គណបក្ស​នយោបាយ​នីមួយៗ​ រួមទាំង​គណបក្ស​ខ្មែរ​រួបរួម​ជាតិបាន​និង​កំពុង​ចេញឃោសនា​ដោយ​មាន​ការ​ដង្ហែ​ក្បួន​ ស្រែក​ជ័យ​ឃោស​ ចែក​ខិត្ត​ប័ណ្ណ​ពី​គោល​នយោបាយ​របស់​ខ្លួន ​ដើម្បី​ទាក់​ទាញ​សន្លឹក​ឆ្នោត​ពី​ប្រជា​ពលរដ្ឋ​នៅ​តាម​មូលដ្ឋាន​របស់​ខ្លួន សម្រាប់​ការ​បោះឆ្នោត​ឃុំសង្កាត់​អាណត្តិ​ទី ៥ នេះ។ លោក ​ញឹក​ ប៊ុនឆៃ ​ប្រធាន​គណបក្ស​ខ្មែររួប​រួម​ជាតិបាន​ប្រាប់​អ្នកស្រី ធីតា វីន អ្នក​យក​ព័ត៌មាន​ឲ្យ​វីអូអេ​ប្រចាំ​រាជធានី​ភ្នំពេញ អំពី​គោលការណ៍​នយោបាយ​បក្ស​ចំនួន ៧ ក្នុង​នោះ​រួមមាន​ការ​ពង្រឹង​តម្លាភាព​និង​ការ​លុបបំបាត់​អំពើ​ពុករលួយ។ អ្នក​នយោបាយ​ជើងចាស់​ដែល​ជា​អតីត​មេទ័ពរូប​នេះ ក៏​បាន​សង្កត់​ធ្ងន់​ថា​ មេ​ឃុំ​ឬ​ចៅ​សង្កាត់​ មាន​សារៈ​សំខាន់​ណាស់​សម្រាប់​ប្រជា​ពល​រដ្ឋ ​ហេតុ​ដូច្នេះ​ការ​សម្រេច​ចិត្ត​ជ្រើស​រើស​យក​មេឃុំ​ឬ​ចៅ​សង្កាត់​រូប​ណា​មួយ​នោះ​ ត្រូវ​ពិចារណា​ឱ្យ​បាន​ត្រឹម​ត្រូវ​ និង​ម៉ត់​ចត់៕

លោក​ ប្រាក់ សេរីវុឌ្ឍ ​បាន​ជាប់​ឆ្នោត​ជាថ្មី​ជា​ប្រធាន​ប្រតិបត្តិ​សហព័ន្ធ​ខ្មែរ​កម្ពុជា​ក្រោម​សម្រាប់​អាណត្តិ​៤​ឆ្នាំ​ទៀត។ លោក​ត្រូវ​បាន​ ​គណៈកម្មាធិការ​នាយក​របស់​សហព័ន្ធ​បោះឆ្នោត​ជ្រើសរើស​កាល​ពី​ថ្ងៃទី៨​ ខែឧសភា​ ឆ្នាំ២០២២។ លោក​ ប្រាក់ សេរីវុឌ្ឍ​ បាន​ដាក់​ចេញ​នូវ​ផែនការ​ចំនួន​៦​ចំណុច​ក្នុង​ការ​ទាមទារ​សិទ្ធិ​សេរីភាព​និង​សិទ្ធិ​ស្វ័យសម្រេច​សម្រាប់​ពលរដ្ឋ​ខ្មែរ​ក្រោម​ទាំងអស់​ដែល​កំពុង​រស់​នៅ​ដែនដី​កម្ពុជា​ក្រោម។ លោក ម៉ែន គឹមសេង​ នៃ​វីអូអេ​បាន​សម្ភាស​លោក​ ប្រាក់ សេរីវុឌ្ឍ​ សម្រាប់​កម្មវិធី​«ប្រភពច្បាស់ការណ៍» (Primary Sources) ដូចតទៅ៖

មន្ត្រីជាន់​ខ្ពស់​គ.ជ.ប.​វាយ​តម្លៃ​បរិយាកាស​ឃោសនា​បោះឆ្នោត​ក្រុម​ប្រឹក្សា​ឃុំសង្កាត់​នៅ​ឆ្នាំ​នេះ​ល្អ​ប្រសើរ​ជាង​ការ​ឃោសនា​បោះឆ្នោត​ឆ្នាំ​២០១៧​ ដោយ​មាន​ពាក្យ​បណ្តឹង​តិចតូច​ហើយ​មិន​មាន​អំពើ​ហិង្សា។ ​លោក​សោម សូរីដា វាយ​តម្លៃ​ដូច​នេះ​នៅ​ក្នុង​បទ​សម្ភាសន៍​ផ្តាច់​មុខ​ជាមួយ​វីអូអេ​សំឡេង​សហ​រដ្ឋ​អាមេរិក​នៅ​ការិយាល័យ​ស្ថាប័ន​រៀបចំ​ការ​បោះឆ្នោត​គ.ជ.ប.​កាលពី​ថ្ងៃ​ទី​២៣ ​ខែ​ឧសភា​ ដែល​ជា​ថ្ងៃ​ទី​បី​នៃ​ការ​ចាប់​ផ្តើម​យុទ្ធនាការ​ឃោសនា​បោះឆ្នោត ​ដែល​គណបក្ស​មួយ​ចំនួន​ត្អូញត្អែរ​ថា ​មិន​មានភាព​ស្មើគ្នា។​ សូម​លោក​អ្នក​ទស្សនា​បទ​សម្ភាសន៍​របស់​លោក​ លាស់ លីបលីប​ ជាមួយ​លោក​អគ្គលេខាធិការ​រង​គ.ជ.ប.​ដូច​តទៅ៖

ក្រោយ​ការ​រំលាយ​គណបក្ស​នយោបាយ​ប្រឆាំង​ដ៏​ធំមួយ​នៅ​ឆ្នាំ ២០១៧ មក សកម្ម​ភាព​ក្នុង​វិស័យ​នយោបាយ​នៅ​កម្ពុជា មិន​សូវ​សកម្ម​និង​ពុំ​មាន​និន្នាការ​នយោបាយ​ចម្រុះ​ពហុបក្ស​នោះ​ទេ។ ក៏​ប៉ុន្តែ នៅ​ខែ​វិច្ឆិកា ឆ្នាំ ២០២១ គេឃើញ​ថា សកម្មភាព​នយោបាយ​ពហុបក្ស​ហាក់​ដូចជា​ចាប់កំណើត​ឡើង​វិញ នៅពេល​ដែល​គណបក្ស​ភ្លើង​ទៀន បាន​ប្រកាស​ធ្វើ​សកម្មភាព​នយោបាយ​របស់​ខ្លួន​សាជា​ថ្មី ក្រោម​រចនា​សម្ព័ន្ធ​ដឹកនាំ​ថ្មី ដោយ​គ្មាន​វត្តមាន​ស្ថាបនិក​បក្ស​ពី​មុន។ វីអូអេ​បាន​ចុះ​យក​ព័ត៌មាន​នៅ​ខេត្ត​កំពង់ឆ្នាំង ដែល​នៅ​ទីនោះ សមាជិក​នៃ​គណបក្ស​នយោបាយ​មួយ​នេះ បាន​បង្ហាញ​ចិត្តរំភើប ត្រេកអរ​នៅពេល​បាន​ជួបជុំ​ក្រុម​ការងារ ​និង​លឺ​សម្លេង​ហ៊ោរ​កញ្ជៀវ​ជាថ្មី​ម្តងទៀត​ ក្រោយខក​ខាន​ធ្វើ​នយោបាយ​ជាង​ ៤ ឆ្នាំ​មក​ហើយ។​ អ្នកនាង​ ខាន់ សុគុំ​មនោ​ រាយការណ៍​លម្អិត​ពី​ស្រុក​បរិបូរណ៍ ខេត្តកំពង់ឆ្នាំង៕

គណបក្ស​នយោបាយខ្លះ​ដែល​ចូល​រួម​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ​សង្កាត់​ ផ្តល់​ការគាំទ្រ​ការ​ដាក់​ចេញវិធាន​ការ​បង្ការ​ទប់​ស្កាត់​ការ​ប្រើ​ប្រាស់​គ្រឿង​ស្រវឹង​នៅតាម​សហគមន៍​ ដោយ​មិន​មាន​ការ​ព្រួយ​បារម្ភ​អំពី​ការ​បាត់​បង់​សំឡេងឆ្នោត​សម្រាប់​ថ្ងៃ​បោះ​ឆ្នោតផ្លូវ​ការនាដើមខែ​មិថុនា​ខាង​មុខ​នោះ។ លោក លាស់ លីបលីប និង​លោក ពិន ស៊ីសុវណ្ណ រាយការណ៍​លម្អិត​ពី​រាជធានី​ភ្នំពេញ៕

គណបក្ស​មួយ​ចំនួនបង្ហាញ​ការ​មិន​ពេញ​ចិត្ត​នឹង​បរិយាកាស​នៃ​យុទ្ធនាការ​ឃោសនា​បោះឆ្នោត​ក្រុម​ប្រឹក្សា​ឃុំ​សង្កាត់​ក្នុង​ពេល​បី​ថ្ងៃ​ដំបូង​នេះ ​ ​បើ​ធៀប​នឹង​យុទ្ធការ​ឃោសនា​បោះឆ្នោត​ក្រុមប្រឹក្សា​ឃុំសង្កាត់​ឆ្នាំ​២០១៧ ដែល​គណបក្ស​សង្គ្រោះជាតិ​ទទួល​បាន​អាសនៈ​ជាង​៥០០០​ ប៉ុន្តែ​មន្ត្រី​ជាន់​ខ្ពស់​គណៈកម្មាធិការ​ជាតិ​រៀបចំ​ការ​បោះឆ្នោត​(គជប)ថា មាន​ភាព​ល្អ​ប្រសើរ។ លោក​ លាស់ លីបលីប និង​លោក ពិន ស៊ីសុវណ្ណ​ រាយ​ការណ៍​លម្អិតអំពី​រឿង​នេះ​ឱ្យវីអូអេពីរាជ​ធានី​ភ្នំពេញ៕

មិន​ត្រឹម​តែ​បាន​ប៉ះ​ប៉ូវ​ភាព​ឆក​ល្វែង​ដែល​បន្សល់​ទុក​ដោយ​លោក ដូណាល់ ត្រាំ​ ដែល​បាន​ងាក​ចេញ​ពី​សមាគម​អាស៊ាន​ប៉ុណ្ណោះ​ទេ លោក ចូ បៃដិន បាន​ដាក់​ចេញ​នូវ​យុទ្ធ​សាស្ត្រ​ចំ​គោល​ដៅ​និង​បាន​ចាក់​គ្រឹះ​វត្តមាន​អាមេរិក​ក្នុង​តំបន់​ឥណ្ឌូ​ប៉ាស៊ីហ្វិក​តែ​ម្ដង។ នេះ​ជា​ការ​លើក​ឡើង​របស់​ លោក ឱក សេរីសោភក្ដិ៍ ​ខណៈ​ចូល​រួម​ជា​វាគ្មិន​ក្នុង​កម្មវិធី​ Hello VOA ប្រចាំ​ខែ ក្រោម​មូលបទ​អភិបាល​កិច្ច​ល្អ​ ដែល​ចាក់​ផ្សាយ​កាល​ពីថ្ងៃទី២៣ ខែឧសភា ឆ្នាំ២០២២៕

គណបក្ស​ហ្វ៊ុនស៊ិន​ប៉ិច​ កាលពី​ព្រឹក​ថ្ងៃអាទិត្យ នេះ​បាន​បើកក្បួន​ឃោសនា​គណបក្ស​របស់​ខ្លួន​ ដោយ​ក្រុម​អ្នក​គាំទ្រជួបជុំគ្នា​នៅ​សង្កាត់​ព្រែកហូរ ​ក្រុង​តាខ្មៅ​ ខេត្តកណ្តាល។​ ព្រះប្រធានបក្ស ព្រះអង្គម្ចាស់ នរោត្តម ចក្រា​វុធ​ បាន​ថ្លែង​បើក​យុទ្ធនាការ​ឃោសនា​នេះដោយខ្លី​ ដោយ​អំពាវនាវឱ្យអ្នក​គាំទ្រ​ព្រះ​អង្គទៅ​បោះ​ឆ្នោត។ គណបក្ស​នេះ​ចូលប្រឡូក​ក្នុងនយោបាយ​កម្ពុជាជាង​៤០ឆ្នាំ។ កាលពី​ការបោះឆ្នោតឃុំ​សង្កាត់​អាណត្តិ​មុន នៅ​ឆ្នាំ២០១៧ គណបក្សនេះ​ពុំ​បាន​ឈ្នះ​កៅអីមេឃុំ​ឬចៅសង្កាត់​ទេ។ រាយការណ៍ពី​រាជធានី​ភ្នំពេញ ដោយ អ្នកនាង​ ខាន់ សុគុំមនោ​ និងអ្នក​នាង​ ធីតា​ វីន៕

គណបក្ស​នយោបាយ​ដែល​បាន​ចូលរួម​ដាក់​បេក្ខជន​ឈរ​ឈ្មោះ​ប្រកួត​យក​អាសនៈ​ក្រុមប្រឹក្សា​ឃុំសង្កាត់ បាន​ចាប់ផ្តើម​យុទ្ធនាការ​ឃោសនា​រក​សន្លឹក​ឆ្នោត សម្រាប់​ការ​បោះឆ្នោត​ជ្រើសរើស​ថ្នាក់ដឹកនាំ​មូលដ្ឋាន​នៅ​ថ្ងៃ​ទី៥ ខែ​មិថុនា ខាងមុខ។ ពលរដ្ឋ​ខ្លះ​ក្នុង​ទីក្រុង​ភ្នំពេញ​និយាយ​ថា ពួកគេ​ចង់​ឱ្យ​ចៅសង្កាត់​ ឬ​ក្រុមប្រឹក្សា​សង្កាត់​ជាប់​ឆ្នោត​កសាង​ហេដ្ឋារចនា​ផ្លូវថ្នល់​រឹងមំា​និង​មាន​ប្រឡាយ​បង្ហូរ​ទឹកដែល​អាច​ឱ្យពួក​គេ​ចៀសផុត​ពី​ការ​ជន់​លិច​ដោយសារ​ទឹក​ភ្លៀង និង​បញ្ហាៗ​ផ្សេងៗ​ទៀត ពាក់ព័ន្ធ​សនិ្តសុខ​ និង​សុវត្ថិភាព​ឃុំសង្កាត់។ លោក ​លាស់​ លីបលីប ​រាយការណ៍​ឱ្យ​វីអូអេ​ពី​រាជធានី​ភ្នំពេញ​៕

គណបក្ស​នយោបាយ​មួយចំនួន​ចាប់​ផ្តើម​ហែរ​ក្បួន​ឃោស​នា​គោល​នយោបាយ​មូលដ្ឋាន​របស់​ខ្លួន កា​ល​ព្រឹក​ថ្ងៃសៅរ៍​ ទី២១ ខែឧសភា​នេះ​។ គណបក្សភ្លើង​ទៀន ដែ​លគេឃើញ​ថាជា​គណបក្ស​ប្រឆាំង​មួយ​ហាក់​មានសន្ទុះ​គាំទ្រ​ច្រើន​ ​បាន​ហែរ​ក្បួនឃោស​នា​គោលនយោបាយដោយ​មាន​អ្នក​ចូលរួមប្រហែល​ប្រមាណ​១៥០០នាក់​ បើយោងតាម​គណកម្មាធិការ​ជាតិ​រៀបចំ​ការ​បោះឆ្នោត​។ ថ្នាក់​ដឹក​នាំជាច្រើននាក់នៃ​គណបក្សនេះ បាន​ចូលរួម​យុទ្ធនាការនៅរាជធានីភ្នំពេញ​ ដោយ​មាន​ប្រជាពលរដ្ឋ​តាមដង​ផ្លួវ​ចូលរួម​សាទរ​ក្បួន​ដង្ហែរ​ និងសាទរ​នូវ​វត្តមានជាថ្មីម្តងទៀត​របស់គណបក្ស​ប្រឆាំងមួយនេះ​។ លោក​ សុន ឆ័យ អនុ​ប្រធាន​នៃគណបក្ស​ភ្លើងទៀន​ថា​ គណបក្សខ្លួន​នៅតែរក្សាការ​គាំទ្រ​ពីពលរដ្ឋ​ នៅ​ទី​ក្រុងភ្នំពេញ​។ អ្នកនាង​ ខាន់​ សុគុំមនោ និង​អ្នកនាង​ ធីតា​ វីន រាយការណ៍​ឲ្យ​ ​VOA ពី​រាជធានី​ភ្នំពេញ៖