसंपण्णाणं, उडलोयमत्थयम्मि पथविवाणं, तव सिद्धायणं, संजमसिद्धाणं, अतीताणागदवट्टमाणकालत्तयसिद्धाणं, सव्वसिद्धाणं, णिच्चकालं अंचेमि, पूजेमि, वंदामि, णमंसामि, दुक्खक्खओ, कम्मक्खओ, बोहिलाहो, सुगइगमणं, समाहिमरणं, जिणगुणसंपत्ति होउ मज्झं । ★