យុទ្ធនាការ​ឃោស​នា​បោះ​ឆ្នោត​ឃុំសង្កាត់​ត្រូវបានបិទបញ្ចប់នៅ​ថ្ងៃ​សុក្រនេះ​។​ គណបក្សនយោបាយ យ៉ាងហោចណាស់ចំនួនបី​ បាន​ចេញហែរ​ក្បួនបិទ​បញ្ចប់​របស់​ខ្លួននៅ​រាជធានី​ភ្នំពេញ។ ក្នុងនោះគណបក្ស​កាន់​អំណាច គឺ​គណបក្ស​ប្រជាជន​កម្ពុជា និង​គណបក្ស​ប្រឆាំង គឺភ្លើង​ទៀន មាន​អ្នក​ចូូលរួម​ច្រើនកុះករ​ដល់រាប់ម៉ឺន​នាក់។ ក្បួន​ឃោស​នា​របស់គណបក្ស​កម្ពុជា​ ​ដឹកនាំដោយ​ លោក​ ឃួង​ ស្រេង​ ប្រធាន​គណៈ​កម្មាធិការគណបក្សប្រជាជនកម្ពុជារាជធានីភ្នំពេញ។ គណបក្ស​ខ្មែរ​រួបរួមជាតិ​ ក៏​បាន​ហែក្បួនឃោស​នា ​របស់ខ្លួននៅ​ថ្ងៃបញ្ចប់នេះ​ដែរ។ គណកម្មការធិការ​ជាតិរៀបចំ​ការ​បោះ​ឆ្នោត​ ឬ​ គ.ជ.ប ​មិនបាន​បញ្ជាក់អំពី​ការ​ដង្ហែរបស់​គណបក្ស​ផ្សេង​ទៀតទេ។ ពលរដ្ឋកម្ពុជា​ដែល​មាន​អាយុ​ចាប់ពី​ ១៨ ឆ្នាំឡើង​ មាន​ជាង​ ១០ លាន​នាក់​ ដែល​ក្នុងនោះ ពលរដ្ឋ​ ៩.២០៥.៦៧៥ នាក់ មាន​ឈ្មោះ​ក្នុងបញ្ជី​បោះ​ឆ្នោតដែល​គេ​រំពឹងថា​នឹង​ទៅ​បោះ​ឆ្នោត។ គណបក្ស​នយោបាយ និង​ គ.ជ.ប​ បន្ត​អំពាវ​នាវឲ្យ​អ្នកមាន​សិទ្ធិ​បោះឆ្នោត ​ចេញ​ទៅបោះ​ឆ្នោត​ជ្រើសរើស​ថ្នាក់ដឹក​នាំឃុំសង្កាត់​ខ្លួន នៅ​ថ្ងៃ​អាទិត្យ​ទី ០៥ ខែមិថុនានេះ៕

ថ្ងៃសុក្រ ទី៣ ខែមិថុនានេះ ជាថ្ងៃចុងក្រោយនៃយុទ្ធនាការឃោសនារកសំឡេងឆ្នោត ដែលមានរយៈពេល១៤ថ្ងៃ។ គណបក្សភ្លើងទៀនបានហែក្បួនដ៏ធំមួយតាមផ្លូវក្នុងរាជធានីភ្នំពេញ ជាមួយក្តីសង្ឃឹមថាខ្លួននឹងទទួលបានការគាំទ្រច្រើននៅក្នុងការបោះឆ្នោត នាថ្ងៃអាទិត្យនេះ។ លោក ស៊ុន ណារិន រាយការណ៍ឲ្យវីអូអេពីរាជធានីភ្នំពេញ៕

នៅ​ថ្ងៃ​សុក្រ ​ទី​៣ ខែ​មិថុនា​នេះ​ គឺ​ជា​ថ្ងៃ​បិទ​បញ្ចប់​យុទ្ធនាការឃោស​នាបោះឆ្នោត​ឃុំសង្កាត់​ដែល​ធ្វើឡើង​អស់រយៈពេល​១៣​ថ្ងៃកន្លង​មកនេះ​។ ហើយ​នៅក្រុង​សៀម​រាប​ គណបក្ស​នយោបាយ​សំខាន់ៗ​ពីរ​ បានធ្វើយុទ្ធនាការ​ឃោសនាចុង​ក្រោយដើម្បី​កៀរគរ​សន្លឹក​ឆ្នោត​របស់ពលរដ្ឋ។ ទាំង​គណបក្ស​កាន់អំណាច​ និងគណបក្ស​ភ្លើងទៀន​ អះអាងអំពីការឈ្នះ​រៀងៗខ្លួន ក្នុងការ​បោះឆ្នោត​លើក​នេះ។ លោក ហ៊ុល រស្មី រាយការណ៍លម្អិតពីខេត្តសៀមរាប៕

ប្រជា​ពល​រដ្ឋ​រស់នៅ​ក្នុង​ឃុំ​ព្រះដាក់ ស្រុក​បន្ទាយ​ស្រី ខេត្ត​សៀមរាប​ បាន​សរ​សើរស្នាដៃ​មេឃុំ​ចាស់ ​ដែល​បម្រើ​សេវា​សាធារណៈ​ដល់ប្រជា​ពលរដ្ឋ​បាន​ល្អច្រើន ក៏ប៉ុន្តែពួកគេ​ទាម​ទារ​ឱ្យមេឃុំ​ជួយ​សម្រួល​លក្ខខណ្ឌ​ងាយស្រួលក្នុង​ការ​ផ្តល់ឯក​សារសាងសង់តូប​តូចៗ និង​ផ្ទះ នៅ​ក្នុង​តំបន់​អប្សរា​នេះ។ លោក ហ៊ុល រស្មី រាយការណ៍​លម្អិត​ពី​ខេត្តសៀមរាប៕

សម្រាប់​ការ​បោះ​ឆ្នោត​ក្រុម​ប្រឹក្សា​ឃុំ​សង្កាត់​អាណត្តិ​ទី​ ៥​ នេះ គណបក្ស​ហ៊្វុនស៊ិនប៉ិច បាន​ចុះ​ឈ្មោះ​បេក្ខជន​ឈរ​ឈ្មោះ​នៅ​ឃុំ​សង្កាត់​ចំនួន​ ៦៨០​ ក្នុង​ចំណោម​ឃុំ​សង្កាត់​សរុប​ចំនួន​ ១.៦៥២។ គណបក្ស​ហ៊្វុនស៊ិនប៉ិច​ ត្រូវបាន​បង្កើត​ឡើង​នៅ​ដើម​ឆ្នាំ​ ១៩៨១។​ កាលពី​ឆ្នាំ​ ១៩៩៣ គណបក្ស​នេះ​បាន​ឈ្នះ​ការ​បោះឆ្នោត​ថ្នាក់ជាតិ​លើក​ដំបូង តាម​លក្ខណៈ​ប្រជាធិបតេយ្យ​រៀបចំ​ដោយ​អង្គការ​សហប្រជាជាតិ ក្រោយ​ប្រទេស​កម្ពុជា​បាន​បញ្ចប់​សង្គ្រាម​ស៊ីវិល​បន្ទាប់​ពី​របប​ខ្មែរក្រហម។ នា​ពេល​បច្ចុប្បន្នះ ព្រះ​អង្គ​ម្ចាស់ ​នរោត្តម ​ចក្រាវុធ ជា​ព្រះ​ប្រធាន​គណបក្ស​ហ៊្វុនស៊ិនប៉ិចនេះ។​ លោក ​ញឿន រ៉ាដែន​ អ្នក​នាំ​ពាក្យ​គណបក្ស​ហ៊្វុនស៊ិនប៉ិច ​បាន​ប្រាប់​អ្នកស្រី ធីតា វីន អ្នក​យក​ព័ត៌មាន​ឲ្យ​វីអូអេ​ប្រចាំ​រាជធានី​ភ្នំពេញថា​ បើ​តាមសន្ទុះ​នៃ​អ្នក​គាំទ្រ​ដែល​បាន​បង្ហាញ​ចេញ​នូវ​ក្នុង​អំឡុង​នៃ​ការ​ឃោសនា​បោះ​ឆ្នោត​នេះ ​គណបក្ស​ហ៊្វុនស៊ិនប៉ិច​សង្ឃឹម​ថា ​នឹង​ទទួល​បាន​ជោគ​ជ័យ​ខ្លាំង​ក្នុង​ការ​បោះ​ឆ្នោត​នេះ៕

ក្រោយ​ពី​ប្រទេស​កម្ពុជា​បើក​ចំហ​ឡើង​វិញ​បន្ទាប់​ពី​វិបត្តិ​ជំងឺ​កូវីដ១៩​ មុខ​របរ​ធាក់​ស៊ីក្លូ​មាន​ជីវិត​ឡើង​វិញ​យ៉ាង​ត្រដាប​ត្រដួស​ ដោយសារ​មិន​អាច​ប្រកួត​ប្រជែង​ជាមួយ​រ៉ឺម៉កកង់​បី​ដែល​មាន​សេវា ​PassApp​ ជួយ​រក​អតិថិជន​។​ លោក​លាស់ លីបលីប​ និង​លោក​ ពិន ស៊ីសុវណ្ណ រាយ​ការណ៍​លម្អិតអំពី​រឿង​នេះ​ពី​រាជ​ធានី​ភ្នំពេញ៕

គណ​បក្ស​កែ​ទម្រង់​កម្ពុជា​ត្រូវបាន​បង្កើត​ឡើង​ កាលពី​ខែ​កញ្ញា ​ឆ្នាំ​ ២០២១​ ដោយ​មាន​បេក្ខជន​ឈរ​ឈ្មោះ​ចំនួន​ ៥៩ នាក់​ ដើម្បី​ចូលរួម​ដណ្តើម​តំណែង​ជា​មេដឹកនាំ​សហគមន៍​នៅ​ក្នុង​ចំណោម​ឃុំ​សង្កាត់​សរុប ១.៦៥២ នៅ​ទូទាំង​ប្រទេស។ នៅ​ក្នុង​បទសម្ភាសន៍​ជាមួយ​អ្នកស្រី ធីតា វីន អ្នក​យក​ព័ត៌មាន​ឲ្យ​វីអូអេ​ប្រចាំ​រាជធានី​ភ្នំពេញ លោក​ ប៉ុល​ ហំម ​ប្រធាន​គណបក្ស​កែ​ទម្រង់​កម្ពុជា បាន​អះអាង​ថា គណបក្ស​កាន់​អំណាច​កំពុង​ដឹកនាំ​ប្រទេស​ដោយ​ជិះ​សេះ​លែង​ដៃ ដោយ​កាន់កាប់​អាសនៈ​ទាំង​អស់​នៅ​ក្នុង​សភា​ និង​អាសនៈ​ស្ទើរតែ​ទាំង​អស់​នៅ​ក្នុង​ឃុំ​សង្កាត់​យក​ ​ដែល​កំពុង​ធ្វើ​ឱ្យ​ដំណើរ​ការ​លទ្ធិ​ប្រជាធិបតេយ្យ​សេរី​ពហុបក្ស​អាច​នឹង​សាប​សូន្យ​នៅ​កម្ពុជា​។ នេះ​គឺ​ជា​អះ​អាង​របស់​មេ​ដឹក​នាំ​គណ​បក្ស​កែ​ទម្រង់​កម្ពុជា។ លោក ​ប៉ុល ​ហំម ​ក៏​បាន​អំពាវនាវ​ឱ្យ​ប្រជា​ពលរដ្ឋ​សម្រេច​ចិត្ត​ជ្រើស​រើស​មេដឹក​នាំ​ក្នុង​មូល​ដ្ឋាន​ង​ដោយ​បញ្ញា ​កុំ​ប្រើ​បេះដូង​តែ​មួយ​មុខ៕

សម្រាប់​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់​អាណត្តិ​ទី​ ៥​ នេះ​ គណបក្ស​ប្រជាជន​កម្ពុជា​ជា​គណ​បក្ស​តែ​មួយ​គត់​ដែល​មាន​បេក្ខជន​ឈរ​ឈ្មោះ​បោះ​ឆ្នោត​នៅ​គ្រប់​ឃុំ​សង្កាត់​សរុប​ទាំង​អស់ ១.៦៥២ ទូទាំង​ប្រទេស។ គណបក្ស​ប្រជាជន​កម្ពុជា ​ជា​គណបក្ស​កាន់​អំណាច​និង​មាន​ធន​ធាន​ច្រើនដើម្បីឃោសនា​បោះ​ឆ្នោត​ និង​មាន​បទ​ពិសោធន៍​យ៉ាង​ក្រាស់​ក្រែល​ក្នុង​ការ​ចូល​រួម​បោះ​ឆ្នោត​គ្រប់​អាណត្តិ​ទាំង​អស់​ ទាំង​ថ្នាក់​ជាតិ ​និង​មូលដ្ឋាន។ លោក ​សុខ​ ឥសាន​ អ្នក​នាំ​ពាក្យ​គណបក្ស​ប្រជាជន​កម្ពុជា បាន​ឲ្យ​អ្នកស្រី ធីតា វីន អ្នក​យក​ព័ត៌មាន​ឲ្យ​វីអូអេ​ប្រចាំ​រាជធានី​ភ្នំពេញ ​ថា​ ការ​រីក​ចម្រើន​ថ្នាក់​មូល​ដ្ឋាន​គឺ​ជា​បង្អែក​ដ៏​សំខាន់​ក្នុង​ការ​អភិវឌ្ឍ​ប្រទេស៕

កាលពី​ថ្ងៃអាទិត្យ គណបក្ស​កម្ពុជា​និយម​ដែល​មាន​រូប​សញ្ញា​ឥន្ទ្រី របស់​អតីត​តំណាងរាស្ត្រ​គណបក្ស​សង្គ្រោះ​ជាតិ លោក យ៉ែម បុញ្ញឫទ្ធិ បាន​ចាប់ផ្តើម​យុទ្ធនាការ​ឃោសនា​រក​សំឡេង​ឆ្នោត​លើក​ទី១​របស់​ខ្លួន​ក្នុង​រាជធានី​ភ្នំពេញ ដោយ​បក្ស​នេះ​រំពឹង​ថា​នឹង​ទទួល​បាន​តំណែង​ជា​មេឃុំ​ក្នុង​ការបម្រើ​ប្រជា​ពលរដ្ឋ។ លោក លាស់ លីបលីប រាយការណ៍​លម្អិត​ឱ្យ​វីអូអេ​ពី​រាជ​ធានី​ភ្នំពេញ៕

សារមន្ទីរជាតិ​ដើម្បី​សិល្បៈ​អាស៊ី​នៃ​មជ្ឈមណ្ឌល​ Smithsonian របស់​សហរដ្ឋ​អាមេរិក កំពុង​ដាក់​តាំង​ពិពណ៌​រូបបដិមាព្រះហិណ្ឌូ​មួយអង្គ ដែល​ត្រូវ​បាន​ឆ្លាក់​នៅ​លើ​ភ្នំ​របស់​ប្រទេស​កម្ពុជា​មួយ​នៅអំឡុង​ឆ្នាំ ៦០០។ លោក ចាប ចិត្រា នៃ ​VOA ​រាយការណ៍​ថា ​ការតាំង​ពិព័រណ៍​រយៈពេល ៤ ខែនេះ អបអរ​ពី​សារៈសំខាន់​នៃ​សាសនា ​និង​ប្រពៃណី​នៅ​ក្នុង​បណ្តា​សហគមន៍​ខ្មែរ​សព្វថ្ងៃ ដែល​ភាគ​ច្រើន​កំណត់​អត្តសញ្ញាណ​ខ្លួន​ថាជា​ពុទ្ធសាសនិក តែ​នៅ​បន្ត​មាន​ទំនាក់ទំនង​ជាមួយ​ព្រះហិណ្ឌូ​ដ៏​មាន​ឥទ្ធិពល​មួយអង្គ។