Musica vocala ed ovras per violina ed orgla dal cumponist Rheinberger. «Geschätzt, geehrt, geachtet» – uschè statti scrit en l'annunzia da mort da Josef Gabriel Rheinberger. Naschì 1839 a Vaduz sco mez Rumantsch – sia mamma Maria Elisabeth Carigiet era da Mustér – e Rheinberger è daventà in dals impurtants magisters da musica da l'Europa. El ha vivì e lavurà a Minca, tranter auter er sco capellmaister da l'excentric retg Ludwig II. Mort è Rheinberger il 1901. Per ses 180avel anniversari han Willi Derungs e ses ensemble novocanto fatg omagi a quest impurtant cumponist (mez Rumantsch). RTR ha registrà il concert dals 17-12-2019 a Berna en la Marienkirche. Da quest concert porta l'Artg musical parts, munidas cun in discurs cun il dirigent lumnezian Willi Derungs.

redacziun: Giusep G. Decurtins