Kjarnasamfélög eru samfélög sem oft leggja áherslu á sjálfbærari lifnaðarhætti. Fólkið í samfélaginu ákveður hvernig hverfið þeirra á að líta út og virka. Í Kjarnasamfélagi eiga allir sitt eigið heimili, með öllu sem fólk vill hafa þar en það velur hvort það vill eiga sum rými og suma hluti með hverfinu. Kjarnasamfélög eru hönnuð með það markmið að byggja upp og efla tengsl milli íbúa. Kjarnasamfélög eru vinsæl víða um heim og eru til í mörgum myndum t.d. í USA, Norðurlöndum og víða um Evrópu. Við fengum þau Simon Joscha Flender, arkitekt og verkefnastjóra hjá Kjarnasamfélagi Reykjavíkur og Önnu Maríu Björnsdóttur, áhugamanneskju um kjarnasamfélög til að segja okkur frekar frá en saman hafa þau ásamt fleirum unnið síðastliðið ár að undirbúningi á stofnun kjarnasamfélags á Íslandi. Í næstu viku fara þau af stað með streymisviðburði til að kynna kjarnasamfélög á Íslandi.

Við héldum áfram að ræða um fæðingaróttann/tókófóbíu í þættinum í dag en í gær heyrðum við Unni Birnu Bassadóttur tónlistarkonu tala opinskátt um sinn fæðingarótta en hún gengur nú með sitt fyrsta barn. Fæðingarótti einkennist af hræðslu við sársauka í fæðingu, ótta við að geta ekki fætt barn og ótta við foreldrahlutverkið og einnig eru konur með fæðingarótta lengur að fæða barn sitt. Við ræddum í dag við Þóru Steingrímsdóttur, yfirlækni á kvenna- og barnasviði Landspítala og prófessor í fæðinga- og kvensjúkdómalækningum við læknadeild Háskóla Íslands og heyrðum líka brot úr viðtalinu við Unni frá í gær.

Nú er að hefjast rannsókn á áhrifum Covid-19 á ónæmiskerfið en vitað er að pestir og ýmis áföll geta valdið sjálfsónæmissjúkdómum. Björn Rúnar Lúðvíksson, yfirlæknir á ónæmisfræðideild Landspítalans segir að hann hafi orðið vitni að kraftaverki á starfstíma sínum sem ónæmislæknir en þannig lýsir hann þeirri byltingu sem hefur orðið í meðferð á þessum sjúkdómum. Bergljót Baldursdóttir ræddi við Björn á Heilsuvaktinni í dag.

UMSJÓN GUNNAR HANSSON OG GUÐRÚN GUNNARSDÓTTIR