Anna Þóra Ísfold er þessa dagana að skipuleggja kyrrð og dekur fyrir fámennan hóp kvenna í Birkihofi á Laugarvatni yfir jólin, frá Þorláksmessu og til annars í jólum. Hún skildi fyrir 4 árum og eins og oft er með skipulag yfir jól og áramót, skiptast börnin á að vera hjá foreldrum sínum. Það getur reynst mörgum erfitt að hafa ekki börnin hjá sér yfir jólin og því fæddist þessi hugmynd hjá Önnu Þóru, að bjóða uppá þessa samveru kvenna í sömu sporum. Tíminn verður nýttur í sjálfsuppbyggingu, valdeflingu og góðan mat. Við ræddum við Önnu Þóru í þættinum.

Jólin nálgast með öllu sem þeim fylgir, hvað á að gefa hverjum í jólagjöf? Hvað fengum við í jólagjöf í fyrra? UNICEF á Íslandi býður upp á sannar gjafir þar sem hægt er að gefa vinum og fjölskyldu gjöf sem getur skipt sköpum fyrir börn í neyð, sem sagt það að í þeirra nafni fái barn sem þarf á því að halda; bólusetningu, vítamínbætt jarðhnetumauk, hlý föt fyrir kaldasta tíma ársins og miklu fleira. Þörfin hefur aldrei verið meiri til dæmis í Jemen, Afganistan, Madagaskar og Eþíópíu og við fengum þær Steinunni Jakobsdóttur og Eyrúnu Ingu Jóhannesdóttur frá UNICEF á Íslandi til þess að segja okkur frekar frá sönnum gjöfum sem eru 10 ára í ár og stærstu áskorun sem UNICEF hefur staðið frammi fyrir í sinni 75 ára sögu.

Og lesandi vikunnar í þetta sinn var Arnrún Magnúsdóttir leikskólakennari. Við fengum að vita hvaða bækur hún hefur verið að lesa og hvaða bækur og höfundar hafa haft sérstök áhrif á hana í gegnum tíðina.

UMSJÓN GUÐRÚN GUNNARSDÓTTIR OG GUNNAR HANSSON