ពលរដ្ឋខ្មែរអាមេរិកាំងនៅរដ្ឋ Massachusetts ជាង១៥០នាក់ បានរួមគ្នាប្រារព្ធធ្វើបុណ្យទក្ខិណានុប្បទាន កាលពីថ្ងៃសៅរ៍ ទី១៥ ខែមិថុនា ដើម្បីរំឭកខួប១២ឆ្នាំនៃឃាតកម្មលើលោក ឈុត វុទ្ធី សកម្មជនការពារព្រៃឈើដ៏លេចធ្លោរបស់កម្ពុជា ដើម្បីថ្លែងអំណរគុណដល់សកម្មភាពការពារបរិស្ថានរបស់លោក ដែលបានធ្វើការងារដោយមិនរាថយ បើទោះបីជារងការគំរាមកំហែងក៏ដោយ។ លោក ពិន ស៊ីសុវណ្ណ នៃវីអូអេ រាយការណ៍លម្អិតពីទីក្រុង Lowell នៅរដ្ឋ Massachusetts៕

កញ្ញា សេង រ័ត្នសេដ្ឋាមុនី ជាយុវតីឆ្នើមមួយរូបមកពីប្រទេសកម្ពុជា បានសម្រេចក្តីស្រមៃរបស់ខ្លួនដោយទទួលបានអាហារូបករណ៍មួយផ្នែក ដើម្បីបន្តការសិក្សាថ្នាក់អនុបណ្ឌិតផ្នែកអប់រំ នៅសាកលវិទ្យាល័យ Harvard នៅទីក្រុង Cambridge រដ្ឋ Massachusetts ដ៏ល្បីរបស់សហរដ្ឋអាមេរិកនិងជាសាកលវិទ្យាល័យលំដាប់ថ្នាក់ពិភពលោកផងដែរ។ នេះជាអនុបណ្ឌិតទី ២ ដែលកញ្ញានឹងឈោងយក ត្រឹមវ័យ២១ឆ្នាំ បន្ទាប់ពីបានបញ្ចប់ការសិក្សាថ្នាក់អនុបណ្ឌិតផ្នែកវិទ្យាសាស្ត្រនយោបាយក្នុងនាមជានិស្សិតឆ្នើមពីសាកលវិទ្យាល័យ Northern Illinois University ក្រោមអាហារូបករណ៍ពេញថ្លៃរបស់សាលា។ នៅក្នុងបទសម្ភាសន៍ជាមួយអ្នកនាង នីណា យេង នៃវីអូអេ កញ្ញា មុនី បានរៀបរាប់ពីក្តីស្រមៃ និងការលើកទឹកចិត្តពីឪពុកម្តាយរបស់នាង នៅក្នុងដំណើរនៃការសិក្សាដ៏គួរឱ្យកោតសរសើរនេះ។ កញ្ញាក៏ជំរុញលើកទឹកចិត្តយុវជនផ្សេងទៀត ជាពិសេសយុវតីដែលស្រឡាញ់ការរៀនសូត្រ ឱ្យប្រឹងប្រែងចាប់យកក្តីស្រមៃរបស់ខ្លួន ដើម្បីខ្លួនឯង ក្រុមគ្រួសារ និងសង្គមជាតិ៕

ចំណេះ​ដឹង​ខាង​កុលាលភាជន៍​ត្រូវ​បាន​កែច្នៃ​និង​អភិវឌ្ឍ​ជា​ផលិតកម្ម​លក្ខណៈ​ឧស្សាហ​កម្ម ប៉ុន្តែ​ តម្លៃ​និង​ព្រលឹង​សិល្បៈ​នៃ​កុលាល​ភាជន៍​ធ្វើ​ដោយ​ដៃ​និង​ដុត​ដោយ​ឡ​ឱស​នៅ​តែ​មាន​តម្លៃ​ជាអមតៈ។ ​ ខ្មែរ​អាមេរិកាំង​ម្នាក់​កំពុង​ខិតខំ​ប្រឹងប្រែង​រក្សា​សិល្បៈ​នេះ​និង​ផ្ទេរ​ចំណេះ​ដឹង​ដល់​មនុស្ស​ជំនាន់​ក្រោយ។​ លោក​ពិន ស៊ីសុវណ្ណ​រាយការណ៍ពី​ទីក្រុង​Lowell រដ្ឋ ​Massachusetts​ដូចតទៅ៖

ខណៈការនិយាយភាសាខ្មែររស់រវើកនៅទីក្រុង Lowell រដ្ឋ Massachusetts ប៉ុន្តែចំណេះដឹងផ្នែកអាននិងសរសេរភាសានៅមានកម្រិតទាបដែលទាមទារការពង្រឹងបន្ថែម ព្រោះភាសាជាយានសម្រាប់ទទួលបានចំណេះដឹងនិងជំនាញ និងជាព្រលឹងជាតិ។ លោក ពិន ស៊ីសុវណ្ណ រាយការណ៍ពីទីក្រុងខ្មែរនេះនៅសហរដ្ឋអាមេរិក៕

អាហារូបករណ៍ Fulbright របស់សហរដ្ឋអាមេរិកបានជួយនិស្សិតកម្ពុជាឆ្នើមបំផុតប្រមាណ ១០នាក់ ឱ្យមកបន្តការសិក្សាថ្នាក់ក្រោយបរិញ្ញាបត្រ នៅសហរដ្ឋអាមេរិកជារៀងរាល់ឆ្នាំ។ និស្សិតខ្មែរម្នាក់ ដែលបានទទួលអាហារូបករណ៍ដ៏ល្បីនេះ គឺលោក សុខ ហ៊ាញ។ លោកបានចូលមកស្ទូឌីយូ VOA នៅរដ្ឋធានីវ៉ាស៊ីនតោន និងផ្តល់បទសម្ភាសន៍ដល់លោក ចាប ចិត្រា នៃ VOA អំពីដំណើរទទួល បានអាហារូបករណ៍ Fulbright មកសិក្សាថ្នាក់បរិញ្ញាបត្រជាន់ខ្ពស់ផ្នែកវិទ្យាសាស្ត្រទិន្នន័យ ឬ Data Science នៅសាកលវិទ្យាល័យ Maryland។ លោកថា លោកចាប់យកជំនាញនេះដើម្បីចង់ជួយចូលរួមលើកស្ទួយសេដ្ឋកិច្ចរបស់ប្រទេសកម្ពុជានាពេលអនាគត៕

លោក ជា ចន្ទវីរៈបុត្រ ជាកូនខ្មែរដែលមករស់នៅសហរដ្ឋអាមេរិកតាំងពីអាយុ ៧ ឆ្នាំ។ ក្នុងវ័យ ២៣ ឆ្នាំ លោក វីរៈបុត្រ ទើបតែបញ្ចប់ការសិក្សាថ្នាក់បរិញ្ញាបត្រជំនាញអតិសុខុមជីវវិទ្យា (microbiology) ពីសាកលវិទ្យាល័យ University of California, Riverside។ លោកធ្លាប់បានធ្វើការងារស្ម័គ្រចិត្តនៅតាមមន្ទីរពេទ្យមួយចំនួននៅក្នុងប្រទេសកម្ពុជា និងនៅក្នុងសហរដ្ឋអាមេរិក ដោយមានបំណងឈោងចាប់យកអាជីពជាគ្រូពេទ្យទៅថ្ងៃអនាគត។ កញ្ញា ឡាយ អានជូលីណា ដែលជានិស្សិតចុះកម្មសិក្សានៅ​វីអូអេ បានសម្ភាសលោក វីរៈបុត្រ អំពីការសិក្សានិងការតស៊ូរបស់លោកនៅក្នុងសហរដ្ឋអាមេរិកនេះ៕

លោក ស្រី ប៊ុនឃីន ចៅសង្កាត់រងទី២ នៃសង្កាត់ជ័យជំនះ ខណ្ឌដូនពេញ មកពីគណបក្សឆន្ទៈខ្មែរ បានចូលរួមការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី ៤ ឬហៅថា ការបោះឆ្នោតជ្រើសរើសក្រុមប្រឹក្សាដែលធ្វើឡើងរៀងរាល់ ៥ឆ្នាំម្តង។ លោកបានប្រាប់វីអូអេថា លោកចង់ឃើញក្រុមប្រឹក្សាខណ្ឌជាប់ឆ្នោតដោយមកពីចម្រុះគណបក្ស ដែលអាចធ្វើការងាររួមគ្នាដើម្បីផលប្រយោជន៍របស់ប្រជាពលរដ្ឋ៕

នាព្រឹកថ្ងៃអាទិត្យ ទី ២៦ ខែឧសភានេះ គេសង្កេតឃើញថា មន្ត្រីនៃក្រុមប្រឹក្សាឃុំសង្កាត់បានប្រមូលផ្តុំគ្នានៅមណ្ឌលបោះឆ្នោតក្នុងវិទ្យាល័យវត្តភ្នំ រាជធានីភ្នំពេញ ដោយមានរបៀបរៀបរយ នៅក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី ៤ ឬហៅថា ការបោះឆ្នោតជ្រើសរើសក្រុមប្រឹក្សាដែលធ្វើឡើងរៀងរាល់ ៥ឆ្នាំម្តង។ គណបក្សនយោបាយចំនួន ៥ ចូលរួមប្រកួតប្រជែងនៅក្នុងការបោះឆ្នោតមួយនេះ រួមមានគណបក្សប្រជាជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ៊្វុនស៊ិនប៉ិច និងគណបក្សខ្មែររួបរួមជាតិ។ គណបក្សឆន្ទៈខ្មែរតំណាងឱ្យគណបក្សភ្លើងទៀន។ ក្រុមប្រឹក្សានេះមានសិទ្ធិអំណាចធ្វើសេចក្តីសម្រេចខាងបញ្ញត្តិ និងសេចក្តីសម្រេចខាងប្រតិបត្តិ ហើយសិទ្ធិពិសេសមួយទៀតរបស់ក្រុមប្រឹក្សាគឺធ្វើសំណើទៅរដ្ឋាភិបាលក្នុងការដកហូតតំណែងគណៈអភិបាល ឧទាហរណ៍ដូចជាក្រុមប្រឹក្សាខេត្តមានសិទ្ធិស្នើដកអភិបាលខេត្ត ឬអភិបាលរងខេត្តជាដើម។ នេះបើតាមច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ។ លោក ស៊ុន ណារិន រាយការណ៍លម្អិតពីរាជធានីភ្នំពេញ៕

កញ្ញា ឈឿន សុខនីន បានកើតនៅប្រទេសកម្ពុជា ហើយធំដឹងក្តីនៅសហរដ្ឋអាមេរិក។ ដោយបាន ឃើញអំពើអយុត្តិធម៌ជាច្រើននៅក្នុងប្រទេសកម្ពុជា កញ្ញាបានក្លាយជាសកម្មជនយុវជននៃបណ្តាញយុវជនកម្ពុជាសាកល ដើម្បីចូលរួមតស៊ូមតិនៅសភារបស់សហរដ្ឋអាមេរិកនៅរដ្ឋធានីវ៉ាស៊ីនតោន កាលពីពាក់កណ្តាលខែឧសភា ឲ្យបន្តយកចិត្តទុកដាក់ដល់ស្ថានភាពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា ដែលបានធ្លាក់ចុះជាច្រើនឆ្នាំមកនេះ។ លោក ម៉ែន គឹមសេង នៃវីអូអេបានជួបសម្ភាសកញ្ញា ឈឿន សុខនីន គណៈកម្មាធិការអចិន្ត្រៃយ៍នៃបណ្តាញយុវជនកម្ពុជាសកលនិងជាកូនខ្មែរអាមេរិកាំងអំពីការតស៊ូមតិនេះ៕

សកម្មជនយុវជននៃបណ្តាញយុវជនកម្ពុជាសាកលបានចំណាយពេលជាច្រើនថ្ងៃ នៅរដ្ឋធានីវ៉ាស៊ីនតោន កាលពីពាក់កណ្តាលខែឧសភា ដើម្បីតស៊ូមតិនៅសភារបស់សហរដ្ឋអាមេរិក ឲ្យបន្តយកចិត្តទុកដាក់ដល់ស្ថានភាពសិទ្ធិមនុស្សនិងលទ្ធិប្រជាធិបតេយ្យនៅកម្ពុជា ដែលបានធ្លាក់ចុះជាច្រើនឆ្នាំមកនេះ។ លោក ម៉ែន គឹមសេង នៃវីអូអេ បានជួបសម្ភាសលោក សេង ម៉េងប៊ុនរ៉ុង គណៈកម្មាធិការអចិន្ត្រៃយ៍នៃបណ្តាញយុវជនកម្ពុជាសកលពីការតស៊ូមតិនេះ៕